詔安腔｜馬丁瑪莎還有夏婆婆 (四)

O.S

在這個小鎮，有一火灶蹛一對阿哥阿妹，阿哥馬丁佮意䀴書，阿妹瑪莎有一頭虬虬个長頭那毛，佢人猶有一個屋邊夏阿婆。今日討分享个故事係「渡著一二三去旅行」，得人作垺來聽這三個好朋友之間个故事。

O.S

小鎮內有一間戲園，這站當在做舞臺劇《渡一二三去旅行》。

老師

情節真感心，值得來觀賞。

小朋友C

係啊，無䀴著即真無採哦！

瑪莎

唉，正經足想討䀴這齣戲。

馬丁

毋過，人个所費早即提去買細尾魚和烏龜啊，愛等到後個月正有所費好買票。

瑪莎

唉唷，𠊎艱難到頭那毛攏虬起來啊。

瑪莎

毋過馬丁，這齣戲个戲名仰子喊做《渡一二三去旅行》啊？

馬丁

𠊎臆係因為有一隻皮箱、兩領衫褲、三張車票。

瑪莎

𠊎猶想講係一支牙筅、兩條手巾、三條面帕咧。

O.S

䀴起來兩姊妹攏有自家个想法，毋過佢人對雙方个答案攏無滿意。

O.S

這日放學了後，馬丁和瑪莎手牽手行到戲園門口。負責賣票个阿玲姊對佢人手擛啊擛。

玲姐姐

馬丁瑪莎，𠊎先借錢得你人啦。你人敢毋係真想討䀴這齣戲？

馬丁

毋會用、毋會用，阿怙毋得𠊎人儘採拁人借錢。勞力阿玲姊！

瑪莎

欸，馬丁，若無人會用偷偷跈在大人後背，偷偷跈入去䀴啊！

馬丁

毋會用啦，人又毋係賊。

瑪莎

唉，𠊎急到頭那毛攏虬起來啊啦。其實𠊎嘛感覺「偷䀴戲」這個方法無好……。

馬丁

有啊！人自家來趁錢買票啊。

瑪莎

趁錢？仰子趁？

O.S

兩儕討論了一暗夜，想出一個真好个趁錢方法，遐即係做戲得人䀴。

瑪莎

耶！𠊎歡喜到頭那毛擱較虬啊！好哦，𠊎負責賣票，你來做戲。

馬丁

無問題！

O.S

翻轉日下晝佢人在戲園外个小廣場，排一張細張桌，桌崠囥紙箱改个小戲臺，擱有馬丁拗个紙偶，準備做「小小指偶劇」。馬丁因為愛䀴書，知真多故事，堵好會用演得小朋友䀴。

瑪莎

大家請先買票，一個人十箍。

小朋友A

吓？愛錢哦？𠊎無錢

小朋友B

𠊎个所費係用來買牛乳个。

O.S

馬丁个戲臺前空空無人，瑪莎準備收錢用个罐子嘛係空空。兩儕面對面，大大聲敨一口氣。

馬丁

唉，𠊎拁事情想到傷簡單啊。

O.S

即在馬丁企起來，討收指偶个時，小朋友好定泥又擔凳轉來啊，猶歡頭喜面个拁手頭个十箍交得瑪莎。

小朋友A

𠊎想討䀴戲！這係買票个十箍哦。

小朋友B

𠊎嘛討！𠊎嘛討䀴！

瑪莎

馬丁你䀴！觀眾攏來啊！

馬丁

哇～仰子大家好定泥攏來啊！

△

罐子叮叮咚咚的響亮聲！

瑪莎

勞力、勞力！自家尋所在坐落來哦！

馬丁

故事即討開始啊！即在無幾遠个所在，有一個頭那毛真虬个細漢妹子，名喊做瑪莎小公主……

瑪莎

哇！馬丁真慶，猶會自家編故事，大家攏聽到真入神，目珠擘到大大擱圓圓。

O.S

佢人攏無發現，在無幾遠个所在，樹下有一個阿婆嘛聽到真入神，幾時遐個老儕係夏阿婆呢。佢个皮包內底，頭下十箍銀角仔裝到淰淰，這滿嗄係空空。

馬丁

續落𠊎討擱講第二個故事啊！有一個老阿婆出門，準備渡一二三去旅行……

小朋友Ａ

小朋友Ｂ

一二三係麼个？

小朋友Ａ

係一粒蘋果，兩垤麵包，三個人係無？

小朋友Ｂ

抑係一個人，渡兩隻狗，猶有三隻貓咧？

瑪莎

哈哈哈！正毋係咧！

馬丁

答案係：一粒良善个心，兩粒真興个目珠，和三個會鬥相共个好朋友啦。

小朋友Ａ

小朋友Ｂ

幾時係恁哦。

夏婆婆

哈哈哈，馬丁這個細子真𠢕編故事！這兜故事真好聽！

O.S

愛䀴書个馬丁，為著得阿妹瑪莎䀴會起，所以自家編了足多精彩个故事得大家䀴；擱較要緊个係，夏阿婆嘛係佢个知音，嶄然佮意佢創作个戲齣咧！鬥底這三個好朋友了後會發生麼个心色事咧？人作垺來期待！