詔安腔｜馬丁瑪莎還有夏婆婆 (六)

O.S

經過上擺个作業―屋邊訪談表了後，知夏阿婆自家蹛有一兜煩惱。今日討分享个故事係「馬丁買一送一」。鬥底馬丁討賣麼个、送麼个得大家咧？得人作垺聽三個好朋友之間个故事。

O.S

這日，馬丁在門口掛一個牌，面上寫講：一日商店！毋管買麼个，歸下買一送一。

馬丁

嘿咻，前幾下日𠊎跈阿怙、阿依整理屋下，清出真多早即無討擱使用个物件，準備辦二手物大拍賣，這係愛惜物資个好方法。

瑪莎

買一送一，恁會了錢無？

馬丁

哈哈哈，保證毋會，另外大家會買到真歡喜。你想討做副店長無？請鬥相共企在門口和人客相借問。

瑪莎

好啊，毋過……𠊎愛仰子做咧？

馬丁

真簡單，你像𠊎恁大聲喝「來哦來哦！買一送一」，恁即好啊！換你試䀴望

瑪莎

來哦來哦～歸下買一送一哦～歡迎參觀。

馬丁

瑪莎，你足會个！恁即著啊！

O.S

夏阿婆嘛來店內罔踅，這䀴遐䀴、擇來擇去，毋過頭尾嗄雙手空空行出來。

瑪莎

欸？夏阿婆，你仰子攏無買咧？

夏婆婆

因為𠊎麼个攏無欠啊。

馬丁

恁哦，無買無要緊，歡迎䀴望！

小安

你好！𠊎討買這盒新个蠟筆！

姑姑

哎呀，馬丁這敢毋係細漢時个樵疊？𠊎買來得你表阿妹賞。

O.S

雖然夏阿婆無買物件，毋過有人買一袋阿依種个蘋果、一套阿怙个工具箱，和一本瑪莎个立體書，大家一個個行出來，做一下嘴笑鼻噳。

瑪莎

欸？馬丁你頭下毋係講買一送一？仰子小安提一盒蠟筆、阿姑擐一包樵疊？買一，仰子無送一？馬丁你勢毋著啊啦！

小安

係買一送一無毋著哦！嘿嘿！

姑姑

係買一送一啊！哈哈！

小朋友C

正經係買一送一，真會和。

夏婆婆

恁好空哦！恁𠊎來尋䀴望敢有胖比好用个物件。

馬丁

夏阿婆你買這粒細粒球，會用得胖比躐來賞。

夏婆婆

這個想法毋會䆀。毋過，𠊎猶有問題，買一送一，係毋係買這粒球，你會擱送𠊎一粒球？

馬丁

毋係加送一粒球，係比球擱較好个物件哦。

O.S

結果，馬丁講討送个，有影得夏阿婆真滿意，即攬胖比和一粒球笑噳噳行出去啊。

瑪莎

哇，連夏阿婆攏買啊？馬丁，𠊎嘛會用買一送一無？

馬丁

請入來，𠊎拁頭好个物件留得你啊。

瑪莎

有影無？係麼个好物？

馬丁

係……

O.S

馬丁用手指頭比啊比自家。

馬丁

係𠊎啊，猶擱毋使錢哦。

瑪莎

假使買一個你，愛加送麼个？

馬丁

買一個日時頭个𠊎，擱送一個夜時頭个𠊎。

瑪莎

幾時係恁哦。所以，頭下你送个攏係……

馬丁

哈哈哈，無毋著，買一盒蠟筆，送一個馬丁，恁正有朋友和你作垺畫圖。

瑪莎

𠊎知啊，買一袋蘋果，送一個馬丁，恁炕好蘋果派，正有朋友和你作垺食。

馬丁

係啦、係啦，你講个無毋著。

瑪莎

𠊎想夏阿婆一定嘛佮意胖比賞球个時，有送一個馬丁，在草坪和胖比作垺走來走去。這個買一送一个等路，有影毋會䆀呢！

馬丁

有影無毋著！