詔安腔｜馬丁瑪莎還有夏婆婆 (十二)

O.S

在這個小鎮內，有一火灶蹛一對阿哥阿妹，阿哥馬丁佮意䀴書，阿妹瑪莎佮意做戲，佢人猶有一個多才多藝，做過環球小姐个屋邊―夏阿婆。今日討分享个故事係「和夏阿婆个約定(上)」。鬥底馬丁、瑪莎和夏阿婆作垺做了麼个約定？得人打探䀴望。

O.S

馬丁這滿知啊，「𠊎食過个鹽比你食過个米較多」，意思係有个老儕想講自家年歲大，經驗定著較多，所以少年人攏愛聽佢个事；毋過馬丁感覺夏阿婆毋係恁个人。所以，愛仰子來形容夏阿婆咧？

馬丁

自上擺聽了夏阿婆个頭路紹介了後，𠊎知佢少年个時務識在雜誌上寫過專欄，𠊎足欣羨个……。假使有一日，自家寫个文章會用得人刊在報紙面上，得小朋友讀，毋知有幾好咧！

馬丁

有啊！𠊎來投稿一篇〈𠊎个屋邊―夏阿婆〉，大家敢毋係即會用䀴著𠊎个文章啊？

瑪莎

馬丁，你討寫文章投稿哦？𠊎嘛足想討䀴。無採，𠊎猶毋識字，你愛唸得𠊎聽哦！

馬丁

當然無問題，正係𠊎愛仰子形容夏阿婆較好咧？

媽媽

馬丁、瑪莎，夏阿婆想討邀請你人去魚塘脣坐一下，食正炕好个柑子雞卵糕哦！

瑪莎

哇！足好个！

馬丁

𠊎人來啊！

瑪莎

勞力夏阿婆，你个雞卵糕足好食！

夏婆婆

毋使細義，𠊎拁魚塘底个細尾魚號做「歡喜」，烏龜即喊做「平安」，佢人這滿在魚塘內恬恬歇睏，䀴起來正經平安歡喜。

馬丁

著啊，𠊎阿怙講你號个名真好，正經平安擱歡喜！

夏婆婆

咳，細子啊，𠊎今日來係想討拁你人講一個大消息，𠊎討搬屋下啊。

瑪莎

麼个！毋會用啦！

馬丁

恁即無法度擱去夏阿婆屋下尞啊……

夏婆婆

細子啊，毋使艱難，𠊎个年歲大啊，準備討去養老中心蹛。遐跡位毋若風景靚，猶有專業个醫護人員和生活照顧人員，會用鬥相共𠊎大細件事情。

瑪莎

毋過，遐無平安歡喜啊。

O.S

䀴瑪莎得討唩啊，夏阿婆知瑪莎講个係細尾魚和烏龜；嘛知佢正經个意思，並毋係䀴毋會著魚和烏龜，係䀴毋會著馬丁和瑪莎。

夏婆婆

唉，𠊎心肝內嘛有一兜仔艱難，所以正招你人來魚塘脣講事。

馬丁

夏阿婆，勞力你个邀請，毋過在養老中心你敢會歡喜？

夏婆婆

這……

O.S

身為夏阿婆个好朋友，馬丁頭擘心个係夏阿婆敢會歡喜。假使好朋友無歡喜，自家嘛毋會歡喜。鬥底夏阿婆會仰子拁馬丁回答咧？得人作垺期待精彩个大結局。