2021-04-25 六堆忠義亭(一)

1.主持人引言：

六堆三百年個主題報導，六堆忠義亭第一集。
第一部分：六堆忠義亭亦係六堆忠義祠？
第二部分：做麼个係西勢忠義亭？

2. 六堆忠義亭第一集

(1) 六堆忠義亭亦係六堆忠義祠？

老頭擺仔个忠義亭，大概都木造个建築。
日治時期，忠義亭雖然在日本人个尊重下，
無遭受昇天祭个破壞，但也無人做得來整
修維護。現眼个忠義亭建築，還係光緒26
年西元1900年整修到今，忠義亭任在風吹
雨打。民國43年起將原建築改作紅毛泥建
築，民國44年6月後堂改建完工。民國45年
想愛來改建前堂工事个時節，續接到屏東
縣政府轉過來个抗議函，講係來自中國國
民黨中央委員會係出自某一位海軍教官个
抗議文，講這忠義亭服祀个係打敗反清復
明个革命行動者：朱一貴，樣做得立為楷
模還愛新建？！意思係講：國民黨打敗大
清建立中華民國，樣可以表彰打敗共樣係
反清復明个朱一貴這種人呢？好得，當時
六堆有這羅卓英將軍挺等ㄟ，配合屏東縣
文獻委員會鍾桂蘭提供更正資料，正做得
繼續動工，下後順利在民國46年10月完工
落成。羅卓英將軍直接就強調講，客家人
1895乙未抗日轟轟烈烈天地動容，火燒庄
慘烈成仁取義，台澎光復續分這兜犧牲英
雄無所安慰。主持人阿豐頭，斷真打動國
民黨个係這段話。

1721年延續了237年忠義亭，在1958年一月
三日改名忠義祠，民國40年發起重修六堆
忠義祠發起人文書頂高有寫：光復以後，
台灣一奈都建立忠烈祠表彰忠義…當時个
政治氛圍下，大家有這想法也算自然。下
後，在加入奉祀台民救台抗日六堆參戰烈
士、台灣光復後台民歷參抗日烈士，過還
有中華民國萬歲牌一座。過了幾久又加上
中華民族列祖列宗神牌一座。大家淨淨看
歸壁仔都係講乙未抗日个對仔聯仔，唔知
个人怕會覺到這位淨淨服祀1895年以後个
先民？一滿已經都係民主時代了，應該愛
正正式式來恢復忠義亭个名仔正著。尤其
今年論真來講，應該安到六堆忠義亭諭建
300年確實無誤，就應該大力來呼籲六堆忠
義亭正名正著。
過去，阿豐頭識在民國105年大聲呼籲，六
堆忠義祠管理委員會改名為六堆忠義亭管
理委員會，也得到當時劉慶中主委个支持，
邀請時任總統个馬英九先生贈匾正名為忠
義亭。根據相關个文獻來看，歷史上忠義
亭識打過大醮，一擺係1869年另外一擺係
1905年，明明係神廟續因為一時个不得不，
到如今時代已經變了，還本本阿憨仔樣仔
繼續欺神為鬼，將好好个六堆神廟忠烈祠
化，神唔俾做愛伊做鬼！面對北部个義民
廟香火鼎盛，涯等六堆子弟又有何面目來
慶讚六堆300呢？

(2)做麼个係西勢忠義亭？
「六堆忠義亭」原底安到「西勢忠義亭」。
就講，清康熙六十年（西元一七二一年）
朱一貴事件發生个時節，一滿歇在六堆地
區个客家人，因為不願同朱一貴、杜君英
共陣，所得自主性來組成七營，嚴守在下
淡水溪東岸隻過月。無幾久，朱一貴派出
陳福壽帶領20000大軍來到下淡水溪西岸，
同六堆客家軍對敵。差唔多同時朱一貴續
兵敗在府城，忝等ㄟ開始走路。陳福壽續
主動跨過河攻打，最尾不敵六堆軍圍殺講
得係全軍覆沒。大清政府為到表彰下淡水
溪東岸的客家庄民助大清平亂有功，清聖
祖康熙帝為賞其功表彰忠義，並敕賜匾額
懷忠，諭建西勢忠義亭。

《重修鳳山縣志》有記載：李直三等待等
眾人來到府城，大臣覺羅滿保將帶頭起義
个這都百姓，直接將：李直三、侯觀德、
邱永月、劉庚輔、陳展裕、鐘沐華、鐘沐
純，陞官起來俾伊等來作千總。特別表揚
客家人所歇个地方安到：『懷忠里』。康
熙皇帝諭建亭安到：『忠義亭』。

學者李文良教授研究論文指出，雖來眼下
可以看到敕建忠義亭个匾額，但係敕建應
該會有聖旨、文書歷史資料，因為並無相
關个文獻，所得判定忠義亭應該係皇帝諭
建个。不過，阿豐頭認為：這忠義亭確實
係官方、甚至係康熙皇帝諭建个，大清時
節皇帝所建个官方建築，除了台南代替祭
拜皇帝个萬善亭以外，就只有西勢忠義亭，
下後幾位皇帝都有修建、擴建个指示，諭
建西勢忠義亭其實講得等同敕建忠義亭意
義上無差。有兜好抝事个人不時會講：祠
比亭過大ㄟ！廟又比祠過大，當然還維持
忠義祠過好！嘎唔會將就改作忠義廟還過
遽、過大？！西勢忠義亭个地位，係歷史
無可取代个地位，係全台灣唯一一个由國
家所起个官廟。

今分日感謝大家个收聽六堆忠義亭个歷史
同建築發展。歡迎大家繼續收聽，按呢好！
大家正來寮。

3.音樂：

1. 春風紙炮（羅文裕）、
2. 流浪（陳正航）、
3. 聲聲慢（吉娜）、
4. 娘花白白（Zoomie）、
5. 勇往直前行（許仁杰）、
6. 日頭客（東東）