詔安腔｜馬丁瑪莎還有夏婆婆 (七)

O.S

在這個小鎮內，有一火灶蹛一對阿哥阿妹，阿哥馬丁佮意䀴書，阿妹瑪莎有一頭虬虬个長頭那毛。佢人猶有一個屋邊―夏阿婆。在上一集个故事內底，馬丁个二手拍賣會滿足成功，來交關个人客攏隨滿意个笑容轉屋下。今日討分享个故事係「瑪莎想討做戲」。鬥底瑪莎想討做麼个戲？得人作垺聽三個好朋友之間个故事。

△

小孩嬉戲打鬧的聲音

O.S

逐個小朋友攏有頭佮意个事情，啊瑪莎頭佮意个，即係和阿哥馬丁作垺賞。若係第二佮意个，即係企在舞臺崠，表演得真多人䀴。毋過，到這滿，這正係一個夢想，猶吂實現。

瑪莎

唉，因為傷驚見笑啊。一企起去舞臺，𠊎即會驚見笑到事攏講毋會出來。

O.S

這日瑪莎對著鏡罔唉罔唉，脣頭个馬丁攏有聽著。

馬丁

幾時瑪莎在煩惱這件事情啊，𠊎來想一下辦法！

△

放學鐘聲響

O.S

放學个時，馬丁牽瑪莎个手，路過鎮上个戲園。馬丁好定泥目珠擘到大嫲粒，大聲喝。

馬丁

瑪莎你䀴！戲園門口貼个海報。

O.S

不得了，海報面上寫講：徵求一個五歲个細子來演出後一檔舞臺劇个主角。

瑪莎

馬丁，你敢添放啊，𠊎猶毋識半字啊！

馬丁

𠊎來拁你解說，五歲个細子，講个即係你啊。你較緊去報名，𠊎感覺你真適合做主角，因為你个虬毛，虬到真有特色。

△

快門的聲音此起彼落

O.S

馬丁在夢想—瑪莎精采个表演無定著會真成功，落來即會有廣告公司尋佢翕影片，逐日在電視播出。佢人屋下會有食毋會淨个巧克力、著毋會了个運動鞋……

馬丁

毋好擱踟躕啊，韶日𠊎渡你去參加試鏡！

△

心臟撲通撲通跳的聲音

O.S

瑪莎个心跳足緊个。佢在戲園海報頭前一聽著這個消息，起頭下係真暢，毋過轉到位屋下了後，斟酌想啊想，又緊張到討死。

瑪莎

無定著主角愛背九九乘法，𠊎嗄毋會；抑係主角定著愛會貶輪轉，𠊎擱較毋會。

馬丁

親愛个瑪莎你毋使擘心，頭下𠊎打電話去問過阿玲姊啊。佢講主角正愛講好臺詞，毋使貶輪轉。

瑪莎

臺詞？

馬丁

著，臺詞，毋使擘心，𠊎會用鬥相共你練習。

瑪莎

毋過，問題毋係在背臺詞啊。

馬丁

毋使驚，𠊎會和你做伴！

△

吵雜的人聲

O.S

翻轉日，馬丁揪瑪莎入戲園。一䀴著有十外個小朋友當在等導演試鏡，瑪莎驚到頭那毛擱較虬啊。

瑪莎

馬丁，人轉去啦。

馬丁

你敢毋係一直想討做戲？仰子你个熱情消風去啊？

瑪莎

其實，𠊎在生份人面前真驚見笑。一企起去舞臺，𠊎驚會一句事嘛講毋會出來。

馬丁

幾時係恁哦。無要緊，後下定著猶有別個機會。

玲姐姐

馬丁瑪莎，較緊過來報到，黏時即討面試啊

馬丁

阿玲姊！請問劇本內底敢有驚見笑个角色？會用得瑪莎來做。

玲姐姐

嗯……現時个劇本內底無。

馬丁

恁哦，勞力阿玲姊！

O.S

遐日離開戲園个時，瑪莎頭那犁犁，真誠毋盼，向戲園外行，兩儕恬恬行轉屋下。䀴著瑪莎討唩討唩个形，馬丁無講事，正係搭佢个肩頭拁安慰。

△

跑步聲

玲姐姐

你人等下！瑪莎，你猶想討上臺表演無？

馬丁

毋過，瑪莎會驚見笑。佢一句臺詞嘛講毋會出來。

玲姐姐

無問題，導演有拁劇本改莫啊。這齣戲猶愛一個驚見笑个配角。自頭到尾企在臺崠驚見笑即會用啊。

△

心臟撲通撲通的聲音

瑪莎

𠊎會用！

O.S

在新戲討做个遐日，鎮民攏走去䀴，大家攏講……

校長

透底毋識䀴過恁驚見笑个配角。

阿姨

這齣戲實在係足成功个。

夏婆婆

無毋著，無毋著，實在足成功个！

O.S

幾時夏阿婆係這齣戲个導演，佢在幕後直直頕頭微笑，歸下佢攏䀴在目內。瑪莎係一個愛做戲个小朋友，啊夏阿婆嗄係一個佮意好故事个大人！夏阿婆實在多才多藝。佢這個老儕猶會麼个係毋知个咧？得人擱期待後一集！