四縣腔｜魔法的秘密 (九)

O.S

該強尼先生堵著了馬戲團 團長个妹仔，兩儕嗄開始詏嘴，仰般有時節快樂係一件毋著个事情？到底馬戲團團長經歷過麼个事情，正分佢變到這下恁呢个樣仔呢？分亻恩兜繼續聽下去！

O.S

馬戲團團長享受吔海浪樣仔个熱情搭手聲。

馬戲團長

看哪！𠊎訓練動物个表演受著大家盡大个歡迎，毋過𠊎仰仔都愐毋解，仰般大家會恁迷魔術師个催眠呢？敢講，佢兜恅著該毋係一場失敗个表演喺？噭毋係一件分人悲傷个事喺？仰般大家嗄流等目汁、笑咪咪仔搭手？哎呀，𠊎毋管了！暗晡夜觀眾个笑聲分𠊎嶄然沙鼻了！𠊎啊，淨愛戴等紅鼻公，過較大个問題都毋係問題顛倒係生趣个遊戲！

O.S

這時節个團長，眼底同心肝肚淨有一個目標，該就係帶大家行入一隻完全無共樣个世界，享受淨有在馬戲團帳篷裡肚發生个奇妙時刻 。

團長女兒

阿叔你看！吾爸續下來愛表演空中行鋼索呢！

小朋友A

還得人驚哦！佢仰敢搖搖擺擺个行在鋼索頂

小朋友B

𠊎毋敢看了啦！若係佢跌下來愛仰結煞？

強尼先生

哇，若爸仰會想得出來戴紅鼻公行鋼索？還生趣！

團長女兒

阿爸講，這個靈感，來自佢做細人仔該下个回憶。該央時，見擺淨愛演出个票賣毋忒，阿公總會無歡喜 …。

團長父親

唉，𠊎愛仰仔做正好呢？票都賣毋出去，無賣票就無飯好食啊。

團長父親

好得，𠊎還有隻神奇个寶物，戴等佢，吾心情就會較好了！

小團長

哇！見擺淨愛阿爸無快樂，戴上紅鼻公，黏時就會 像變了一儕人樣仔，腳步輕鬆，面項還帶等笑容。該隻紅鼻公頂項定著有魔法！

O.S

細團長囥在門後背，透過門縫仔，看著阿爸个心情對壞變到好，就像魔法共樣。

小團長

𠊎乜愛來戴紅鼻公看啊咧！咦？仰會麼个事情都無發生。魔法仰仔失去效力了，係因爭𠊎無罅乖喺？還係無罅聰明？阿婆、阿婆，這世界上正經有魔法喺？

阿婆

細戇牯，這個世界上，當然有魔法啊！毋過單淨愛目珠裡肚有光个人正會知魔法个秘密。

O.S

阿婆雙手打開，溫柔个揇等細團長。

小團長

光？𠊎又無看過，愛到哪位尋目珠裡肚个光？

阿婆

你詳細想看啊，你敢正經 無看過？

小團長

唔…

O.S

細團長想盡辦法个想啊想，頭腦肚嗄閃過阿爸个目珠，阿爸个目珠裡背確實有佢無个光。

馬戲團長

恁樣講來，該位魔術師乜係一個目珠散發光芒个人，唉，等到表演結束，正好好向佢會失禮啦。大家恁仔細、大家恁仔細！你兜中意暗晡夜个演出，亻恩兜下二擺正來尞！

O.S

這個暗晡毋單淨團長自家想起做細人仔該下，強尼先生也想起有個細阿妹仔問佢…

小女孩

強尼先生，快樂，仰會係毋著个事情？

O.S

聽著這個問題強尼先生發琢呆了，共樣想起童年个回憶。該係一段同月鴿仔有關个回憶。

小強尼

呵呵呵，你這兜綻剁頭，等一下仔出外訓練該下斯愛細義，毋好尋無路好轉哦！

O.S

逐儕人都識做過細人仔，到底強尼先生做細人仔該下，識發生過仰般形个故事，分這下个佢，盡力愛做一位愛動物个魔術師？記得準時收聽，恩兜共下來聽故事，同強尼先生共下大！