2021-04-11 六堆到底開庄幾多年系列報導(二)

1.主持人引言：清明過後係穀雨，前一駁仔台灣一奈燥束束仔，又堵到掛紙時節，各地一奈都有這火燒山。一來，青釉釉个山林一下仔就燒到烏索索；再講，缺水个時節正知得有水時節个好。養成省水、惜水、多重利用水个習慣，比較過重要。講到水，偎山區个荖濃溪向來就有不少个地下伏流水，大家就驚講抽伏流水，無辦法監看，可能會超抽造成地層下降、凹落去。阿豐頭想，屏東个大武山下个平地造林、滯洪綠帶个設置，無幾年就發現地下湧泉、水災个防治效果明顯。在上游、中游愛配合大量造林，淺層伏流水个引出，人工滯洪埤塘或者大湖个設置，沿山一帶、在地社區居民个自來水設置同改善，應該愛一併考慮，影響民生、產業、經濟个發展至關重要，斷真愛好好來規劃正做得。

 

2.六堆300年主題報導part2：六堆到底幾多年？

    上一集，同大家粗淺來講到，經過偎一兩百年个過程，平埔族人不斷地歸化做漢人，造成官方登記个平埔族人，族群不但無緊來緊多，人口煞顛倒緊來緊少。佢等1635年荷蘭時節就用稻穀、鹿皮來繳稅ㄟ，講起來平埔族人係開墾屏東平洋个先驅者，同時也係同客家人共下開墾六堆个功臣。從歷史發展个角度同影跡來看，應該有或者講應該不少客家人，係平埔族人所歸化來个；這一集，就來同大家分享幾種漢人來到台灣个講法，這部分係討論客家人來到屏東平洋形成六堆客家，蓋必要个前提。一滿，就來同大家分享漢人何時來台灣？

​(1)最早个記錄係：元末明初。​​在日本人紀錄的台灣島史當中，發現14世紀初、元末明初就已經有漢人在台灣活動了。

​(2)大航海時期。​​14 世紀晚期，朱元璋建立大明帝國，實行朝貢貿易同海禁个政策，不准外國商人來華自由貿易，也禁止人民出海活動，以全然避免斷絕沿海居民同海上盜賊來勾結，以維持治安。

(3)顏思齊跟李旦。佢等算係16世紀末到17世紀初、明朝末期時代航海做貿易个人。後來顏思齊帶等中國沿海漳泉地區个3、4000人，來到台灣雲林建立庄頭水林庄（開台第一庄）正定居在台灣。大家所知个郭懷一也係顏思齊帶來个人，他們就定居在台南个安平地區。

​(4)17世紀中荷蘭時期。​​荷蘭人對1624年開始係二元統治、分化政策治理台灣。當時台灣个住民，一个係原住民，一个係來台灣做農事開墾个漢人，荷蘭人採取不相同个統治方法，形成二元統治个方式。對付原住民，先採取武力鎮壓，然後按照原住民各社不相統屬个狀況。1635年聖誕節之役，荷蘭人在大崗山之役大敗馬卡道族過後，台灣个平埔族就開始愛向荷蘭人繳稅，逼得平埔族人放棄游耕，開始墾殖荒地種旱禾繳稅。​​對付漢人，荷蘭人一方面營造適於漢人農墾環境，同時採取向漢人揀稅、抽稅个方法，減輕行政成本同實行經濟个控制。另外一方面，荷蘭人集中漢人在某些特定个區域肚，安排漢人中的有力人士協助統治。也有文獻顯示，有大概3000零來自於客家地區个甘蔗工，在个當時分人召來台灣。

​(5)17世紀个明鄭時期。​​1661年，鄭成功登陸台灣，逐走荷蘭人後進行行政區域个規劃。明鄭時期个營盤田制度。因為大軍入台，軍糧一等个不足，所以鄭成功頒布開墾个準則，將荷蘭人个「王田」改為「官田」，同時也鼓勵私人招佃墾殖，特別注重寓兵於農个兵屯政策。由駐守在各地个營丁開墾附近田園，自耕自食，這類田園就安到「營盤田」。

(6)清初時期。1683年​​施琅攻打鄭成功以後，康熙帝正式將台灣納入中國領土，開始有大量漢人來台開墾，而因人數太多因此在1684實行渡台禁令，簡單講內容个意思係

第一，做唔得偷渡來台，係愛來台灣必要申請照單、路照。

第二，愛渡臺者不准攜帶妻、子、家眷，比較過早之前已經渡臺个，亦做唔得歸去中國帶人過來。

第三，禁止潮州惠州之地个人渡臺。

    客家人分布个地方，有汀州府(漳州客)和潮州府鎮平、平遠、程鄉三縣(其實，饒平縣也有一半客家人)个客系，還有惠州个海豐、陸豐，閩南个詔安、平和、東山縣等地方。按這歷史，在荷蘭時期就有不少潮州人來到屏東平洋。再講，禁令頒布前在台灣个漢人底背，對明朝中期以來、荷蘭時期、明鄭時期到大清初期，敢講完全唔會有半位客家人來到台灣？莫講，荷蘭人招募个工人、明鄭時期个兵將、大清个官兵底背無半个客家人？這一段一兩百年个期間，敢講唔半个客家人來到台灣？敢講無半个客家人會留啊台灣？

總講，歷史本來就唔係單淨一種可能定定，也唔係單淨一種面相定定。下禮拜就由主持人阿豐頭同大家分享，客家人來到屏東平洋開墾、發展六堆个幾種論點。

 

播放歌曲

1. 許你一片麥田(少女卡拉)
2. 讓愛飛翔(方寧)
3. 半心（湯宇歆）
4. 戀戀路邊花（曾仲瑋）
5. 大小獵人（一好・力夯）
6. 把燈關上（吉娜罐子）