詔安腔｜馬丁瑪莎還有夏婆婆 (十)

O.S

自馬丁和夏阿婆同意交換日記了後，佢兩儕攏會分享生活內个遐遐這這；毋過準講係好朋友，嘛有足多祕密各儕嘛攏毋知。今日討分享个故事係「麼个？幾時夏阿婆係……(上)」。得人作垺歡喜來聽故事，期待打開夏阿婆个神祕面紗。

校長

喂、喂！各位同學𠢕早。人學校會邀請各行各業个大人來紹介佢人个職業，這係熟事各種職業个心色方式，會用激發大家對未來做事个想像和期待哦！

瑪莎

馬丁，你猶記得朝會个時學校長講个事無？𠊎感覺學校長講了無毋著，因為知夏阿婆係導演，好得當時有佢修改劇本，𠊎正有膽上臺。經過真多擺練習了後，𠊎這滿會用輕輕鬆鬆上臺表演啊。相信𠊎未來會用做戲，做虬毛个公主、虬毛个先生、虬毛个超人。

馬丁

瑪莎你講了真好！𠊎討拁先生建議，邀請夏阿婆來人學校分享。因為夏阿婆識講：佢成過个頭路有：食个、著个、寫个、飛个，猶有講無歇个。毋知佢个職業鬥底會係麼个？

瑪莎

好啊、好啊，一定會真心色！

馬丁

先生，𠊎有事情想討請教你，𠊎會用邀請𠊎个屋邊―夏阿婆來學校分享無？佢講佢識做過个頭路有：食个、著个、寫个、飛个，猶有講無歇个！

老師

嗯～恁个內容真餳人呢，夏阿婆會係大總舖師無？

馬丁

𠊎嘛毋知！希望到時佢肯和人分享。

老師

好！恁這件任務即交得你哦！

馬丁

交得𠊎包無問題！

O.S

收著學校个邀請，夏阿婆真爽快即講好啊。拜二晨早，夏阿婆來到位馬丁个班級，猶拖一個行李箱，外殼上各國文字个貼紙貼到淰淰。

馬丁

哇，夏阿婆你進前个頭路係空中小姐齁。

夏婆婆

毋係，毋過有影識飛來飛去哦！你等一下即會知答案啊。

老師

今日討拁人分享職業个係夏阿婆，大家掌聲歡迎佢。

夏婆婆

大家好，𠊎係馬丁个屋邊―夏阿婆。

夏婆婆

你人䀴這係𠊎成過做事个時戴个帽。

小朋友A

小朋友B

小朋友C

哇！

O.S

麼儕嘛料想毋會著，夏阿婆對行李箱內提出來个第一件物件，嗄係一頂皇冠！

小朋友A

遐敢係賞个童物？

小朋友B

你成過係貴族？

小朋友C

抑係你係一個女王？

O.S

面對小朋友个疑問，夏阿婆拁皇冠囥在講桌崠，拁銀白色頭那毛絲收到耳子後，續落笑笑講出答案。

夏婆婆

這係五十年前，𠊎代表澳洲參加環球小姐選拔得著个冠軍后冠。

老師

嘛即係講五十年前，夏阿婆識係世界上頭靚个妹子。

小朋友A

小朋友B

小朋友C

哇，夏阿婆足厲害个！

馬丁

哇，無想著夏阿婆識做過環球小姐！

O.S

馬丁心肝底直直在想…五十年前，少年靚靚个夏阿婆，企在舞臺向歸下世界擛手个形。麼儕會用想著目前頭那毛白雪雪个老阿婆，識係一個環球小姐咧？鬥底夏阿婆在擔任環球小姐期間，識做過麼个事情？得人作垺耐心等，期待後一集精采个故事！