詔安腔｜魔法的秘密 (十四)

O.S

前提概要：天光啊，馬戲團團長真緊即愛去巡查局報到，為佢過去對動物做个歸下事情負責，鎮上个居民無了解，仰子愛護動物个強尼先生討為團長咧？團內猶个著傷个動物又愛仰子？得人得人擱拁聽落去！

小朋友A

強尼先生，請起來、請起來！𠊎人有事想討問你！

強尼先生

小朋友𠢕早，你人仰子恁早即來𠊎屋下？

小朋友B

𠊎人聽大人講你得馬戲團團長這個匪類蹛在你屋下，係仰子咧？佢供个老虎險險害著大家个生命呢！

強尼先生

毋過，遐隻老虎無做麼个毋著，敢毋係？

路人甲

哼，無做毋著？你想䀴望，老虎个牙尖尖擱利利，若係發生麼个事情，恁即傷慢啊。馬戲團實在傷危險啊，當時𠊎人根本無應該買票入去䀴。

路人乙

即係講啊。

小朋友A

大人真怪奇，馬戲團傳單面上毋係早即講有動物秀，大人佢人敢毋係早即知會有老虎、大象和熊？

路人甲

這，細子毋識毋好烏白講，總講毋係人个毋著，攏係遐個馬戲團个毋著！

小朋友B

遐敢毋係強尼先生供个粉鳥？佢人个腳若像猶䌈麼个物件呢！

強尼先生

足好个！希望佢人隨轉來个係好消息！

警察

強尼先生，照約定𠊎人討拁團長渡轉巡查局調查啊。𠊎人知你真為朋友，毋過這擺，佢犯个毋著傷大啊，歸國个人民攏知老虎走去這件事，大家攏氣壞壞。

團長女兒

毋過佢人个集光燈，嘛拁小愛驚壞正得佢走到車頭去啊！

馬戲團長

𠊎个乖阿女，勞力你為阿怙講事，毋過阿怙正經做毋著啊，𠊎無應當得這兜動物食苦，巡查，渡𠊎行啦！𠊎个阿女係無辜个，猶擱佢猶細漢，𠊎暫時拜託強尼先生替𠊎拁照顧，好無？

強尼先生

當然無問題，毋過請等下！𠊎進前放出去个六隻粉鳥，隨轉來好消息！

小朋友A

係麼个好消息？𠊎人嘛討䀴！

強尼先生

𠊎進前寫批得一兜獸醫生，請教獸醫生敢有法度鬥相共想辦法，救這兜膴身著傷个動物，佢答應𠊎，會想辦法好好醫佢人，擱拁動物委託得動物保育中心照顧，毋過這筆費用，歸下愛馬戲團來傱錢正會用。

小朋友B

足好个！恁即無動物著傷啊！

馬戲團長

正係，這滿个𠊎愛為這兜事情負責，麼儕來款這兜費用咧？

團長女兒

阿怙，猶有𠊎啊！你毋使擘心，在這站時間，𠊎會好好鬥相共強尼先生，變做佢頭得意个助手，鬥儉動物个醫藥費。

強尼先生

團長，𠊎答應你，在你平安轉來進前，𠊎會好好照顧你阿女和馬戲團，毋會得大家擱受著傷害。

馬戲團長

勞力你人！這滿𠊎總算會用安心啊，恁𠊎先和巡查離開啊。

團長女兒

阿怙再見，𠊎會好好照顧自家，你毋使擘心！

強尼先生

愛仰子儉恁大筆个錢咧？假使佢來替換團長表演，事情會毋會歸下無共？馬戲團布篷內有真好个舞臺設備，門票猶會用鬥相共動物傱必要个醫藥費。

團長女兒

毋過猶个團員攏離開啊，麼儕來上臺表演？

O.S

因為馬戲團堵著暫時歇睏个運命，團長只好拁大家解散。若像聽知妹子个疑問，大戇歡歡喜喜坐竳對天崠嗷嗷吠，大家攏離開啊，毋過猶有佢人啊！若會用相作垺，生命一定尋會著直頭行落个路！鬥底團長阿女和強尼先生，猶有佢个動物朋友，會仰子作垺共心協力，去尋救著傷動物个方法咧？得人擱準時收聽，得著頭新个解救消息！