2020-04-06

｜客家最新呢千百種工作｜

1. 開場

客家新百工毋係講客家有新呢伯公要參拜，佢介意思係『客家最新呢千百種工作』，故所阿宗愛來紹介多元呢客家產業，訪問產業底肚个達人，請這兜達人紹介愛樣般堅持理想？愛樣般來煞猛打拼，分享佢等呢心情故事分各位聽眾朋友知得。

2. 第一單元鄉親恁早

今分日係新曆四月初六、舊曆三月十四、禮拜一，在運勢這部分今分日適合祭祀、

祈福、求子、納財同交易，所以呀阿伯伯母你等要去廟項參拜、也係大哥大姐做生意愛去簽約等等，運勢攏非常好喔；講到禁忌个部分，莫來做開光、嫁妹仔討辛臼、安葬、安門、去醫院遶病人，相沖生肖呢係肖雞仔，尤其係今年28歲、88歲个人，一定愛特別注意哈！希望大家平安健康事事順利。

3. 第二單元 阿宗開講１

今分日個主題就係『農業』，先來講農業个『農』這隻字，這隻字其實已經講出幾千年來農家人呢命運，第一點、農家人愛對天光做到暗餔夜，因為農字底肚有朝晨个『晨』這隻字，也有星辰个『辰』這隻字，『辰』這隻字就在農字个下半部，就係華語講个早晨的晨和星辰的辰，朝晨代表天光誒、暗餔夜天頂會有星仔，所以做農個人要認份，做勢愛對天光做到暗餔夜。第二點、農業這條路彎彎曲曲無好行，農字介上半部就係『曲』這隻字，曲字簡單來講就係彎曲个意思，另外呀！曲字也盡像係兩隻『田』字黏共下，突出來个兩條直槓呢就像係田脣路，聽眾朋友啊！你看這隻『農』字竟然有恁深個意思，非常佩服造字者倉頡个智慧。涯相信盡少人認真去想過『農』字个意思，阿宗係樣般會有這種想法个呢？因為呀在田坵仔割草忒無聊，故所想一息事情來轉擺一下心情，盡趣妙齁！