四縣腔｜魔法的秘密 (十一)

O.S

前提概要：強尼先生做細人仔該下屋下畜過比賽个月鴿仔，因爭毋盼得辛苦个月鴿仔在比賽中著傷甚至死忒，佢大了後，盡力成為一位愛護動物个魔術師，將愛傳達同分享分大家，續下來故事會仰仔發展呢？
分亻恩兜繼續聽下去！

強尼爸爸

細強尼啊，𠊎盡希望你做得同𠊎共樣，分亻恩俚屋下个兜月鴿仔，繼續在月鴿仔比賽肚打頭名。

小強尼

無愛，阿爸，𠊎無想愛過傷害任何動物！將來𠊎愛變成一位魔術師，還過無任何動物，會因爭吾奇術表演來著傷。

強尼爸爸

哈哈哈，這毋係一件盡簡單个事，阿爸𠊎斯盡期待你會仰般做哦！

O.S

大了後个強尼先生，總係細心个定期渡動物佢兜去醫院做健康檢查，當晝過後，大自家會同佢共下在禾埕項晟日頭、做運動，分大家有罅个運動還有充足个營養。

團長女兒

阿叔，你在該想麼个啊？表演恁精彩，你仰在該發琢愕？

強尼先生

啊！𠊎仰會在這時節，想起做細人仔該下个事呢？啊，𠊎知了，因爭𠊎總試著，若爸團長同𠊎有吔共樣个心，𠊎兜都入迷在觀眾笑聲个魔力，相信這個世界上，存在吔不可思議个魔法，故所𠊎選擇了奇術，團長選擇馬戲團，𠊎兩儕之間，其實並無忒大个爭差啊！

O.S

想通了這點後，分強尼先生不由自主个愐，該，團長到底係仰般形个人呢？佢同自家最大个差別又係麼个？

強尼先生

若爸正經無恁該，企在大自家面前表演，該毋係一件簡單个事，頭腦裡肚，不時愛想出精彩个表演內容來餳觀眾，還愛時常為著票賣毋好來睡毋忒，毋過啊，淨愛𠊎兜聽著大家个掌聲同笑聲，所有个辛苦都無算麼个。

團長女兒

阿叔，你同吾爸講个話共樣共樣呢！佢講就算表演 盡辛苦，毋過佢還係想企在舞臺上，享受這種甜蜜个幸福呢！

強尼先生

係無？

O.S

馬戲團表演到一半，帳篷肚，忽然傳來一陣老虎个 虎嘯聲。

團長女兒

壞蹄了！小愛發性了。

O.S

看等老虎小愛，一步一步 行兼跌著坐在地泥上个團長，臺下个觀眾逐儕笑到無停。

路人甲

哈哈哈，這應該毋係團長 䟓工安排愛搣分大家笑个內容嗬？

路人乙

就係啊！佢存心想愛分大家著驚一下呢，恩兜正無 恁好騙！

團長女兒

正毋係恁樣！這毋係小愛 平常時个表現，𠊎愛遽遽阻止佢正做得。

O.S

細阿妹仔想衝去臺頂安慰小愛，嗄分強尼先生抓著並攔等佢，人類突然間做出來个舉動，盡會分動物著驚著，這時節恬靜个觀察正係最好个做法。

馬戲團長

小愛乖，𠊎係阿爸啊！你過看真兜仔，毋好譴，𠊎 對你還係一條細老虎開始，畜你畜到今个啊！𠊎從來毋盼得用皮鞭仔修你，乜毋識對你大細聲，你仰會發恁大个脾氣呢？

馬戲團長

啊，𠊎知了，你係毋係無想愛跳火圈？哎呀，毋過觀眾盡好看老虎跳火圈，這係為著餳大家來看表演个演出啊，你乖，阿爸等一下仔飼你食肉，好無？

路人甲

遽走！該條老虎走下舞台，愛狌人了！

路人乙

阿姆哀哦！

馬戲團長

這下𠊎慘了。淨愛消息一傳出去，馬戲團个名聲就會受著盡大个打擊，評價乜會直落谷底，無人會再 來看表演了。

強尼先生

莫緊張，遽遽逐上去！事情定著有辦法解決！

O.S

帳篷裡肚个觀眾，因爭老虎小愛逃走，噦噦嘶嘶个聲對四面八方緊來，對後臺衝到台前个強尼先生，嗄對團長先生伸出友誼个手，扼等佢該雙緊顫、盡冰盡冷个手。

O.S

到底，強尼先生同團長，做得順利逐轉老虎小愛無？小愛个命運又會仰般呢？分亻恩兜繼續準時收聽，共下關心老虎小愛个下落！