2023-01-03 : 19點新聞 - 航空業勞資爭議 勞動部籲業者分享經營利潤

航空業勞資爭議 勞動部籲業者分享經營利潤

長榮海運年終獎金發哩45個月，長榮航空年終獎金乜有3個月，毋過負責搬貨還有清潔這兜事頭个長榮航空地勤人員，年終淨1個月定定，比其他集團少多哩，故所地勤人員元旦放尞該三日，依法請假無上班，航班受到當大个影響。勞動部部長許銘春今晡日表示，針對這幾日航空業發生工會抑員工對頭家年終獎金還有調整薪水个問題，勞動部請經營團隊，應該愛將經營个利存，合理个同員工來分享，淨有同員工當作企業个自家人，正有辦法穩定勞資關係，創造企業永續經營。

迎銀髮海嘯 台科大打造青銀共榮元宇宙

面對社會高齡化，台灣科技大學打造青銀共榮元宇宙，帶等大學生拜訪香柏樹長者社區關懷協會，瞭解世大人日常个情況，挷近世大人同後生人个距離，在活動當中相互𢯭手，分世大人感受著分人尊重、分人關懷、分人需要个光榮感。這課程毋係短期个計畫，協會總共設有3個地點，分大約有百過儕个世大人做得共下來參與。

天冷雞蛋日產略降 農委會：已做安排春節不缺蛋

農委會官網頂資料講，雞卵一日个產量本旦增加到十二萬兩千箱，毋過，這幾日又降低到十二萬一千箱（大約有2420萬粒卵）。農委會表示，雞嫲卵生較少同天時變寒有關係，春節既經安排區域調度，還有調整進口卵、加工卵來填補無罅个量，故所，春節毋會欠卵，請民眾放心。