2021-06-27 聯庄共保話講大路關恩公廟

1.主持人引言：

上一集，同大家講著這六堆客家出堆歷史上，最烏暗个一頁：李受事件。
有同大家講起，台灣開墾初期个族群之間，為著可以生存各族群紛紛聯庄共保，時不時這陣人打个陣人，个陣人打這陣人，大家來來去去、分分合合、恩恩怨怨。
一旦，上到官府就看滿過好運，好運个滿堂彩，壞運ㄟ就去賣牛眼…
就按呢寫就一本台灣開墾个血淚史。
 
2. 本週議題──聯庄共保話講大路關恩公廟

同大家談到个老頭擺時代个客家。各族群之間，互相个攻擊、相爭、相打、相戰，鬥啊十分厲害。
今个人，反省過去歷史發生个事情，透過今日个方式來彌補撫平。
做得，一等做得。補償係彼此、互相个概念，贖罪係有方向性个、有一方為唔著、一方為著。老頭擺个人，互相之間對國家个觀念、是非个觀念、法律个觀念，同今時今日斷真有盡大个差別。
試問，今个人愛樣仔來論斷過去行為者个是非、對著、好壞？个就唔使講，踩等前人个血淚，愛來為過去个祖先來會失禮、贖罪个事情。換今个人个講法：難免分人感覺特過於矯情。

【歷史大前提】

聯庄共保个老頭擺係愛了解老頭擺个客家庄頭生活，大家愛先了解幾个名詞。

第一個係聯庄共保，第二个係土牛竹圍，第三係柵門伯公，第四個係庄內庄外。
過，因為客家人來呀過集中，族群性也過講究群聚，所以客家庄頭一般會聚共下、相連接。
下後，平埔族人一看、原住民一看，伊等也開始來聯合，所以就形成各族群、各來源地个人聯庄共保个情形。
所以，唔單淨客家人組成七營、六堆，个福佬人、平埔族、漳泉先民等亦有共樣形式个組織，講得係一奈都全全堆、全全團，親像戰國時代樣仔，這就係人家講个聯庄共保。
 
【土牛竹圍】

就講老頭擺台灣各族群間，為著土地、水源、資源个爭奪，大家相爭吡背舞著關係非常緊張，所得當時各庄頭就親像一個城堡、堡壘，尤其客家庄頭自我保護个危機意識又更至強。
當然，蓋有錢个庄頭會有石頭、紅毛泥來結圍牆來將規庄頭包塞塞。
早期，連盡多大清官方个縣城，都用這个土牛竹圍來保護歇在底背个人民。
土牛頂高3米闊个部分，偎落背2米闊个係種刺竹竹圍，偎庄肚這片1米闊左右个地方，會留一條路分巡更个人、掌隘門防守个兵勇來行。

【柵門伯公】

柵門係柵門、伯公係伯公，但因為柵門登常會同伯公連共下，所以就共下講。

就講呢，不管惹个土牛竹圍圍到一塞、防守到一嚴密，个田地、耕種、生理交際，總係在庄外來進行，無出庄做事是絕對無辦法長期生存个。

嘎有出庄就有入庄，安全第一所以就設少少个出入口，再特別加強出入口个安全設備同防守。

所以，柵門一般愛盡量保持有人，柵門外就會設有伯公壇，陰陽都掌ㄟ著，早暗亦有人唱爺，保持有人行通有人守護。

【庄外庄內】

柵門看出去个庄外，一般會盡量保持闊朗朗ㄟ，無麼个好遮影、無麼个好屏个地形，一般會設牛埔仔。
牛埔下除了生草掌牛，就無麼个可以遮屏，再講有祖先在這掌等，外人行到這可能也會過禁忌，唔曾打就嚇著半死。
再過，有兜庄頭過講究个，會在庄外起這个魚塘蓄魚仔，魚塘之間淨淨留一條彎彎曲曲个細路仔分人行，亦增加敵人攻打盡大个障礙。
甚至，過有規模个庄頭，還會在土牛竹圍外利用天然个河壩，亦算人工來開挖一條深2米、闊2米以上个大圳溝，人員愛出入柵門還愛探橋仔，堵著危險橋仔還可以摝起來。
出入庄个柵門前後，一般也會在兩片特事起高強、做俾又高又合，易守難攻來做最後个防守。
講著這，大家敢可以感受著老頭擺人个生活有幾緊張？

這種情形也唔單淨六堆客家庄按呢，根據阿豐頭个經驗，1895桃園平鎮个片个資料就有寫著，平鎮胡嘉由佢屋家胡家大院，就係按呢來設計。

【大路關恩公廟】

客家庄頭四周圍丁一轉，係土牛、竹圍、大圳溝，出入有柵門、望樓、摝橋、伯公壇。
單淨按呢一想，就會發現老頭擺个客家庄頭，斷真唔會輸過電視頂高个種，嚴防密守，一息都無拗蠻。
這滿，就聽主持人阿豐頭同大家來分享：高樹大路關恩公廟个歷史。

大路關个恩公廟，係位在臺灣屏東縣高樹鄉廣興村个義民廟，廟肚係祭拜1853年个時節，在大路關這位因為族群分類相殺/平埔族聯合福佬人仇殺客家人个事件中，犧牲个六堆客家先民義勇。
在道光十二年（1832年）張丙事件中个/論真講係南路賊許成事件中，有關阿里港莊馬力同李受右堆軍个衝突。
番仔寮後來建立番仔寮義勇恩公廟，以祭祀支援保護當地而身亡的外地人。
廟肚个碑文按呢寫：……本事件結束後，本庄个庄民親像同大路關等粵庄，結下了不解个冤仇，所以在咸豐三年(1853年)个『包圍大路關事件』中，番仔寮庄民也響應高朗朗人，參與高樹大路關个圍庄行動。
因為發生到蝗災/蝗蟲災害又堵著土匪打劫，不得不遠遠行去上庄（今美濃區、高樹鄉）同下庄（今內埔鄉、萬巒鄉）去買秧仔。
去下庄買秧仔个大路關人，歸來大路關个路亢，聽著路唇無遠个地方，有阿妹仔細細聲哭汁个聲音，行上前去正發現係庄肚仔，一位啞狗个阿妹。

看佢衫褲著到爛爛堪堪，再經過比手畫腳，大家知得啞狗妹竟然分高朗朗人欺負了。
這還贏得！好事个人就帶了一大陣人，去到高朗朗愛討一個公道，無想著幾句話講無堵好，客家人就報復性也來傷還高朗朗个庄民、婦女，然後捓扛打陣離開。
事情舞著按呢，講都講唔直了。

高朗朗人當然吞唔落這一口氣，新仇加上舊恨將就一擺講俾直白。
當時佢等也有佢等聯庄共保个組織，平埔族加上福佬庄，講起來也盡大陣。
當時，高朗朗人以番仔寮个陳琴為首，邀集各庄个壯丁在九月二十一日，發動來包圍大路關。
分人圍到第四日个時節，大路關庄等到半夜，派楊快盛去美濃、邱來楊去萬巒特夜討救兵。

當時美濃堵好割禾仔當無閒，但係大路關事出緊急也做唔得等，所以就先由劉山蠻二帶等一批美濃割禾工先逐過去，畢竟美濃離大路關過近逐過去過緊手。
無想著，因為來到時節已經係暗夜，加上佢等對高樹个庄頭環境無蓋熟識，續不幸誤入福佬庄，遭受到福佬人个毒手來犧牲。
下後，萬巒个林錦祥也帶等萬巒人，一路大鑼大鼓聲色盡靚，旗海人員呦呦呼呼，遠遠大批人馬當在趕來大路關个路上。
聽講，當時平埔、福佬聯軍遠遠看著按大个排場，覺著係大清官兵、義軍出動，不敢久戰，內肚仔軍心大亂。

【關於恩公廟的傳說和後續故事】

    事後大路關民眾感恩義勇救命之恩，就起了恩公廟來紀念，由大路關庄鍾阿丁个阿公主持起廟个各項事頭。
原底係起呀在廣興村个廣興壇附近，下後正過遷徙到今價个位所，今个恩公廟係在1998年改建完成。
當時，高樹鴻祺農場个頭家娘葉琴嬌女士有所感應，講發夢著十六七歲个後生人，講佢等歇在某个位所(恩公廟)但唔曉得寫字，拜託頭家娘佢來講伊來寫。

第二日，恩公廟籌建委員會來尋頭家娘撿錢，葉女士就大力捐獻促成恩公廟个順利改建成功。
1998年5月23日下晝兩點半，大約是有論三百儕反對起美濃水庫个民眾，來到大路關恩公廟這位，想愛比照前人成立「六堆反水庫義勇軍」，包括六堆文化基金會董事長劉錦鴻、國策顧問邱連輝、國代賴健榮，同美濃愛鄉協會个理事長鍾鐵民，還有曾貴海、吳應文、吳錦發、楊長鎮、鍾文中、蔡森泰、鍾新財、鍾國華等人參與。
成立大典上宣讀祭文、義勇軍宣誓、頒發戰旗，隨後組成車隊遊行高樹、美濃市區。

這滿恩公廟个祭典，主要係由村辦公處同社區發展協會聯合主辦，主桌愛準備麵豬、麵羊、豬頭、五牲（豬肉、雞、魚、水果、紅粄）等供品，廟前還會擺加六張桌仔，分在地居民來擺祭品、金銀紙。
 
【古事今說】

阿豐頭點評係，大家在認真來看。

遠有張丙事件，福佬人圍新庄仔客家、客家人大殺阿里港福佬；近有林恭事件，加吶埔人同客家人就打唔堵好ㄟ。
个當時，係愛喊這幾个族群坐下來好好哇講，斷真比登天還過難。汝看，劉三蠻二係美濃人逐來解圍个，略略仔判斷錯誤，歸陣仔人就分人收拾歇了，半點不留情。大家可能會想，這怕係無共樣个族群，正會按呢吧？！

各位，像這福佬人底背，漳泉之戰也共樣按惡按得人驚，日仔也唔會過到過鬆煩。
原住民各族群之間，亦無講恩恩愛愛，堵著ㄟ又咩共樣刀槍相見。

就講，一時一節、一庄一情、一來一往，台灣行到今分日，民情算起來一等溫和，社會發展也蓋順序，全民亦蓋遵守法制、政府規定，其實係經過一下百年發展到如今，一息都無簡單、一息都無請裁。
大家一定好好來珍惜，要好好來守護台灣這塊土地，用感恩个心情來安慰先人个血淚，用全民合作建設永續个台灣，來報答所有犧牲个先民。

同時，係有一日愛企出來守護台灣个時節，阿豐頭也希望能得有先人个勇氣，大家共下企出來守護涯等个台灣。
 
播放歌曲:

1. 許你一片麥田（少女卡拉）
2. 林頂月光（黃佩舒）
3. 天公落水（I-color）
4. 拈轉來啦（I-color）
5. 當慶（I-color）
6. yes We Can（客委會）