2021-04-18 六堆到底開庄幾多年系列報導(三)

1.主持人引言：

六堆300年、六堆400年、六堆客家到底幾多年？

2. 六堆客家到底幾多年主題報導3

(1)大航海時期

根據里斯寫到个「台灣島史」中提到：
在中國个文化當中，有一種盡頑固个區城性，
比將講：南人、北人，土著、客民，
在地、外人，就講對外地來个人有強烈个排他性。
南方各省个人，對於北方來个客家先民
(當時應該還無客家人這種稱呼，
一般喊外籍人為客民過多)，
不管係徙入來做生理个、做事个、
濮田做耕種个，都有盡強烈个反感。
文獻紀載1368年到1600年十七世紀止，
大概係在中國个明朝建國以後，
客家先民伊等就開始大批地遷徙移居台灣，
謀求做得過較好个生活。

雖然，每擺淨淨只有少數幾儕人或家族徙來台灣，
不過日長月久客家人在大陸上个人數續漸漸來減少，
下後差不多有三分之一就群居在台灣了。
「到十七世紀中葉，荷蘭人與台灣島个頭目交涉个時節，
就由客家族來做翻譯，伊等同中國人全然無麼个差別 ，
對台灣物產同外國个交易也盡了大力……。」
這份文獻主要係參考荷蘭人个航海日誌紀錄，
最重要个係同大家講，唔單淨客家人，
中國沿海唇省份个居民，
知得有台灣這好地方个先民，
因為生活所逼也算必要冒險个人，
渡海來台其實係蓋正常个，零零星星定著會有，
係硬愛講等荷蘭時期、明鄭時期也算1650年以後。
​
關於漢人移民个人數，根據江樹生(1997)个研究，
對1634年荷蘭人就在台灣開始實行殖民政策，
1638年時期來台漢人就有10000-11000人。
西元1636 年，蘇鳴崗被巴達維亞總督封為
「甲必丹」(Captain華僑領袖)，
經大員館授一大片土地，伊招募了唔會少閩南人來臺，
投入種稻、插蔗、捕鹿的生產行列。
1640年9月，大員商館開始對男性的漢人移徵收人頭稅，
當時納稅人口數為3568人。
1643年大員館官在寫給巴達維總督的信裡提到:
「福爾摩沙的農業收，吸引很多中國人來這裡，
現在已出7000張人頭稅了」，
顯示臺灣的農業開發很有進展，
移居臺灣的中國人更多了。

當然，根據曾喜城先生个研究，
也有資料顯示：
荷蘭時期曾招募客家移工幾下千人來台。
不過，愛同大家先講，在這沿海閩南个詔安、
平和、東山算係客家縣市，潮州府也有鎮平、
平遠、程鄉三縣係客家縣市。
漢人來台混雜等客家先民，
應該比較過合理个情形。
有一種講法，主張六堆客家先民在1650年前，
就已經在屏東平原開墾ㄟ。
李文良閩主粵佃个研究，
就講大清對康熙時節將台灣納入領土，
當時台灣算係閩省个一部份，
官方个稅務係交分擁有墾照个業主負責，
濮田耕種个佃農全部嚕愛向擁有墾照个業主繳稅。
當時大部分个業主都有一種租賃契約，安到「田底制度」。
這兜事先已經分人戰有所在个佃農，
佢个佃耕權力受到保障，
未經本人个同意不得租分他人，
同時佢也可以買賣佃耕權力。
趙李文良教授个見解，
六堆客庄先民開發屏東平原，
應開係對1650年之前。
由此可見，客家先民當時雖然無辦法正式入籍，
但當時已算是具有永佃權、土地實質所有權。
這係渡海三禁之前就定著ㄟ，係已成个事實。

 
(2)明鄭時期

第二種說法係明鄭時期
1661年客家先民隨軍來到，
1683年明鄭敗退，
所屬部隊有客家先民解甲歸田以後
集體進入屏東平洋開墾。
西元1661年，鄭成功帶了一批軍隊來到台灣，
最有名个係鄭成功个海軍統帥：
劉國軒。算係汀州客/福建長汀人。
另有一些人係來自潮州地區
（包含後來安到嘉應州）的客家人，
下後，就定居於台灣至今。
 

(3)康熙中期

第三種講法，就係講在康熙中期來六堆个。
日本學者伊能嘉矩主張个1686年，
係之前大家最常拿出來講个，
伊能嘉矩指出，康熙25、26年(1686~1687年)
東嘉應州(當時還沒有這地名)有鎮平、
平遠、興寧、長樂等縣民，
大概100人左右入墾下淡水溪東岸。

鍾壬壽指出，有一批原底屯田於台南東門的清軍，
於1692年(康熙31年)解甲歸田分大清政府安置在濫濫庄。
在竹田鄉誌確實有描寫這種情形，
講客家人入墾之前本有3批福佬人申請開墾，
幾百人入去，結果死冇歇个爬出來兩三儕定定。
嚇著唔敢再去、全然放棄！正輪ㄟ到客人接手。
阿豐頭想，客家人或者在中國原鄉就有防瘧疾个遺傳，
係冇就係前面講个，請平埔族人襯手開墾，
共下打天下過有可能。

關於登常分人拿來拗事个渡台三禁，
雖然講，大清統治台灣个213年期間，
有90%个時間禁止人民來台，
一直到1874年正廢除開放人民來台。
不過，大家可能也愛有所了解。
首先，禁斯禁但無一定認真禁。
再者，禁粵籍、潮籍但並不包括
閩籍詔安、平和、東山，同大量个汀州客人。
第三，有禁但唔係一直禁，
有寬鬆也有不禁个時節。
最尾，盡重要个係禁止粵人、潮惠之人來台，
也不包括申請照單來打工、濮田个佃農，
無戶籍續可以在台灣耕種生活。
目前所有正式入墾屏東平洋个文獻，
不管係1650年、1686年、1692年，
全部都係在渡海三禁个期間。
所以，斷真有學者提出懷疑講，
根本就無所謂个渡台三禁；
但係，阿豐頭認為渡台三禁應該確實有，
不過大清官箴腐敗、台灣開墾盡需要人力，
所得並唔係像大家想个，
因致按呢斷絕了粵東客家來台个路。
    

今分日，盡歡喜同大家分享，
客家先民入墾屏東平洋時間个幾種講法，
感謝大家个收聽，下一回愛同大家來分享，
六堆忠義亭个歷史同建築發展。
歡迎大家繼續收聽，按呢好！大家正來寮。

播放歌曲：

1. 山與田（謝宇威）、
2. 夜合（陳雙）、
3. 食茶（羅思容）、
4. 雪花飄飄葫蘆絲版（費玉清）、
5. 林頂月光（黃佩舒）、
6. 春去秋來（謝宇威）