2021-07-04 六堆地區的老柵門

1.主持人引言：

上一集，頭擺个台灣庄頭尤其客家人个庄頭，不但用土牛圍牆圍等，四周圍還種滿了刺竹竹圍，甚至還有護城河層層保護。

柵門个設置，可以看出頭擺仔客家庄頭同其他族群个關係緊張。

時空轉變，各族群之間脫離了頭擺粗蠻社會个年代，現代化个法治也唔允准私下尋仇報復。
再者，台灣農田水利个發達、工商業社會个發展，人民脫離了傳統農業社會爭地爭水个日仔。

現代化國家制度解構傳統宗族制度，各族群之間亦因為過家教育制度、社會流動頻繁，漸漸淡化了族群意識形態。

對日本時代開始，柵門个功能可以講漸漸失歇功能，目前可以看得著个柵門，
一般都分人看作係古蹟來保存，看聊、講古个意義為主。

今分日，主持人阿豐頭就來同大家紹介，幾个目前在六堆地區，還看得著个老柵門，透過佢等來認識了解六堆300年來个歷史風貌。
 
2. 本週議題──老柵門

【東門樓】

    首先，來為大家紹介瀰濃个東門樓。
這座東門樓係乾隆20年（1755年），起呀在美濃溪唇口，聽講當時原底歇在這位个瀰力社人，過還有對龍肚六龜个方向來个原住民，不時會來犯。

佢等个攻擊力亦非常之強，速度亦非常之遽。

所以，一路對山下个方向，開到美濃本庄時，為著安全所以起建瀰濃莊東柵門，還特別加建門樓，也係瀰濃莊四個柵門底背唯一个城門樓。

係詳細來觀察个話，汝就會看著東門樓起呀盡高，有柵門防守个功能也有望樓示警个效果。

　　識聽人講，頭擺仔係企在東門樓頂看著外敵攻打過來，就會敲響大竹筒槓仔通知庄民隘勇。

不過，涯想銅槓、鐵槓應該亦有可能，無定著怕也有可能校炮城按呢放紙炮仔無？
係愛上去東門樓頂高，腳氣唔好怕就無辦法，年紀事係過大个亦無鼓勵爬上去。

樣仔講？个上去个梯牌又直又合又崎，一个人堵好，行無好有可能會挺挺額橫下來！
今有加這个欄杆扶手又還過得一息。
看起來，係提防敵人爬上去傷害守望个人，斷真係人家講个易守難攻。

　　對東門樓頂高看轉西片，就係美濃个永安老街，可見先人亦係祈求可以永久安居在這，簡單但一息都無簡單个夢想。老街个入口又一口老井，大家係有閒可以去行行聊聊啊。
瀰濃東門樓在光緒二十一年（1895年）个乙未戰爭中，因為日軍來進攻瀰濃，造成東門樓續來毀壞。

日治時期昭和12年（1937）由鍾春發等鄉紳、耆老，發起重建為樓高三層、鋼骨、紅毛泥个形式。
太平洋戰爭時又增設一細間个細屋仔，底背掛一口大鐘堵著防空警報个時節敲俾響。

    1950年，二次世界大戰結束，當地人就將把日本時期个小屋同大鐘拆歇再起過，比照大清朝時期漢式个龍簷鳳閣燕尾形式，來起一座樓閣。

　　高雄縣政府在2000年指定瀰濃東門樓為縣定古蹟；2014年，因長期自然風化、地震及結構老化等因素，東門樓樓體有一下仔地方有襞縫、凹坑、紅毛泥落歇、鋼骨亦走出來。另外，東門樓頂个屋脊、剪黏、彩繪這都，也落色落色、壞个壞、落个落，實在愛來保養一下過好。後來，高雄市府為著保存東門樓這座古蹟，就決定出錢來修復。

    所以就進行了結構个補強，泥人仔、屋瓦清洗俾淨，壁面刷漆粉泥、屋脊、歸帶、垂脊、牆面及樓梯亦來一一修復，總講以恢復原貌為原則，來修復東門樓古蹟。工程期間，發現東門樓
屋頂个屋瓦，原來个色唇係暗紅个豬肝色，不過因長期風化續變成烏色；下後，在文化局邀集地方民意來參詳後，大家最後表決，就按呢定案將屋瓦修復歸原來个豬肝色，歸隻工程在2014年年底完成。

就係這滿大家去到瀰濃看到个樣式。

    大家係認真行，在這東門樓唇口有一條路，降下去可以到河壩唇，大家會看著一个伯公壇，規模唔算細。伯公唇也有落去河壩洗衫取水个路，相信過去庄肚个婦女亦會召陣，對這行去河壩洗衫褲。
柵門外設伯公壇，早暗燒香敬茶兼顧庄。

相信過去東門樓行出庄外，絕對會有一座探過美濃溪个樹橋仔也算竹橋仔正著。
大家不妨想一下，个下仔愛攻入瀰濃庄斷真唔按快呦！

【佳冬柵門】

　　這座城門因為佳冬庄地理上个特殊性，採用石頭堆疊个城牆結構，可以講係另外一種柵門个形式。因為節目中第一擺講著佳冬庄，就先大約事談一下佳冬庄。

佳冬庄，係原底六堆客家个左堆，亦係六堆客家庄底背唯一偎海个庄頭。
大清末年，屬鳳山縣港東中里，原底安著六根庄或者下六根庄。
聽講初初開庄个下仔，這地方有6頭盡大頭个茄冬樹，所以正安著六根庄。

日本明治34年（1908）个時節，改名安著茄苳腳庄，講係因為這地方，生著有盡多茄苳樹，又因為地處屏東平原客家聚落个南邊，故所安著「茄苳腳」。

      日本个大正9年（1920）實施地方行政區域改革，講因為佳冬同茄苳个日語語音蓋相近，又搭符合「恆春、佳冬」个意思， 故所以改名安著佳冬，又搭合併茄苳腳庄、
石見光庄、葫蘆尾庄、昌隆庄、武丁潭庄、大武丁庄，就係今个佳冬庄。
因為佳冬過去有運河可以運貨，直接出葫蘆港街出海做生意，其實商業經濟唔算差，也造就幾个客家大夥房，結合著客家伙房同圍龍屋个建築，內內外外幾下層，蕭家古厝就係最出明个。

      大清時期，福佬客家關係舞著非常緊張，無一遠又接近排灣族，所得福佬、客家、排灣族三個族群間登常發生衝突。
客家人一般就結合集中聚居共下，為著愛求自保，各庄頭四周圍都會種這莿竹，過大个庄頭還會建這土牛牆、挖深溝，又在庄頭个東、南、西、北四個方位，設有柵門作為防衛
同進出村庄之用。柵門，在日後就改建為磚石起个門樓，因為佢个主要功能係作為防衛同進出之用，所以又安著「隘門」。

     一方面因為佳冬特殊个地理環境，十分接近外族。一方面又因為佳冬人做生理人多，又可以出海去到府城做生理，應該過有口。

所得，堪得起用石頭代替土牛來築圍牆，佢等在庄頭个四周圍築起石牆，又再築起拄固个四隻隘門。
佳冬隘門採用个係門樓形式，差唔多係對大清嘉慶16年（1811）起个，會按呢講係因為，這滿存著个西柵門同北柵門，兩隻柵門向外个立面，都有一塊石刻个「褒忠」橫額。
這滿現存北柵門个「褒忠」碑，係佳冬庄民在清嘉慶16年（1811）建立，按呢推論，茄冬西柵門亦係清嘉慶16年（1811）起个。

    佳冬庄過去建有四隻隘門，今價淨存著西隘門（或者西柵門）同北隘門（或者北柵門），其中又以西隘門保存著最完整，柵門高大約兩層樓高，紅瓦燕尾翹脊，係用卵石、紅磚、紅毛泥、白灰起个，屋瓦橫樑係樹樑。外向立面刻有仿乾隆御筆个「褒忠」二字，「褒忠」橫額个兩片有對稱个圓形銃眼，銃眼唇又有泥捉个魓婆仔圖案，左磚柱柱面寫「褒雍粵城」，右磚柱柱面寫「忠著閩邦」，看起來莊嚴又書體，也表現出客家先人保家衛鄉个忠義精神，同對幸福安居个祈求。柵門出入个路，兩唇係用石頭疊起來高高个牆頭壁扇，係講柵門个硬成程度，佳冬西柵門絕對係銅牆鐵壁型个。

    實在講，柵門係起到大、起到有氣勢，當然對外族群會有嚇懟个效果，尤其又有大清皇帝个御筆題寫，某種程度透露出同當朝官方个關係，最少人過唔感濫黲來犯。
總講，係做得不戰而屈人之兵，當然最好。

不過，根據1895年乙未佳冬步月樓戰役个紀錄，當時个門係厚厚个樹門。當然係有口人，屋幢用石磚為材料；不過，當時大部分个庄民還係歇茅屋。
所以，日本人最後就用火攻北柵門，將火把擳入庄、用炮攻大門，又再放火燒庄最後正攻下茄苳腳。
當時，茄苳腳个庄民就係對西柵門，走出庄屏去萬巒。

    自從創建以來，一直到大清道光30年（1850）佳冬西隘門，因為風吹雨打日長月久个關係，門樓个壁扇垮垮仔，壁面亦落殼落殼，門樓个棟樑也柱壞了。
所得無奈事何庄民只好集資來重修。下後日治期間，全然無留下相關修整个紀錄資料，一直到民國68年（1979）正有整修个紀錄。

另外，在民國85年（1996）个當時，因為隘門壞呀蓋嚴重，所以有將正立面過一擺重新整修。
大家係有去到佳冬西柵門，也不妨去蕭家古屋，个位原底係南柵門个所在，這滿市場行个路底下就係過去个護庄運河，南柵門唇口亦有味緒个敬聖亭，算起來也係蓋靚蓋鬧个敬聖亭，屬於豪華版。
 
【土牛竹圍】

就講老頭擺台灣各族群間，為著土地、水源、資源个爭奪，大家相爭吡背舞著關係非常緊張，所得當時各庄頭就親像一個城堡、堡壘，尤其客家庄頭自我保護个危機意識又更至強。
當然，蓋有錢个庄頭會有石頭、紅毛泥來結圍牆來將規庄頭包塞塞。

早期，連盡多大清官方个縣城，都用這个土牛竹圍來保護歇在底背个人民。
土牛頂高3米闊个部分，偎落背2米闊个係種刺竹竹圍，偎庄肚這片1米闊左右个地方，會留一條路分巡更个人、掌隘門防守个兵勇來行。

【柵門伯公】

柵門係柵門、伯公係伯公，但因為柵門登常會同伯公連共下，所以就共下講。

就講呢，不管惹个土牛竹圍圍到一塞、防守到一嚴密，个田地、耕種、生理交際，總係在庄外來進行，無出庄做事是絕對無辦法長期生存个。

嘎有出庄就有入庄，安全第一所以就設少少个出入口，再特別加強出入口个安全設備同防守。
所以，柵門一般愛盡量保持有人，柵門外就會設有伯公壇，陰陽都掌ㄟ著，早暗亦有人唱爺，保持有人行通有人守護。

【新北勢懷忠里門】

可能係最早起好个土磚式柵門。

這就係在內埔鄉新北勢庄个懷忠門，又安著新北勢庄東柵門，位在屏東縣內埔鄉振豐村內，目前係國家三級古蹟。

就講，早期對廣東徙來台灣个客家先民，在清康熙、乾隆年間陸陸續續進入屏東六堆開墾殖，新北勢庄算起來係盡早盡遽起好个庄頭，因為當時1721年六堆組成七營，擔任副大總理个侯觀德就係新北勢人，當時侯觀德算係在新北勢教書个先生，可見開庄盡早。

    1721清康熙末年，六堆客家組成七營來協助大清平定朱一貴事件，大清康熙皇帝特頒旨矜其里為懷忠里又再諭建西勢忠義亭，這个里當然係指六堆客家庄頭所在个區域，尤其係講這个港西中里(中堆地區)。
過去新北勢、老北勢到中心崙原底屬於中堆/港西中里。

既然1722年忠義亭亦已經在西勢起好ㄟ，底背也掛有康熙皇帝御筆个懷忠牌匾。
嘎按呢係又愛另外矜其里為懷忠里，大家唔知有看過電視電影亢个貞潔牌坊無？

皇帝講愛矜其里，總愛在港西中里有麼个做作，起一座牌樓也算一座門樓來表彰，應該係一等合理个推斷。就因為按呢个想法，所以有可能康熙年間，豐田/新北勢這位本成就有一座門樓，頂高就寫等懷忠里三隻大字，表彰客家先民懷忠報國个義行。

   另外，根據眼時个資料顯示，乾隆五十一年(1786年)林爽文事件，六堆鄉勇再一擺幫助大清平亂有功，个下仔起建這座豐田隘門，搭在唇口立碑來紀念立碑紀念，後來在1900年（光緒26）年有再重修到今。
阿豐頭想愛推算：懷忠門門額頂高个懷忠里三隻字，到底係奈久寫上去个？
既然講光緒26年(1900年)係來修整這座東柵門/懷忠門，表示講進前在乾隆年間起个新北勢柵門，就已經有懷忠里這三隻字ㄟ。

    在認真來比較各個皇帝表揚義民个手路，康熙年唯一使用「懷忠」，乾隆年慣用个係「褒忠」。
照倫常來看，乾隆皇帝定著不敢僭越來使用懷忠兩隻字，除非乾隆年間起這座新北勢柵門，其實係增建、擴建「懷忠里」个性質，所以繼續保留頂高个懷忠里三隻字。
這種情形同西勢忠義亭个情形會像會像，所以阿豐頭認為乾隆年間、光緒年間，盡有可能係重修再擴建个概念。

    新北勢莊東柵門/懷忠門，係用石頭壘疊、底背用泥磚仔結起來，落背再用紅毛泥、白灰抹過，柵門高大約是有7公尺，寬度大約有6.5公尺，厚度大約有1.2公尺，佔地大約是有6坪多。
東柵門个門額中央掛等一塊懷忠里个橫匾，左片、右片各設有對稱个圓形銃眼。
柵門个左右兩析係用磚結築起來个牆，屋脊採用水平馬背个設計，蓋上紅瓦；在東柵門个右前方，還保留一塊大清光緒年間，用花崗石雕刻个重修柵門紀念石碑，頂高寫个字已經霧歇了看唔清楚，係相當珍貴个文物。
 
【新埤建功庄東柵門】

    建功庄東柵門又安著褒忠門，就位於屏東縣新埤鄉建功村建功路150號。
新埤建功庄个名仔聽講係因為最早開墾个人安著朱建功，另外也分人安著鏡庄，講話是過去庄肚裡又盡多湧泉，因為水面清淨平滑如鏡，所以人家也喊佢鏡庄。
聽講這座柵門係在大清光緒八年(1882年)所起个，當時係為著防衛所起个建築。清康熙、乾隆年間，原籍廣東客家移民到屏東六堆，客家庄聚落多位於閩南人及原住民聚落交接處，為了防禦原住民同福佬人个侵犯，所以就在貫通庄頭唯一个道路兩頭前，設置東、西二座柵門。

    因為，清乾隆51年（西元1786年）个林爽文民變，六堆客家義勇組成幫助大清來平亂，事後大清有感於客家庄頭協助平亂有功，乾隆皇帝就御筆親提「褒忠」牌匾賜封分客家。
所以，在大清光緒8年(1882年)建功居民啟東柵門門樓个時節，就將乾隆皇帝御筆个「褒忠」二字，刻啊在牌樓正中央，說明了當年客家同胞共心協力同官府合作保衛鄉里个事蹟。

    建功東柵門現今名列國家三級古蹟，係用紅磚、紅毛泥、白灰來起个，門樓屋樑用樹樑來扛，屋頂有翹脊燕尾个裝飾，同瀰濃个東門樓相像，這可能也表示建功人求文昌、功名个想望，因為一般都會採取馬背个形式。
建功東柵門兩側還有起一段用卵石疊起來个石牆。

建功這附近係林邊溪過林邊溪支流密布个地方，沙泥卵石取用容易。

另外一方面，新埤再過去就盡偎平埔族、原住民个所在，有望嘉、文樂原住民族，又有平埔族庄頭。
講起來，生活上也係硬堵硬來過日仔。

   
 
播放歌曲：
1）花樹下（吉娜）
2）相思（《日據時代的十種生存法則》片尾曲）
3）菊花夜行軍（交工樂隊）
4）日頭客（湯運煥）
5）Yes We Can（客委會）
6）天光（吉娜）