詔安腔｜馬丁瑪莎還有夏婆婆 (五)

O.S

在這個小鎮內，有一火灶蹛一對阿哥阿妹，阿哥馬丁佮意䀴書，阿妹瑪莎有一頭虬虬个長頭那毛，佢人猶有一個屋邊夏阿婆。今日討分享个故事係「屋邊訪談表」。訪談表面上攏寫一兜麼个咧？得人作垺聽三個好朋友之間个故事。

馬丁

緊急事件、緊急事件！

瑪莎

鬥底發生麼个事情啊？

馬丁

𠊎人今日轉屋下个功課，係完成「屋邊訪談表」。先生講現代人早即失去敦親睦鄰个好風氣，所以出一份功課得𠊎人，題目係：希望有爺母做伴，尋機會拜訪屋邊，會用增進和屋邊頭尾个感情。

媽媽

真好啊，等阿怙轉屋下了後，𠊎請阿怙打電話得夏阿婆，問佢个意思。希望會用在這個拜六禮拜，邀請夏阿婆來屋下作垺食飯，順續做訪問，你講好無？

馬丁

足好个！勞力阿依！

媽媽

毋使細義

爸爸

夏阿婆你好，這個拜六禮拜𠊎人想討邀請你來𠊎人屋下食飯，馬丁想討採訪你个生命故事。

夏婆婆

毋會用！

O.S

聽著夏阿婆講毋，馬丁和瑪莎攏目珠擘到大嫲粒，連阿依嘛掣一下。

夏婆婆

𠊎毋會用去你屋下。想討訪問𠊎，你人即來𠊎屋下。

爸爸

好、好，𠊎正擱請馬丁和瑪莎作垺拜訪你。

O.S

禮拜日，馬丁和瑪莎作垺到位夏阿婆屋下。這猶係兩姊妹第一擺上門拜訪屋邊咧。

馬丁

瑪莎

夏阿婆你好！

夏婆婆

來來來～請入來！

瑪莎

哇！足香个！夏阿婆，這個香味係你在炕柑子雞卵糕無？

夏婆婆

係啊！為著你人討來特別準備个哦！

O.S

夏阿婆捧雞卵糕和兩杯燒牛乳，猶拁自家泡一杯香香个咖啡。

夏婆婆

嘿咻，好，𠊎準備好啊，會用開始訪問啊。

馬丁

第一題，請問你个職業係麼个？𠊎一直真想討知，夏阿婆以前做過麼个頭路？

夏婆婆

討講哪個？𠊎做過个頭路，有食个、著个、寫个、飛个、猶有講無歇个。

瑪莎

哇，𠊎猶想講夏阿婆一直在屋下煮飯咧。

馬丁

第二題，你細漢時个願望，大漢了後敢有實現？

夏婆婆

哈哈哈，這題傷難啊，𠊎早即添放細漢時敢有願望啊。你人有無？

瑪莎

𠊎、𠊎、𠊎，𠊎个願望係頭那毛毋好傷虬，堵堵好即好。

馬丁

𠊎大漢了後想討做外交官。𠊎人个願望攏猶吂實現！第三題，你這滿頭大个煩惱係麼个？

夏婆婆

𠊎無煩惱啦，𠊎又毋係細子。

馬丁

大人嘛有大人个煩惱啊。

瑪莎

即係講啊！夏阿婆，𠊎真想討知，你个屋下人咧？仰子你一個人蹛？你敢毋會煩惱？

夏婆婆

嗯……

O.S

䀴來這個問題夏阿婆無幾想討回答，佢啉了頭尾一口咖啡，淡淡个講

夏婆婆

有个離開啊，有个在外國。自家蹛正好，自由。

O.S

夏阿婆屋內客廳个壁崠相片掛到淰淰，面上排个逐張攏係大合照，應當係佢个屋下人，相片內底个夏阿婆笑到足歡喜；下腳排正有夏阿婆和胖比，翕到歪歪斜斜，馬丁感覺真有可能係自家翕个。

夏婆婆

好啊！訪問做好啊，𠊎切一大垤雞卵糕得你人隨轉屋下，自家蹛唯一个缺點，即係雞卵糕炕炕个嗄食毋會去。

馬丁

哇！勞力夏阿婆！

瑪莎

自家一個人蹛敢正有一個缺點？

夏婆婆

啊！猶有一擺𠊎腳㞇著，無法度出門，冰箱嗄空空。好啦，自家蹛有兩個缺點。

馬丁

正有兩個缺點？𠊎感覺根本無法度自家一個人蹛，因為有傷多缺點。可比像，若係無瑪莎聽𠊎講古，𠊎歸屎肚个故事討講得麼儕聽？

夏婆婆

嗯……你講了嘛著，得𠊎想䀴望……

O.S

這滿个夏阿婆，䀴起來親像有一兜仔煩惱啊。馬丁想，這第三個題目，佢愛仰子寫夏阿婆个回答較好？畢竟，天下敢正經有人正有兩個煩惱定？想討知夏阿婆和馬丁、瑪莎擱較多个故事，定著毋會用閬過後一集精彩个內容哦！