詔安腔｜馬丁瑪莎還有夏婆婆 (九)

O.S

在這個小鎮內，有火灶蹛一對阿哥阿妹，阿哥馬丁佮意䀴書，阿妹瑪莎佮意做戲，佢人猶有一個多才多藝个屋邊―夏阿婆。上一集，馬丁知夏阿婆參加一個自家一儕蹛个人正會用加入个社團。為著毋得夏阿婆恁孤單，佢想出一個好方法。今日討分享个故事係「交換日記」。得人作垺聽三個好朋友之間个故事！

瑪莎

馬丁，透早你即在遐無閒麼个？

馬丁

你敢猶記得，夏阿婆講佢參加「輪流做人客」个社團？𠊎臆夏阿婆會加入這個社團，應當係無人關心佢，所以……。

瑪莎

所以？

馬丁

𠊎想出一個計畫！等下人即去拜訪夏阿婆？

瑪莎

好！

馬丁

瑪莎

夏阿婆你好！

O.S

馬丁去拜訪夏阿婆，手內猶隨一本空白个筆記簿。

馬丁

夏阿婆，𠊎想討和你寫交換日記！

夏婆婆

麼个？愛𠊎寫日記！哈哈哈。

馬丁

著啊！會用無？

夏婆婆

好啊，𠊎愛先在封面寫、作者―夏阿婆。

瑪莎

足好个！馬丁這個好辦法係仰子想著个？

馬丁

𠊎係驚夏阿婆歸日在屋下無聊，邀請夏阿婆逐日寫一篇日記，會用度時間，另外學校先生講過，寫日記會用練大腦个記性和表達能力哦。

夏婆婆

毋過，𠊎寫日記得哪儕䀴啊？

馬丁

日記毋使得別儕䀴。

夏婆婆

若無討得人䀴，恁，有寫無寫即無麼个無共啊！

馬丁

當然有無共！

夏婆婆

假使愛𠊎寫日記，條件真簡單，你嘛愛寫。了後人逐個拜六相換䀴。

馬丁

欸，日記毋會用儘採得人䀴啦！

O.S

夏阿婆無講事，笑噳噳拁馬丁金金䀴啊䀴，䀴到馬丁只好認輸。

馬丁

好啦，𠊎嘛寫。橫直𠊎个日記一定真無心色：跋起床、去學校、放學、去眠床睡，無啊。

瑪莎

真好，你人攏會寫字！

夏婆婆

瑪莎乖，有一日你嘛會个。馬丁來，這本空白筆記簿得你，記得拜六愛隨來。

馬丁

好。

媽媽

哈哈哈，你真無簡單想著一個「救夏阿婆計畫」，結果自家嘛愛寫，幾時你救个係自家。毋過𠊎真贊成這個計畫，因為寫日記會用培養耐性。

馬丁

阿依你莫笑𠊎啊啦，今日𠊎即愛寫第一篇日記。

瑪莎

得人足期待个！馬丁你愛和𠊎分享哦！

O.S

這日暗夜，馬丁第一篇日記寫个係……

馬丁

阿依拁魚頭煎斷去，瑪莎个頭那毛擱較虬啊，𠊎个日記寫好啊。

馬丁

雖然先生示範過，日記會用寫个物件真多，無論係真實个事情，抑係心內个想法攏會用寫落來。毋過，𠊎正無想討得夏阿婆知自家个心事咧！𠊎臆，夏阿婆寫个日記，應當係：炕一個柑子雞卵糕，拁胖比洗浴。夏阿婆个生活一定比𠊎擱較簡單，擱較無聊。無毋著，一定係恁！

O.S

真緊，拜六黏時即到位啊，馬丁和瑪莎打早即來到位夏阿婆屋下食雞卵糕。

瑪莎

夏阿婆，𠊎人想討䀴你个日記。

馬丁

夏婆婆

一、二、三……

O.S

馬丁和夏阿婆互相打開雙方个日記。

瑪莎

馬丁敢有寫𠊎个歹事？你愛拁𠊎講哦。

夏婆婆

嗯，𠊎䀴望……

O.S

夏阿婆正用兩分鐘，即拁馬丁五日來个日記讀淨啊。

夏婆婆

馬丁講你个虬毛擱較虬啊。

瑪莎

麼个啊？這有麼个好寫个。

O.S

無想著，馬丁嗄專心在䀴夏阿婆个日記，䀴到直目直目，連雞卵糕嘛添放食。

瑪莎

你䀴到足專心，夏阿婆攏在寫麼个？

馬丁

寫瑪莎个頭那毛擱較虬啊。

瑪莎

哼！夏阿婆正毋會抄你个日記。

馬丁

哈哈哈！夏阿婆，你个日記足心色个！

夏婆婆

勞力你个安哢。

O.S

馬丁䀴到足專心，即像在䀴精采个故事書。夏阿婆个日記毋若寫到淰淰淰，猶剪雜誌个圖來貼，擱有幾下張發票。䀴起來，佢用真多時間寫日記。
夏阿婆鬥底寫麼个咧？瑪莎真想討知。夏阿婆鬥底猶有麼个祕密毋知？得人作垺期待後一集个故事！