詔安腔｜馬丁瑪莎還有夏婆婆 (八)

O.S

在這個小鎮內，有一火灶蹛一對阿哥阿妹，阿哥馬丁佮意䀴書，阿妹瑪莎佮意做戲，屋邊夏阿婆共款多才多藝。今日討分享个故事係「夏阿婆屋下仰子啊？」。鬥底夏阿婆屋下發生麼个事情？得人作垺來聽這三個好朋友之間个故事。

O.S

禮拜日一直攏係馬丁賴睡日，會用享受毋使急討出門个悠閒。瑪莎嘛搵在另外一張眠床棟，兩儕作垺賴睡。

瑪莎

馬丁，講十個故事得𠊎聽，當做禮拜日个大禮物。

馬丁

遐有麼个問題，有一個虬毛个小公主……。欸，你聽遐係麼个聲？

瑪莎

若像係對夏阿婆屋下傳來个。

馬丁

胖比在夏阿婆屋門口一直吠擱一直跳，猶有一個阿姨手提一大拿个花，當在和屋內个夏阿婆講事呢。

瑪莎

係麼儕？

馬丁

𠊎嘛毋知，這係第一擺有人客來尋夏阿婆。

瑪莎

定著係阿婆个阿女，䀴佢笑到恁歡喜。

O.S

毋過，馬丁和瑪莎早頓正食淨个時，這個阿姨即在門口拁夏阿婆講正來尞啊。

夏婆婆

正擱來尞！

女人

正來尞！

馬丁

傷緊啊啦。

瑪莎

佢入門都吂有一點鐘。

O.S

擱較奇怪个係，過無幾久，又有猶一個阿叔擐一袋禮盒來啊。

馬丁

𠊎來算時間。

瑪莎

這擺毋會又擱係正一點鐘齁？

O.S

臆了無毋著，一點鐘了後，阿叔嘛走啊。夏阿婆屋下仰子啊？連續來兩個人，攏正來一點鐘，了後即隨離開。

馬丁

擱來啊！

瑪莎

這擺猶有細子。

O.S

一個阿姨和一個細子，寬寬行入夏阿婆个屋下門。這時馬丁猶鼻著屋內傳來柑子雞卵糕个香味。

瑪莎

馬丁，人嘛去尋夏阿婆，打探清楚。

O.S

兩儕實在真興，今日个三組人客，鬥底和夏阿婆有麼个關係？係屋下人、朋友，抑係進前个同事？

馬丁

𠊎想無可能係屋下人。因為，逐擺人去阿公抑外公屋下，頭無會在遐留歸日，作垺食一頓飯、罔講罔笑。屋下人仰子會正留一點鐘咧？

瑪莎

人去問夏阿婆即知啊！

△

敲門聲

瑪莎

夏阿婆，𠊎係瑪莎啦！

△

開門聲

夏婆婆

請入來、請入來。大家好，這兩個細子係𠊎个屋邊。

小朋友C

你人好……

阿姨

夏阿婆，時間到位啊，𠊎人愛轉去啊。

夏婆婆

寬行、寬行！

馬丁

夏阿婆，你屋下今日恁鬧熱，來足多人客，佢人係麼儕啊？

夏婆婆

𠊎毋識。毋過，䀴起來人攏毋會䆀。

瑪莎

欸？麼个意思啊？仰子會有生份人來你屋下？

夏婆婆

哦！因為𠊎加入一個「輪流做人客」个社團，大家品好，輪流去別儕屋下做人客。

瑪莎

夏阿婆𠊎來拁你鬥洗盤！遐聽起來足心色个，𠊎嘛想討參加。𠊎佮意做人客，嘛佮意有人客來𠊎屋下。

夏婆婆

加入个條件真嚴，愛通過安全審核，猶愛自家一儕蹛。你人个條件攏無合。

馬丁

恁哦！

O.S

馬丁聽聽个，毋知愛講麼个。這款條件得佢有一兜仔艱難，因為這表示夏阿婆擱有來拜訪个新朋友，攏係自家一個人蹛。這時正有瑪莎，猶大大嘴在食雞卵糕，一兜仔攏無感覺這有麼个問題。
鬥底馬丁會做一兜麼个，得艱難个心情消失咧？愛直頭準時收聽即會知啊！