2021-05-30 美濃个開發史(二)

1.主持人引言：

阿豐頭愛來同大家來討論，美濃个開發史。
當然資料唔係阿豐頭尋个、研究个，還係主持人阿豐頭根據專家學者个研究，所整理起來个資料。
所以盡感謝多多个學者專家按煞忙研究寫作，今分日个節目，就由阿豐頭同大家來分享，美濃、龍肚、廣興、中壇、南隆地區个開發史。
 
2. 武洛開庄
 
愛開始講高樹庄開庄歷史進前，愛同大家再一擺補充紹介阿里港个武洛這個地方。
因為瀰濃、高樹个先民，就係對阿里港武洛這個地方出發个。
前面有講起，武洛這地方原底係馬卡道平埔族武洛社个所在，武洛就係漢番个隔界所在。
大概在康熙年間1706年左右，有粵東客家移民向武洛社承租土地開墾，開墾出上武洛庄、下武洛庄，加加起來最多个時節有兩三千戶；武洛就係當時六堆客家地區，最北片个客家庄頭，亦就係右營、右堆。
除了客家人以外，當然也有福佬人來這開墾，不過後來來到這位个福佬人緊來緊多，客家人也因為種種理由大量遷徙出去，這滿還尋得著下武洛庄/今里港載興村，大概係姓鍾个有百過戶左右。
因為，上武洛庄早年不時會堵著水打庄，所以已經遷徙淨淨ㄟ。
原底在這地方个武洛社平埔族人，因為在乾隆末年執行屯番制，屯番制就係將番民遷徙共下集中屯墾，一方面保護一方面管制，所以這滿在阿里港全然尋唔著平埔武洛社人。

講起，阿里港个武洛庄，大清初期就係六堆唯一、也係最北片个客家庄頭，不得不向外遷徙个壓力有三：第一，係開墾兩三十年，人口漸漸多了，耕地明顯已經不足。
第二，上武洛庄水患嚴重，不時會發生水打庄，紮人唔得。
第三，閩客衝突越來越緊張，打打殺殺緊來緊迭，武洛相對同六堆客家庄過無相黏，另謀出路可能正係上策。
好得，乾隆初年，武洛客家有幾位平亂有功个義民頭人分大清封作千總，有官銜在身同大清政府就講過有話，所得先民就帶等各姓人等，向北去瀰濃社、向東去大澤磯社來開墾。
不過也引發著福佬客家个尷尬，兩片打無睹好。
一方面有這大清官方个支持，又再加上當時。

這滿，請各位觀眾朋友，忝等阿豐頭來到老頭擺个高樹。
个當時，高樹同阿里港/就係今个里港，高樹、里港之間原無麼个河壩來阻隔，兩個地方來來去去一等方便順暢。
大清初期識派過縣官駐守阿里港，當時福佬人、客家人就共下開發阿里港。
就按呢，客家頭人就帶等客家先民，以武洛為根據地分別向美濃、高樹、大路關等地開墾。

3.高樹這个地名樣仔來个呢？

第一種講法，講哇是，大清康熙時期阿里港个武洛就係番界，阿里港向東過去、向北過去，就係原住民Ta-Ka-Ki社个領地喔。
所在。高樹就在阿里港个東北片，當時還算係番界，歷史文獻也有寫著講：早期客家先民，開墾之初斷真係先同平埔族業主濮地來耕種。
所以，就有人講：因為，頭擺仔高樹這個地方老地名安著Da-Ka-Ki，大清時節安著大澤磯，就係平埔族Da-Ka-Ki社个名仔。
Da-Ka-Ki、Da-Ka-Ki念起來同日文ta-ka-ki聽起來會像會像，ta-ka-ki日文個意思就係高樹个意思，所以日本時代就將這位安著ta-ka-ki高樹。
第二種講法，講哇是，因為以前高樹庄頭有一頭盡高盡高个木棉樹/ㄤㄤ仔樹，這頭樹仔比一般个樹仔都還過高。
唔單淨按呢，這頭生啊盡高个木棉樹，樹頂還親像車輪仔、亦算紙傘仔，有18趴个樹趴圓圓按呢打開來。
因為這頭又高又大个樹仔，所以後來就安名安著高樹。
兩種講法，聽眾朋友聽看吶是，汝感覺奈種講法會過有影呢？

高樹，這個地區一開始係福佬人个租地，舊地名安著大澤磯，係平埔族大澤磯社人个傳統領地。
就係講，一開始向大清政府申請到大租个業主係福佬人。

一般來講，這兜所謂个業主根本都無在个耕種、亦無參與開墾，業主就淨淨開館招租，再同佃農收穀來繳租分大清政府。
乾隆初年，客家先民對武洛過來大澤磯這位，一開始係先同福佬業主濮田來耕，所以當時這位也有福佬人過來開墾。
汝係認真來看高樹鄉，就會發現高樹个客家庄頭，大部分係在高樹个中部，偎南偎北个部分還係福佬人个庄頭。

係講著高樹个庄頭地名，不時都會出現老庄、新庄、舊庄个分別，一開始大家都會搞毋清楚，這係因為，高樹鄉為在大武山下，講得係4條河壩一出山沖出來个三角洲，山肚裡沖啊出來个河壩水，河壩水會這徙个徙、一下走東一下走西，所以就有盡多地方安著浮覆地，平常看吶去係砂埔地耕種个良田。
有時有日落大雨發大水，河壩一徙位過來就變成河壩，麼个都分大水打淨淨。
高樹係三角形个地方，北片係對六龜過來荖濃溪、東北片係對山肚下來對大津出來个濁cug口溪，下後濁口溪流入荖濃溪，共下流向西南片。

在這滿廣福、廣興个東片，南片有這對口社流出山个口社溪、過對三地門流出山个隘寮溪，下後口社溪又匯流入隘寮溪。

對北片、東片過高个山地拚下來个大水，山肚沖啊出來个河壩，山洪一爆發不時都會發大水、發生水打庄个情形。舊个庄頭、老个庄頭無歇哩，就只好徙位重建家園再過建新庄。
這滿高樹鄉純个客家庄有：東振、東興、高樹、長榮、廣福、廣等六個庄頭，客家人同福佬人歇共下个有：大埔、菜寮、新豐、建興四村。
東振、東興合稱老庄(東振新庄)，係高樹客家最早開墾个所在。

下後，老庄賭著水打庄，所以就有唔會少人徙去隔壁个高樹、長榮。
所以，東振、東興、高樹、長榮个庄民，等同係共樣係老庄(東振新庄)人，就係當地客家人个四大庄頭。
早期這四大庄頭有連庄祭祀个例規。
像這東振開基榕堂伯公，在乾隆3年西元1738年起好个伯公壇。

係最早期對武洛徙出來个18姓人，最早落腳个地方。當時有：楊、梁、葉、賴、何、涂、鍾、黃、廖等18姓人，先對武洛徙去鹽樹庄，因為水打庄再徙來東振建庄，東振過去就安著老庄。
下後，庄民在西柵門起這間伯公壇，就係這滿高樹榕堂福德祠个前身。
今價，每年本本會辦理聯庄祭祀，時代改變之下可能無像頭擺仔案鬧熱，但大體上還維持一定个穩定度。

4.高樹開庄歷史

這滿高樹个客家人，有最早期乾隆出年來个，有大清時節第二批來个，有日本時代對新竹徙下來个，有忝國民政府來台个，亦有對美濃徙過來个，最歷尾來个印尼客家新娘。
這滿，阿豐頭就詳細同大家說明一下：乾隆2年(1737)，武洛个客家先民有18姓人，移民來高樹个東振、東興、廣福等村以後。
發現高樹地區還有盡大片荒地無人開墾，所得就歸去原鄉召集梅縣、蕉嶺、大埔、惠州一帶个客家鄉親前來開墾。
今高樹鄉有高樹村、長榮村、東興村、東振村等四庄庄民，祖先大部份都係廣東梅縣、蕉嶺來个。 

日本時代昭和二年(1927)日本東亞興株式會社，為開墾高樹鄉北片新豐村个荒地，就招募新竹州个客家農民來這開墾，同時建立了新豐村个尾寮、凹湖、中興、大山寮等客家庄頭。
民國三十八年(1949)後有少部分随政府撤退來台个中國大陸客家人，徙來高樹鄉：
民國三十八年後有少部分隨政府退來台灣个中國大陸客家人，其中有盡少數个分政府分配到高樹鄉，作公務員、警察、教師這兜工作，因為工作關係或者婚姻關係，
下後就落腳定居在高樹鄉。

最近个一兩十年來，有不少印尼客家細妹仔嫁來高樹，因為高樹主要係農業鄉鎮，留啊在高樹務農个部分成年男子，想愛在當地討姐仔，實在無按簡單。
主要个原因，係今個細阿妹仔，大概都去市肚仔發展，無人愛歸到鄉下生活，就莫講還愛佢等歸來鄉下作農事ㄟ。
就按呢，高樹唔會少个後生仔，只好透過仲介討外籍新娘作姐仔，尤其係共樣對大陸徙出來个海外客家後代。
因為，大家語言風俗相近，最優先會選擇比較過容易溝通个客家係妹仔，尤其係歇在印尼加里曼丹，娶當地移民後代的客家女子為主，其中高樹鄉个廣福、廣興兩庄个後生仔，討印尼客家新娘个又比較過多。
不過，近百年來，亦有一部分个鄉親係對美濃徙過來个。
這係因為高樹、美濃同屬六堆，早期荖濃溪主流在「水流東」時，高樹與美濃間一帶水路交通無礙。
就算係「水流西」之後，高樹、美濃中間隔等荖濃溪，兩地之間个來往還係蓋密切，高樹美濃兩地庄民婚嫁親親戚戚，亦算因為農業合作、工商業个關係，就對美濃徙來高樹的高樹、長榮這兜街仔、市中心。

5. 高樹地理：十年河東十年河西荖濃溪

自古以來高樹這個地方，東片就係高高个大武山脈，一路向里港九如降下來。
高樹个北片有六龜出來个荖濃溪、大津出來个濁口溪，下後濁口溪匯入荖濃溪；高樹个南片，有對口社出來个口社溪、山地門出來个隘寮溪，下後口社溪再匯入荖濃溪。
下後，荖濃溪同隘寮溪，這兩條大河壩在里港匯流共下流入高屏溪。

高樹就係，荖濃溪同隘寮溪兩條大河壩，所切割出來三角形地帶。
唔古老頭擺个時代，高樹个河壩唔係生啊像按呢喲！
高樹有人講：十年河東十年河西。
講个就係：荖濃溪。

這滿大家看著个荖濃溪，主要个河道係對六龜出來經過新威，到大津濁口溪匯入荖濃溪以後，就向西片轉彎流向龍肚、美濃方向，再一路來到里港流入高屏溪著無？
唔古170年前左右，大概在大清咸豐以前，荖濃溪是唔係按呢流个喲！

關鍵係在這大津這段，就係大津水沖个位，這段就係濁口溪匯入荖濃溪个地方。
係硬硬愛來形容个話呢，這地方有兩扇門，原底對北片下來个荖濃溪流到這，等濁口溪匯入以後呢，
本本還係繼續向南流，流過凹仔，經過阿拔泉(今高樹源泉社區) 東片，再流過加吶埔(今个泰山村)西片，
最後流入口社溪。大約是來講，就係這滿高樹沿山公路二段同沿山公路三段个路線差唔多。

總講，170年前个荖濃溪係對高樹个東片偎山一帶向南流向口社溪个，這个時代就安著水流東-荖濃溪流過高樹東片个時代。
大家一定會想，嘎个下高樹同北片个瀰濃唔都黏共下，無荖濃溪這條大河壩隔開？
非常正確！所以，做麼个龍肚人會講，涂百清先來到大路關以後，因為當時福佬人、魁儡仔盡惡，所以下後再去龍肚開墾。
資料顯示，清乾隆中期同林爽文之亂後,有平埔族塔樓社及新港社屯番,駐屯於加蚋埔及舊寮、隘寮等地，所以清乾隆年間高樹鄉係福佬、客家、平埔族民相爭開墾个所在。
所以，先來到高樹大路關个客家先民，唔向東、向南，選擇向北片个龍肚發展，看起來也一等合理。阿豐頭想，當時雖然無這荖濃溪个主流隔開，但係應該多少會有細河壩仔。
不過，大家也可以想像170零年前，當時高樹个北片偎瀰濃个所在，一片平洋一定盡多人在這耕種、起庄頭生活。
這是唔係阿豐頭亂講个喲！

有證據可以證明。首先，台灣方志這本書記載，荖濃溪最早个名仔安著大澤機北溪,所以現今高樹當地人也喊荖濃溪安著北溪亦算北河。
《里港鄉志》底背老頭擺个地圖上个荖濃溪，就係分人安著大澤機北溪。

再來，乾隆時期个資料有記載下淡水溪个大澤機溪,頂高寫著這下淡水溪流過个路線，有經過大澤機社(高樹)、塔樓社(里港)、阿猴社(屏東九如),可見當時个下淡水溪係流過高樹東片，再順地勢向南流，然後再流向西南片,同對口社出山个武洛溪匯流後,由東向西南流到經阿猴社領地冷水坑/今九如附近匯流出海。
荖濃溪溪水對東片流過高樹个時節，高樹同瀰濃中間無大河壩橫隔，講得係共一塊土地个樣式，共同偎靠大澤機北溪/今个荖濃溪水來耕種，荖濃溪西片个所在，講得係一大片个良田。
水流東時代，一般高樹的聚落地受荖濃溪之水流影響最大,大約在雍正末年、乾隆初年，客籍移民廖亞元開挖舊圳(又安著：老圳、舊寮圳、北溪舊圳)，對六龜引荖濃溪水灌溉，下後客家先民不斷在這開埤作圳，開墾出一下百甲个良田。一直到清咸豐、光緒時期，開始轉向「水流西」,經一下擺个山洪暴發、發大水,荖濃溪个主河道開始穩定向西流過龍肚、美濃方向了。
後來个政府也不斷來做、來加強這駁棚、堤防來擋大水，避免到荖濃溪再來氾濫。

或者大家有閒可以去這沿山公路二段到三段，體會一下老頭擺大澤磯北溪/就係荖濃溪水流東个時代。

6. 荖濃溪河道改向

大概在170零年前，在這大清咸豐年間到光緒年間，荖濃溪个主要河道開始轉向西片流過去，開始所謂个荖濃溪水流西个時代。
就講，從山肚出來流經六龜區个東片進入高樹鄉,本成向南流个荖濃溪河壩,續轉向西南片流過去。樣會按呢嗕？

荖濃溪做麼个會轉向嗕？
根據地方耆老曾祥華先生，講起一段老頭擺个故事：
就係講這條濁口溪，本成係注入荖濃溪个支流，原底濁口溪个水量就無講蓋大。
聽講有一擺呢，因為上游个山區落盡大雨，續造成濁口溪發大水、山洪大爆發，濁口溪注入荖濃溪个山洪，續將這荖濃溪个河床沖出一個大缺口，連梆帶扯硬硬將荖濃溪个主要河道，轉向六龜美濃方向來流過去。

就地球科學上个知識來看，應該唔會一擺就會造成河壩改道。
可能對山肚流出來个荖濃溪、濁口溪，本成就帶有大量个泥沙，早期水向東流時期就不斷堆積在老河壩底，造成河床不斷屯高个現象。

應該係經過个擺關鍵个大水以後，對六龜出來原底穩定向南流个荖濃溪，開始轉向西片流。有一段時間，水流西、水流東、甚至溢流一奈流，再經過幾擺大水，向西流个荖濃溪越切割越深，水就集中向西流，就變成了主要个河道。

原本水流東个荖濃溪舊河道,續變成非災區个河川浮覆地,形成新个墾地。就係今價涯等看著个樣式。
當然，每擺係賭著發大水，這還算新發展出來个河道還本本唔穩定，不時又會走歸來向東流時節个河道，對咸豐年間到日本時代，時不時都造成水打庄，造成在个開墾个庄民盡大个損失。
後來政府在高樹濁口溪匯入原荖濃溪个地方，設置了大津堤防舊寮一號堤防,又再沿荖濃溪岸加築舊寮二號堤防、東振新提防,一擺又一擺多次整修成非常堅固个堤防,正有辦法阻擋了歇荖濃溪可能水流東个水勢。
荖濃溪水流西以後，大約在大清嘉慶中葉左右，由陳陶蘭引濁口山个溪水開挖而成新圳(又安著濁口新圳),可灌漑八十零甲个田丘。
舊圳同濁口新圳主要灌漑舊寮、東振新、高樹下一帶，形成兩個灌漑系統个生產空間。
兩條水圳系統灌漑个區域，主要係客家人佔有个所在,因為水源充足大概都種水田。
在大清時代各族群為著爭奪灌漑水源,不時都會發生小規模衝突。
搶水、掌水、輪番灌溉，一切都係為著珍貴个水源。

7.播放歌曲:

1. 當慶（阿Kim）
2. 山與田I（謝宇威）
3. 毋多知（黃珮舒）
4. 屬於我的地方（邱幸儀）
5. 山脈（黃瑋傑）
6. 娘花白白（Zoomie）