2021-06-20 李受事件、「義民」對客庄意義的轉折

1.主持人引言：

上回節目中，同大家簡單來紹介說明張丙事件，張丙事件做麼个按重要呢？
因為，張丙事件中大清官方所指个南路賊許成、張林等，所作亂个地方就在鳳山、下淡水溪，六堆客家庄个所在，又喊出將滅粵民作為口號，引爆著台灣地區客家人、福佬人中間，累積盡久个尷尬同矛盾。
許成外號大肚，原底係內門觀音里人。

做麼个會喊出”將滅粵民”愛仇恨个口號呢？
 
2. 本週議題──李受事件、「義民」對客庄意義的轉折

實在講，照這大哥張丙、北路賊黃城、南路賊許成个所作所為，打打殺殺之間，有看著同官方打啊一等濃注，下後亦發生搶劫擄掠街市个情形，顛倒無盡明顯同客家戰鬥个紀錄。
顛倒係阿里港莊馬力、高樹新庄仔有明確个閩粵戰鬥。
其他个地方，像這東港、林園、萬丹、阿猴城、雙溪口，甚至係遠到焦吧哖个福佬庄，都傳出六堆客家軍焚搶、殘殺个紀錄。
甚至，將六堆軍个行動看作係另外一股趁機作亂个亂黨，安著李受事件。

【歷史大前提】

探討歷史原貌以前，有幾點背景資料先同大家說明：
    首先，六堆軍每一擺出堆，都會分福佬人賴講係亂黨。
    根據歷史文獻个呈現，六堆客家每一擺出堆都難免遭受福佬人个控告，每一擺都會講六堆客家軍係亂黨，對朱一貴事件開始就按呢ㄟ。
    再來，大清政府並無完全信任義民，對於六堆客家壯大也有戒心。
    主要个原因係，因為義民唔係正規軍，臨時組成底背難免摻著遊民、淨想愛趁機報仇、搶奪財物个惡徒。
    而六堆客家庄頭高築城牆自成一國，有精良武器、甚至槍械火炮，不但分附近个福佬庄驚，亦分大清盡煩惱會失控。
    第三，當時大清考察民情，認為有必要彈壓六堆客家義民个氣勢，以免六堆客家繼續壯大，造成政府另外一種壓力。
    所以，就算過去每一擺出堆，難免都有藉機會公報私仇、誤傷人命个情形，大清不但唔會懲處六堆軍，還會按公論賞；這擺，應該亦有相同个情形，但唔相同个係大清續打算順勢打壓客家。
 
【六堆客家軍/李受事件】

當時台灣知府已經在十月初二分張丙弒歇哩。
所以，代理知府王衍慶就負責在中國救兵來以前，處理相關个亂事。

王衍慶代理知府在10月12日發出公文分六堆客家，要求六堆組織義勇軍遽遽逐去台南府城，聽候差遣。
收到王衍慶个公文，六堆就在忠義亭會議決定推選舉人曾偉中為大總理、監生李受/李定觀為副大總理，各庄愛分攤勇壯、石鼓/就係軍糧，等平亂以後各庄還愛繳分義軍600石米作為犒賞。

特別刻了一粒印仔，頂高寫「粵義首總理李曾」，開立六堆各莊收發石穀个字據以昭公信。
等著各堆石穀、勇壯到齊，另外再拜託廖芋頭做台灣府義民旗共6面；然後，10/23日就在忠義亭迎奉聖旨牌、祭天稟報奉旨出堆平亂。
因為，10/23日堵好許成、林海焚劫東港，感受著匪亂已經打到家門，又擔心將滅粵民針對客家庄為對象，驚怕福佬庄群起響應客庄危險。
義軍就決定暫時莫去台南府城，先打理眼前个戰禍再打算。
便立馬出堆東港平亂，許成、林海賊眾打唔過，就轉向林園、萬丹、阿猴城，然後去到鳳山埤仔頭準備攻打縣城。
許成所到个地方都係福佬庄，有福佬人驚到避逃，也有福佬人響應，
其中唔會少百姓其實係為著保全身家性命，不得不表面響應。

10/28日，探著許成、林海分兵去攻打縣城，六堆軍趁機發動中軍、前堆、左堆軍，攻擊林園、萬丹、阿猴城等地，所到庄頭也堵著許成、林海留守部眾个強烈抵抗，六堆軍為求免除後患採取強烈个手段鎮壓，除了捕殺匪徒亦大量焚搶福佬庄頭，免得未來再起兵危害客家庄。
這過程中，有福佬人向王衍慶報告客家義軍焚搶福佬庄个情事。
所以，代理知府王衍慶就授命粵庄進士黃驤雲主事，愛遽遽警告並約束六堆軍不可侵擾福佬庄頭。

官拜五品个黃驤雲進士，本底細美濃竹頭背人，因為阿姆過身歸來守孝3年，當時堵好在台灣。
顧慮著平平六堆客家人，也因為上級命令，就開始來聯絡六堆軍个曾偉中大總理，同時也一奈貼這告示宣布不可侵犯福佬庄。
台呼許成个部眾打縣城無成功，有一股響應个群眾退守在阿里港由莊馬力來帶頭，10/29日決定報復性攻打高樹新庄仔客庄，一方面也來牽制六堆軍，掩護許成、林海10/30日攻打縣城。
無想著，許成攻打鳳山埤仔頭竹圍个時節，堵唔了縣城用大砲攻擊兵敗。
林海，分官府捉著用亂石砸死。

另一方面，高樹个新庄仔分人圍攻幾日以後，派人突圍去六堆討救兵。
六堆軍收著新庄仔討救兵个消息，就開始研究樣仔來解圍。
李受認為直接打新庄仔唔係上策，應該愛圍魏救趙直搗黃龍，一支擔竿通到底，直接打福佬人个大本營阿里港，一方面可以解救新庄仔，一方面又可以趁虛攻破阿里港。
同時，也可以大傷福佬人元氣，牽制等攻打縣城个許成。
所以，就召集大路關、內埔仔个義軍，再請番刈楊石老二聯絡山豬門社勇壯，11/10日攻打阿里港个福佬大本營，同莊馬力所帶領个福佬人大軍激戰，下後六堆軍攻破阿里港及附近小庄，激戰焚搶非常慘烈，造成阿里港勇壯平民兩千零條人命亡故。

11/10日同時，許成又再一擺攻鳳山埤仔頭，再一擺分官府來打退，只好避走臺灣縣界。
李受再命令瀰濃庄義勇乘勝追擊走到台灣縣溪洲庄、番薯寮、鳳山水底寮、大樹腳庄个餘黨賊人，打著奈庄還係採取堅壁清野，焚燒草糧斷絕民間救濟，分賊眾無辦法堅持，亦造成唔會少个傷亡。
許成本底就係內門觀音里人，攻打縣城失敗以後就屏歸羅漢門，12/02許成起兵攻羅漢門汛，想愛搶奪兵器火炮，同時以羅漢門來做基地。
對12/02打到12/08，當時亦有杉林、旗山蕃薯寮、內門、平埔族人組成義軍，來襯手抵抗許成个進攻，義首劉元明過義民共有51名犧牲。
根據，大清个資料顯示，這段時間李受又會同瀰濃庄勇壯，在這个時間攻打連界嘉義之噍吧哖福佬莊，有影唔影唔得知。

總講，12/02李受分台灣府成副將謝朝恩設計捉起來，關在監獄肚仔；客家眾人就按呢散走淨淨。
12/07大清福建省陸軍總鎮馬濟勝督兵來到鳳山，按算勦平南路賊。
賊眾在二喃溝同官兵抵抗，分馬濟勝打敗。
12/08日台灣府副將謝朝恩捉著許成，打死蔡臨，南路亦平。
歸隻張丙之亂可以講就到這為止。

問題係，副大總理李受續在12/2日分大清官方捉起來，做麼个愛捉佢呢？
到底李受犯了麼个罪呢？
這个問題講突然亦無突然，應該在代理知府王衍慶指定黃驤雲主事管著、調解六堆軍个時節，就開始有這種影跡ㄟ！

【那一邊的敵軍】

主要就講，阿里港个福佬庄民，向縣官來投告六堆客家軍，內容係講李受等徒眾，假借台灣府義民个名義，打等義民旗搶劫福佬庄、放火燒福佬庄、烏白亂殘害福佬人，造成盡多無辜个百姓財產損失、性命傷亡，尤其其中有盡多還係無力抵抗个婦女細子。
大概焚搶了70零个福佬庄，淨淨阿里港就造成2000零儕人死亡，福佬人頭官府講客人所造成个傷害混亂甚至還惡過亂匪。
事實係唔係按呢？
老實講無人知。

總講，過去每擺六堆出堆平亂，每擺都會受到福佬人个指控、投告。
講起來，當時台灣亂个時節，客家盡大盡強；平時呢，福佬人人多錢多關係好，福佬告官就加盡有力。
不過，對第一擺以來，大清官方總認為，平亂作戰枉殺一二、造成財物損失總係難免，也係情有可原做得體諒。
再講，六堆客家自家募款助官平亂，自然值得獎勵。

不管係客家義民、其他族群義民，多少都會有不受教个、以公謀私个亂民，甚至於藉機報冤仇、集體仇殺，亦不少見。
不過，六堆客家經過歷屆个出堆，每擺福佬告官都唔成事，張丙之亂又一開始就大喊官府不公不義、詐客人轉，接等ㄟ又有許成喊出將滅粵民，公開挑戰客家人、福佬人个敏感神經。
難怪，台灣代理知府王衍慶會甘黃驤雲主事警告六堆軍。
不過，李受指揮下个六堆軍蓋像無聽落去。
結果，福佬人告官。

在陸軍總鎮馬濟勝个支持下，要求負責協調个黃驤雲，愛甘六堆軍尋出300名人犯食罪，係無絕對唔放六堆客家束！
大家想一下，黃驤雲愛樣葛煞？

【黃驤雲】

    張丙事件期間，
代理知府王衍慶諭令當時堵好歸台灣服母喪，鳳山縣在籍主事黃驤雲，甘佢定著愛寫信曉諭六堆莊民，萬萬不可生事。
黃驤雲也緊緊寫信來分六堆軍，有嘴講著無嘴，拜託佢等絕對唔可以藉機攻打焚燒福佬庄。
奈知得，李受根本都聽唔落，本本堅持愛堅壁清野，愛斷絕福佬亂黨个援助，正唔會日後又來危害客家。

雖然講這種戰法有佢个道理，但造成對福佬庄个傷害甚至比亂黨還過嚴重；下後，大總理曾偉中知得這事情，認為李受已經不受控制了，就挖去義軍官印上「粵義首總理李曾」个曾字。
就因為按呢，曾偉忠正有機會免去現場處死，解送京城接受審判。

後來福佬人認為就係因為客家軍手上有公文命令，所以正會按橫按敢，也賴係黃驤雲主事同六堆軍偷來暗去。
好在，台灣道平慶親自南下觀察，尋著當初黃驤雲主事寫分六堆軍个親手書信，正平反冤情還佢清白。
黃驤雲為著表明心跡，就將佢姐仔送去郡城質官，自家隨等官兵親赴各莊，出錢買通線民，搜捕匪犯不遺餘力，又再捐買穀石，發放分無家可歸个貧民。
福佬人同官府要求六堆軍愛繳出300名罪犯，係無唔放客家人束。

黃驤雲經過三隻月總算尋出106儕罪犯，副大總理李受在忠義亭當場處決，大總理曾偉中解送中國審判，不過行到浙江就分人毒死了。
黃驤雲全力協助官府，盡量減少食罪个人，也緩解了閩粵之間个結怨仇殺。
唔古，福佬人又告佢叔黃英伯係作亂个賊首，雖然講黃驤雲證明佢叔風濕無才情行動，不可能擔任義首。
還係分人要求，定著愛交出人犯時，最後不得不其長工黃霆三、幸阿双二人來頂罪，避免牽連著更加多無辜个人，事後也在瀰濃廣興庄設安樂壇來祭拜這兩名家丁。
    確實為難，
連黃驤雲自家个家人都只好按呢處理。
不過就算按呢，黃驤雲的行為還係無得著六堆民眾个諒解，用諺語來諷刺他︰「上庄金團真無情，帶起官兵捉粵人；殺了幾多青頭子，害了幾多好漢人。」
下後，黃驤雲只好遷徙去苗栗頭份，遠離家鄉个是是非非。

光緒年間宋九雲所編纂
《臺南東粵義民誌》
描述六堆客庄認為當時福建陸路提督馬濟勝受賄，才冤屈曾偉中及六堆義民們，才使得六堆人原本為支持政府的態度，經過李受事件大受打擊，不再積極地出堆，造成日後六堆與官方關係轉變之重要因素之一。

【再訪紅白廟】

相關文獻表示，李受/李定觀為監生，等同有秀才个資格，做得有應鄉試个資格，係一位穩重厚道、頗諳時事个人。
一个還有大好前途个人，實在講，會烏白壏黲做斷真無必要亦無可能。
再講，係有看過大清官方紀錄个人，馬上就會發現內容肚，從頭到尾就將李受寫著像罪大惡極个土匪樣仔，問題係：六堆客家係集體、聯庄共保，長期經營个嚴格組織，敢有可能任裁李受按呢做？按呢亂舞？

壞就壞在六堆軍第一時間自主決定留在下淡水溪平亂，可能當時確實有必要按呢做，但係一來無聽王衍慶个軍令去府城報到，亦無去同馬濟勝會師，就連縣城亦無去救，等同全然無同大清官方接觸、共同作戰。
除了一紙調兵个公文，所謂个台灣府義民資格，等同無同官方企共下背書，難怪一上法庭就只好看官方面色，任裁人樣仔看樣仔講。
六堆第六屆个出堆，不管係張丙事件个發生、許成喊出將滅粵民，將本來就緊張个閩客關係，推升到強烈對立衝突个狀況。
再加上，福佬、客家因為福佬人地方人士、有權有勢者集體強烈个告訴，大清官方个立場開始改變，唔像過去大清官方按支持六堆，所得不採納六堆軍个解釋，放大六堆軍隊福佬庄制壓个行為，為假借官方名義焚搶，趁機作亂集體械鬥，安名為李受之亂。

另外，將福佬方面、客家方面死亡者个骨骸分別撿就集來，由官方出錢在阿里港个起一間祠來祭祀安撫。
福佬人个安著紅廟，客家人个安著白廟。

講起紅廟係祭祀福佬亡者个祠堂，原名安著「萬人塚」，後來庄民認為這个名仔，會造成越死越多人，所以就改稱「男女壇」，下後為著同祭祀客家死者个白廟來分隔，再改名安著「紅廟」。
紅廟原來位於今日里港鄉過江村下淡水溪个堤防，1923年因為不時會淹水所以遷徙進庄內。
紅廟曾得到清廷送伊等論十甲个祭田，但相傳因為有村民擔任此廟管理者，家族中就會雞犬不寧，所以最初沒有人願意管理，一直到臺灣日治時期，日本政府指定藍高全（藍高川從弟）負責，其後就由里港藍家奉祀。
講起白廟係祭祀客家亡者个祠堂，對里港人而言，白廟所供奉的客家先民相當於仇敵，過去也沒有什麼人管理或祭典，直到志伯仔去世後才改變。

志伯仔係在臺灣日治時期，有一名脾氣古怪、又精通醫術、暱稱「阿志伯」个人在白廟居住，經常為村民免費治療，還醫好庄長菊山計次郎个賴仔。
所以，菊山庄長曾重修過白廟，將把散落的無主骨骸集中安葬在這。

白廟在現今里港鄉過江社區活動中心旁，與紅廟相距約三、四百公尺。
志伯仔過身以後，村民就將廟改叫「白志廟」，為其雕塑神像安座奉侍，下後也成立了「白廟公會」个祭祀團體，這間廟个香火正慢慢興盛。

每年五月節前夕，當地鄉民會在此辦桌，用粽子祭拜為地方求平安。
傳說志伯仔係在五月前一日出生，一生人最愛吃檳榔跟粽子。
百年河壩百年流，萬里江山萬里情。

歷史就像一面鏡仔，照等古月照等今十，李受事件總係彰顯出，仇恨為惡源，起於仇恨，惡雖未為然惡果已經隨身。
對於自己、對於公眾、甚至對於解決事情，長久來看都無麼个利益。

播放歌曲:
1）從頭來過（許仁杰）
2）義民塚（馬修連恩）
3）天公落水（I-color）
4）月光光（VOX玩聲樂團）
5）打狗（高雄市立國樂團）
6）花樹下（吉娜）