詔安腔｜魔法的秘密 (十五)

O.S

前提概要：自團長坐枷了後，團長阿女做強尼先生个得力助手，用心學習照顧強尼先生个動物朋友，大家共心協力表演，為著傷動物打拚儉醫藥費，逐儕學習仰子去愛，打拚變做一個用「心」打造世界个人。

團長女兒

強尼先生𠊎讀書轉來啊！今日人討在馬戲團內底，表演麼个魔術咧？

強尼先生

當然係和人个動物朋友作垺表演啊！你猶記得𠊎拁你講過个事無？

團長女兒

記得！你講愛學習仰子照顧動物，照顧膴身脣頭要緊个動物伴，正會用做一個稱職个表演者！

強尼先生

你講个無毋著！

團長女兒

強尼先生，𠊎猶發現，人準講毋係真難个把戲，觀眾猶係舞到笑壞壞，係仰子咧？

小朋友A

𠊎知係仰子！因為若係買票入場，即有機會得強尼先生點名，邀請上臺表演啊！

小朋友B

著啊，猶有麼个比這擱較刺激个咧？為著在臺崠有好个表現，大家攏全然拚勢偷偷練習咧。

強尼先生

哈哈哈，大家準備好吂？今日暗夜个魔術秀，黏時討開始啊！𠊎希望準講無透過催眠，大家嘛會用在舞臺崠，大膽做頭佮意个自家，大範表現頭好个自家，行出布篷个時，逐儕攏會歡頭喜面，即像魔法共款！

O.S

日子一日一日過去，妹子和強尼先生透過粉鳥，不時寫批得在枷牢內个團長。

團長女兒

阿怙擱寫批來啊！阿怙這擺在批內底寫麼个咧？

馬戲團長

𠊎總算知，歡喜有分真多種，歡喜無應當發生在傷害別儕个時，希望𠊎會用量早加入你人个表演，為大家隨來正經个歡喜。

團長女兒

𠊎足思念阿怙个，著啊，強尼先生，麼个係你心肝內正經个歡喜咧？

強尼先生

𠊎識想過無人著傷、無人會流目汁即係歡喜，毋過…恁个歡喜，䀴著若像真福氣，其實真孤單。頭得人直頭回想个恬恬會笑中含淚；頭疾个空嘴會得人擱較堅強，所以，對𠊎來講，正經个歡喜係知，即算心會著傷，猶係愛打拚相信有愛个可能。

強尼先生

恁你咧？你个歡喜又係麼个？

團長女兒

𠊎以前想討和阿怙共款做空中飛人，馬戲團解散了後，這滿，早即無團員會用教𠊎仰子飛，毋過𠊎知，𠊎早即生出翼啊，會用自由飛去逐個所在！等阿怙出來了後，𠊎想討牽阿怙个手行路去讀書，寶惜這個普通又珍貴个願望。

強尼先生

相信你這個願望一定會實現！你較緊寫批回得你阿怙啦！你毋係這個拜六想討去䀴佢咧？

團長女兒

著！

O.S

在一個好天，馬戲團毋使表演个日子，妹子一隻手牽狗么大戇，一隻手攬淰淰个果子籃來到枷牢䀴阿怙，準備討拁佢報告嶄然多个好消息。啊若強尼先生咧？佢一個人企在大草坪遐，對遠方个山谷，行禮擱行禮，佢講。

強尼先生

敬愛个天地啊，𠊎知，無定著𠊎攏無法度學會正經个魔法，毋過𠊎答應你，𠊎會打拚學習去愛，去變做一個用「心」打造世界个人，即像正經个魔法共款！

O.S

即算強尼先生現時無半個觀眾，佢猶係向天地脫帽行禮，一個稱職个魔術師，猶係會等到頭尾一下，向遐日个日頭光和微風行禮，這係歸下魔術師攏知个事，魔法个祕密，即藏在一𥍉下即偷偷發生个時務。這個故事講煞啊，希望這個有關愛个故事，會用得逐個大小朋友隨來燒暖和感動，故事聽煞了後，毋好添放，得人作垺學習用著个方式，愛親愛个動物朋友哦！