2021-05-02 六堆忠義亭(二)

歡迎大家再一擺收聽講客電台/
六堆insite客家生活現場：六堆300个主題報導。

上禮拜个節目，阿豐頭同大家講起
西勢忠義祠樣仔分人硬應改做六堆忠義祠，
又樣仔應該愛改歸來正名安到：六堆忠義亭嗕？！
斷真講，主持人阿豐頭在這愛大聲呼籲台灣客家人，
絕對愛尊重、愛惜六堆忠義亭个歷史文化價值。
尤其，忠義亭底背所服祀个唔係他人，
也唔係同涯等本底無關係个中國人，
先莫講有人認為六堆忠勇公講得係涯等台灣个武神，
就單淨對敬重先祖个角度來看：
忠勇公亦好！忠勇公王亦好！
全部都係涯等六堆客家人自家个祖先，
全部都係為著保護涯等台灣這塊土地、
護佑涯等六堆客家先人所犧牲奉獻个。
因為涯等客家人講究敬祖法天，
對於祖先總係等同像敬重神个按呢來對待。

所以，有人會講：客家人真好，
過身个人馬上就做神ㄟ。
所謂陰神、陰鬼之說，
相當大个部分係受到福佬人个影響。

記得，還後生正開始出社會教書時節，去到福佬庄教書。
有一日，聽人講起社區一家人个故事，
大概就講哇是个家人會按唔順也算發病，
係因為祖先不安正害伊等家人變成按呢。

當時，涯一聽啊著非常著驚亦非常不解，
蓋像在涯等客家庄從來唔識聽講祖先會害子孫个，
最多最多係保佑多也算少个問題定定。
包括蓋多福佬人看著客家人在牛埔下掛紙，
放紙炮仔、和樂融融盡像蓋鬧熱，
定著會感覺著一等奇怪。

客家人在生為人、過身為神，大家想看看吶！
係唔係按呢？
所以，莫講忠義亭服祀个係對社會有大功个、
又蒙大清皇帝加持敕封，
就淨淨講係个係涯等客家人个先祖，
敬重忠勇公為神再自然不過。

當然，目前台灣盡多問題都唔係道理問題，
盡多講法都係政治問題，
政治有時大到可以在人个腦屎肚ㄟ灌漿，
有疊硬个國民黨亦有疊硬个民進黨。

阿豐頭想愛在這拜託政治政黨放手，
最少最少愛保留分客家些把尊嚴，
也同時保留分自家些把人格。

以六堆忠義亭在台灣个歷史地位，
期待有一日，政府同民間合作，
成立法人基金會來永續管理經營，
撇開多多人个利益紛爭、
政治意識形態个勞攪，
還涯等六堆客家一個莊嚴个精神堡壘。
續下來，
愛同大家分享做麼个忠義亭會起啊在西勢？
先聽一首歌仔，
箇中原由阿豐頭在定定仔同大家分享

一首歌

歡迎大家再歸來收聽涯等講客電台
/六堆insite客家生活現場：
六堆300个主題報導。

有人會問：六堆按大塊，
竹田个西勢庄又位在按偎西、按偎福佬庄，
當時樣會選在這位來起西勢忠義亭呢？
其實，各位鄉親好朋友，
係有聽過本節目前幾集个人，
就會知得原底客家庄係在濫濫庄、社皮亦有，
下後開墾擴大。
最開始西勢庄係福佬過多个福佬庄，
親像一滿个六巷庄，
今个西勢庄對西勢國校向西過去，
就還有過溝仔還本本係福佬人家。

以當時个情形來看，
矜其里為褒忠个所在係在新北勢，
圍等一滿竹田福田庄又有
東勢、西勢、南勢、老北勢，
可見係對新北勢入懷忠里，
西勢講起來係客家庄近偎西个入口。
六堆原居地濫濫庄到1721年个時節，
六堆已經有13大庄、64細庄，
早都擴散到大武山下、林邊溪唇。
西勢這地方實在係六堆盡西片，
也非常接近福佬庄。
不過，西勢等同係原底濫濫客家庄，
來去六堆客家庄非常近、
非常重要个西片交通路口

另外也有人傳說講，
本底也有按算起呀在過中心點个內埔仔，
聽講个當時有人講西勢个風水過好。
相爭背背个結果，
就請鳳山知縣派人去
內埔仔、西勢各挖一盆泥來秤，
結果西勢个泥比較過重兜仔，
所以就按呢忠義亭決定起呀在西勢。
阿豐頭左思右想這部分罔罔仔聽就好。
樣仔講？
當時个六堆客庄應該也無像一滿个規模，
內埔仔、萬巒可能還係初開階段，
以濫濫庄、糶糴為最前頭起勢，
順等東港溪、龍頸溪、隘寮溪
一路開墾上去到大武山邊。
係無唔著，按講懷忠門係懷忠里入口，
中堆應該係當時六堆客家開墾最核心个場域。
照1721年第一擺出堆論功行賞个名單，
主其事者李直三、侯觀德都係中堆人，
會考慮設在西勢應該也係有一定影響。

其實，起在西勢應該還係考慮，
設立一個強大个官方建築，
借皇家个威嚴嚇懟西片來犯个福佬人，
達到嚴守客家庄个第一道防線。
打客家人係一回事，
走入皇帝起个忠義亭打客家人，
个就係盡大條个事。
大家唔好講阿豐頭在這講笑，
想當時高樹大路關起石獅公，
除了鎮風辟邪也有嚇外族个效果，
相信像美濃个又高又大个東門樓咩有共樣个味緒。

當然，有人會問：
樣唔將就在濫濫庄起忠義亭呢？
唔古，當時濫濫庄四週圍丁一轉，
前後左右都係發達人多勢眾个福佬庄；
無定著，濫濫庄雖然講係客家先民初期落腳个地方，
忝等開墾个腳步可能大部分都既經徙去竹田
以東、以北、以南个所在也大有可能。

老實講，一方面驚怕福佬人戰後矛盾尷尬个立場，
一方面也驚怕客家庄無辦法來顧全。

歡迎大家再歸來收聽涯等講客電台
/六堆insite客家生活現場：六堆300个主題報導。

阿豐頭老屋歇在頭崙偎濫濫庄合界，
從細也忝阿爸在這搭仔築埤頭，
對於在嗚呼忠義亭一書忠松崎仁三郎个推論，
感覺著怪怪。首先，松崎仁三郎講：
朱一貴事件發生，大家會集合在西勢庄、
會在內埔天后宮議事。
因為，西勢庄其實跨過竹圍橋就可以直接入去濫濫庄，
就係對一滿西勢愛去六巷个路上，
右手片有一條路安到文筆路，
直直過去就係老頭擺个濫濫庄。
會經過竹圍村、竹林村來到濫庄，
有一座濫庄伯公，
早期六堆客庄辦神明會都會來濫濫庄伯公、
過萬泉寺會香。
對西勢出濫庄前去下淡水溪，
講得係最安全直接个路線。

再講，當時莫講根本就還唔曾起這內埔天后宮，
嘎是愛樣仔談到會在內埔天后宮底背來議事呢？
再講，萬丹、新園開發盡早也盡發達，
尤其新園係一批大清駐軍个所在，樣還會係賊仔竇喔？
係講羌園可能有影係有賊竇，
唔古个離隔到按遠去ㄟ，
唯一影響个怕只有茄苳腳。
第三，講起來，
濫濫庄最多係客家人初期暫時落腳个所在，
紮過當然會有飲水思源个感情連帶，
但愛講个係祖居地就特過ㄟ。
再講，下後盡多陸續來到六堆个客家先民，
可能就無經過濫濫庄係直接去到各庄頭生活。
根據相關文獻指出，
某一種程度客家人个濫庄、福佬人个西勢、
六巷應該有交庄个情形，
交庄-係講濫庄个客家人同西勢个福佬人對交田丘屋幢，
等同客家人歇共下、福佬人歇共下，
持續幾久發展到今日个情形唔得知。
但係相關資料顯示，
應該在大清時期就已經完成，
日本時代到如今基本上个變動唔係盡大。

一首歌

歡迎大家再歸來收聽涯等講客電台
/六堆insite客家生活現場：六堆300个主題報導。

根據相關个文獻來看，
忠義亭其實唔係一開始就起像這滿按大間。
目前最早最早个相片係1912年日本人攝个，
當時攝了三張。阿豐頭花了將近歸隻月，
研究到底原來1912年个忠義亭生做樣仔？
最尾，同曾坤木个賴仔曾鼎凱先生，
兩儕人這湊个湊最尾正整理出當時忠義亭个原貌。
1912年个下ㄟ个忠義亭，
係有三殿過迴廊，大殿、兩側偏廳、大殿
前面格一个細細仔天井係中殿、黏等偏廳
个係兩條長長个迴廊，一路接到前殿。
空間係同一滿个形式差唔多，
只不過當時个建築係木造个，
有兩支龍柱，左右長廊用十支木柱、
下背係石盤基座撐等，
中殿偎大殿天井兩片係鐘、鼓。
從落背看大門看吶去，
大家就可以用慢加60年起好个內埔天后宮放大來想，
形式唔會差蓋多。

係講當時1721年起个忠義亭，
應該一開始只有大殿、側廳同前殿。
下後因為不斷出堆為政府平亂有功，
所以大清皇帝會特別擴建、重修，
大概情形係經過雍正時期起加兩片迴廊、
乾隆時期再擴建中殿，
當然賜匾這兜就不在話下。

日本時代基本上，就無定動；
無破壞也無整修，講是講尊重禮敬，
但等同放伊荒。在日本時代，
西勢國校還唔曾起好个時節，
有一駁仔忠義亭个中殿，
就作為西勢國小臨時教室上課，
松崎仁三郎个相片中還可以看到凳仔。

下後，民國47年所起个忠義亭，
就將中殿拿歇、兩片長廊也拿歇，
原來天井个地方做一个貴賓台、四周圍有石欄杆，
本來凹落去个中庭，就同伊屯平來。
2015年忠義亭再一擺重修擴建，
貴賓台拿歇、恢復兩片長廊，
為到恢復三殿个莊嚴又愛兼顧場地使用个闊朗，
就放棄恢復中殿，改起加一座山門，
形式上恢復三落大殿个舊貌，
鐘鼓樓徙到前殿兩側頂高。
目前大家還可以看到三百年前个龍柱，
這龍柱其實蓋有特色喔！
認真看，底背還有隱藏版个八仙喔！

播放歌曲：

1. 從頭來過 (謝宇威)、
2. 尖尖纏(黃珮舒)、
3. 天光(吉娜罐子)、
4. 夢想天堂(邱廉欽)、
5. 花開了(黃于娟)