2021-05-16 昌黎祠、杜君英墓

一、昌黎祠

上禮拜个主題係內埔天后宮，還有內埔仔樣會出現同時有昌黎祠、觀音廳、媽祖廟，結合儒教、佛教、道教共下个信仰建築。

內埔天后宮係1805年起好ㄟ，接等就在一滿昌黎祠个所在出現一間差唔多形式个書房，下後就變成昌黎祠。

大正2年1913年在媽祖廟同昌黎祠中間，起好觀音廳，將兩間廟宇結合共下。

唔古，大家對於昌黎祠奈久起个？滿人起个？

一般有兩種講法，一種係講：嘉慶八年(1803年)由鍾麟江倡建；一種係講：道光7 年(1827年)由武生李孟樹創建。

到底奈種講法正著，就係今分日第一个主題。

按照以上个講法，目前个史料淨淨尋得到鍾麟江倡建內埔媽祖廟个紀錄，同時也有講起第四擺出堆成功後，鍾麟江無像賴熊飛去做官，佢選擇歸到故鄉來服務鄉里，鍾麟江到底在故鄉服務麼个事呢？

下後，1811年發生福佬人占墾古令埔个衝突兩方開始打官司，前後打了4年官司大清官方判定，在1815年設立了這個封禁古令埔碑。

當時分大清禁止福佬人、客家人開墾个古令埔，大概就在一滿个阿馬灣，就係在萬巒鄉成德、赤山、萬金、內埔仔老埤一帶仔。

大家愛知得，大清時節係愛申請墾照，除了同官方有特殊關係个人，讀書人、有功名个人，過容易成功申請墾照。

涯想，這兜事情應該會刺激著鍾麟江等六堆主事者，開辦私塾書房培養六堆讀書人个動機；共樣个情形嘛發生在瀰濃、五溝水等地。

有紀錄講，鍾麟江在文昌祠創設祀典會，來資助教師和學子。

按呢講个話，鍾麟江所設置个書房應該係目前昌黎祠个前身，書房形式在前、廟宇信仰在後，也因為按呢昌黎祠一開始係起來做書房个，唔係愛用來作廟个，所以起呀唔係一般廟个形式。

大家不妨去看一下頭擺仔个書房，應該會發現在大清時節，一般書房也多有設立孔子聖像、文昌聖像、魁星聖像个情形，內埔仔可能係特別供俸嶺南宗師韓愈先師。

總講，盡有可能早期係供奉韓文公畫像，分學子朝奉敬拜。

一直到道光7年(1827年)李孟樹雕刻韓文公金身，發展為神廟供奉个形式，鍾麟江(1829過世) 當時74歲還在，結合文昌信仰同私塾正式安名昌黎祠，來參拜媽祖亦順續來參拜韓文公。

不過，當時應該還係以傳道授業个書房為主。

歷史文獻指出，道光年間，鳳山縣个進士過舉人大部分都出自六堆地區，昌黎祠个教育培養佔盡大个功勞。

大清時期對日據時期个六堆還成立了科舉會，提供分愛參加鄉試同愛上京會試个學子作旅費。

不過，下後因為三七五減租、耕者有其田个政策，昌黎祠个學田大部分分政府放領ㄟ，所以就無繼續來設立這獎學金、助學金ㄟ。

昌黎祠亦算昌黎書房，講得係當時六堆培養人才盡重要个基地，也培養出不少个人才。

根據《鳳山縣采訪冊》，嘉慶十五年（1810年）到光緒甲午年（1894年），鳳山縣客家人進士就有黃驤雲、張維垣、江昶榮三人，舉人有20人，貢生有19人，這批有不少都識在昌黎祠講學、就學，像這內埔竹圍村个江昶榮進士、長治舉人邱鵬雲、內埔歲進士邱國楨、舉人曾中立、曾偉中、李向榮等算唔得歇，就按呢昌黎祠講得係當時盡重要个教育中心。

其中，渡海來臺灣个邱國楨識在六堆天后宮前賣文房四寶，後來就在這苦讀到歲貢生，祠內留有佢著清朝五品官服个畫像。

做麼个邱國楨愛對中國渡海來台讀書考科舉呢？因為當時大清特別照顧粵庄人士，有所謂台灣粵籍生員增額錄取个名額，科舉考試會比其他省籍過有機會考取，莫講還有出堆軍功封賞个機會。

同一般各寺廟建築一樣，昌黎祠亦一段時間、一段時間就愛整修一下，昌黎祠身歷經鍾桂齡、管事鍾裏海、鍾貴元、李石華、邱贊臣等迭為補修，日治時期也曾作為鳳山國語傳習所內埔分教場，就係這滿內埔國小个前身，1912年再由仕紳劉金安等再重修。講到日本時期，日本統治末期受到皇民化運動个影響，眾人為到愛保存昌黎祠个建築就延請出家人來管理，有一暫仔識作為佛教个寺廟，這个佛堂就係在六堆天后宮過昌黎祠中間个觀音廳，就由佛門弟子來兼顧正做得保存廟體，一直到1987年證過恢復原本个文教功能。

二次世界大戰戰後，地址為內埔鄉內田村廣濟路218號。
1947年鍾梅貴聯合全鄉改建。

前面有講過，後來政府實施耕者有其田，祠方所有田地放領，教育資助亦只好停止。

昌黎祠在1973年，分政府列為國家三級古蹟，不過政府亦無提供經費來維修，無想著1977年7月底，堵著賽洛瑪風災昌黎祠个前殿續垮歇了。

下後內埔村長劉宴章過地方人士共同出資整建，將打檜木个柱墩改換作紅毛泥柱墩，壁扇也貼上瓷磚。

外牆亦從原底个灰色改為黃色，當地人看到變黃色，就有人怨嘆講改裝後个昌黎祠，失去了原來昌黎祠个客家風格。

1981年重建完成，當時个行政院長孫運璿曾親題「宗儒弘道」匾額以示慶賀。同年因為改建个關係取消古蹟資格。

廟方將農曆九月九日視為韓愈个聖誕日，在每年个重陽節這一日，都會舉辦祭典。

2001年開始，地方人士發起「韓愈文化祭」， 2003年屏東縣政府加入以後緊辦緊盛大，下後又再回歸內埔鄉公所來辦。

昌黎祠主殿祭祀的當然是韓愈，廟方與信眾稱為「韓文公先師」，兩旁配祀「韓湘先師」同「趙德先師」。

這「韓湘先師」係韓愈个姪孫，聽講就係八仙之一个韓湘子；這「趙德先師」還係韓愈擔任潮州刺史時个得力部屬。

媽祖廟、觀音廳、昌黎祠分別代表影響漢人社會盡重要个信仰，媽祖為道教、觀音廳為佛教、昌黎祠為儒教，三者連結合為同一廟體，儒、釋、道三大國教合一的廟體全台罕見，全然表現涯等客家鄉親包容胸懷，同對傳統宗教文化共存共尊的美德精神。

詳細看客家人个鑾堂，非常重視祭拜/這係道教、清修齋戒/這係佛教、閱讀經書/這係儒教，一般係參觀客家人个宗教活動，無像福佬人按澎湃盛大，但係講究禮俗周到頗具古風、文質典雅係客家个特色。

目前對昌黎祠个唇口轉入陽濟路，就會來到了「內埔老街」，其舊名為「陽濟院」，意思係講「羊仔聚共下个地方」。

一路上可以看到盡多个客家傳統老屋，論百年、歸百年个、百過年个老屋同揭仔，保留著當地居民生活个腳跡，行入這位就親像踏入了時光个山窿，歸到老頭擺單純个舊時光，一奈都係樸實惦靜个氛圍。

有時，看上去亦無麼个特別个老屋外牆，在盡多在地藝術家盡好个手路創作下，畫出一條青花巷，簡單个線條畫出老頭擺个客家生活、傳統農村个意象，還融入了韓愈个文學詩詞，變作一幅幅生動活潑个作品，這也係「內埔老街」底背一頁特別个風景。

二、杜君英墓

1721年官逼民反，檳榔林庄人杜君英係第一個擎起義旗，掀起台灣第一場民變：朱一貴事件，杜君英所歇个檳榔林庄就係今屏東縣內埔鄉个義亭村。
朱一貴事件兵敗以後，杜君英个老部將、從屬，有唔會少个人走來去番仔厝（就係今个屏東縣內埔鄉建興村）附近定居，將該莊頭安名安著杜君英莊。

下後，因為發大水庄頭紮人唔歇，所以檳榔林个庄民就遷徙到今屏東縣內埔鄉大和村來歇，庄民感念杜君英就在內埔大和庄這位為杜君英立了一座衣冠塚。

松崎仁三郎个《嗚呼忠義亭》有寫著：杜君英部屬將長官遺物埋在舊杜君英庄个榕樹下，墓牌高四尺四五寸、寬三尺餘，銘刻「杜國公之墓」的花崗石。

墓旁還起了一間義勇廟祭拜朱一貴事件犧牲个義勇。
每年三月十七會盛大个祭拜儀式。結果，1898年，因為隘寮溪發大水，杜君英庄再一擺發生水打庄居民全部散淨淨。

部分杜君英庄个庄民，又只好遷徙到新杜君英庄（今个屏東縣內埔鄉中林村），个當時還有舉辦盛大个儀式，也有做戲來謝神喔。

總講，1721原底歇在舊名：檳榔林(今个義亭村)杜君英个潮州鄉親，因為水打庄所以徙到舊名：杜君英庄(今个大和村)，1989年又再一擺堵著水打庄，只好又再一擺徙來舊名：新杜君英庄(今个建興庄)。所以，原底在杜君英所設个杜君英衣冠塚，也忝等了徙來新杜君英庄，繼續來參拜。

目前，大家係愛看杜君英墓同佢个信仰，就愛來到內埔鄉中林村坪腳社區保安機車行个後背。

墓牌頂高有寫「逆杜君英莊界」，在「杜」這隻字个頂高，唔知樣仔續又多加一點？

到底係寫差了？亦算係有麼个个特別意思呢？

聽講，這係後世个人感受著杜君英無限个委屈，多點一滴代表後人為杜君英个哀哉命運所流下來个目汁。
在這石碑个兩片還有題字：「...朱一貴之亂，有偽封國公杜君英者，粵之潮洲人也。其旗賊眾最雄，閩之賊俱忿恨之。於是，合眾攻君英。諺有云：十八國公滅杜是也...」。

麼个意思呢？

意思係講，分朱一貴封作國公个杜君英，佢係廣東省潮州府人，佢擎起个清天奪國个義旗、部將戰力最強，漳泉兩州个福佬人都非常惱佢。
所以，全部人合起來攻打杜君英，有一首詩文按呢講：十八位國公合起來攻打消滅杜君英。

這像伯公樣仔个杜君英墓，感覺起來根本講唔得係墓牌，个根本就係界石唔係墓牌呀！

可能原來杜國公之墓个墓牌斷真分大水打走，徙庄个時節就以逆杜君英庄个界碑作為伯公石，重點就係底背有杜君英三隻字，臨時臨節無奈何就暫時用這來做伯公碑石，可能拜呀拜ㄟ開始有靈感，順續仔升格起來做伯公，久了就按呢流傳到今，下後庄民也同杜君英立像稱神祭拜。

主持人：阿豐頭，今分日非常感謝大家共下來收聽講客電台/六堆insite/客家生活現場/六堆三百年个主題報導節目。

下禮拜禮拜日朝晨10：00到11：00
講客電台FM105.9，
歡迎大家繼續來收聽。
按呢好！大家正來寮喔！

播放歌曲：

1. 那三年/謝宇威
2. 葫蘆絲版一剪梅/費玉清
3. 林頂月光/黃珮舒
4. 凳仔/曾止妤
5. 尖尖纏/黃珮舒
6. 夢見/許仁杰
7. 少在那邊/楊程鈞