詔安腔｜馬丁瑪莎還有夏婆婆 (一)

O.S

在這個普通个小鎮內，有一火灶蹛一對阿哥阿妹，馬丁和馬莎，佢人猶有一個屋邊夏阿婆。第一個故事係「月光下个魚塘上。恩人作垺來聽三個好朋友之間个故事。

O.S

馬丁係阿哥，佮意䀴書，䀴著心色个部分即會笑到大嫲聲，

馬丁

哈哈哈，這段寫到真有意思！

馬丁

嗯……這個故事得人真艱難……

O.S

愛䀴書个馬丁，有一個阿妹喊做瑪莎，佢今年五歲，有虬虬个頭那毛，佮意照鏡，歡喜个時會對鏡講……

瑪莎

耶！𠊎歡喜到頭那毛攏虬起來啊。

O.S

無歡喜个時會對鏡講……

瑪莎

唉！𠊎受氣到頭那毛攏虬起來啊。

O.S

兩儕佮意个無幾共款。

馬丁

𠊎愛食鹹个！

瑪莎

𠊎愛食甜个！

馬丁

𠊎佮意青色个襪！

瑪莎

𠊎佮意黃色个帽！

O.S

雖然兩儕佮意个無共，毋過有一件嗄係共款个，即係佢人對蹛在隔壁个夏阿婆攏全然興。

夏阿婆

胖比，行較慢兜、行較慢兜！𠊎硬討跈毋會著啊啦！

O.S

夏阿婆蹛在馬丁和瑪莎屋下隔壁，佢自家一儕蹛，供一隻喊做「胖比」个細隻狗，隔在窗子門外，馬丁和瑪莎會用䀴著佢人逐日散步个形。

瑪莎

欸，馬丁，夏阿婆鬥底幾多歲啊？

馬丁

𠊎臆大討有八十歲啊哦，你䀴佢个面有足多皺紋。

瑪莎

無定著有百外歲哦！因為佢个頭那崠有足多白頭那毛。

媽媽

哈哈哈，你人攏臆毋著啊，夏阿婆今年正七十歲定。

馬丁

七十歲？足老个……。

馬丁

𠊎感覺夏阿婆即像係後背坪个老榕樹，風一吹，樹崠幼長个嘴鬚即在風內飛啊飛，足老、足老。

瑪莎

即係講啊。

馬丁

瑪莎你䀴！這句老儕事真心色，講做「𠊎食過个鹽比你食過个米較多」。

瑪莎

遐係麼个意思啊？

馬丁

意思係講有一兜老儕想講自家年歲大、世面䀴多，比人較會，別儕攏愛聽佢个事。

瑪莎

你敢係講夏阿婆？

馬丁

𠊎嘛毋知夏阿婆个性地仰子，敢會和遐句老儕事共款，想講老即較會？

瑪莎

𠊎嘛毋知呢！

爸爸

嘿！細子啊！較緊來鬥相共阿怙！

瑪莎

係阿怙在喊人！

馬丁

恩人較緊落去！

爸爸

較緊來拁阿怙鬥相共。阿怙討在後背坪摟一個小魚塘，因為阿依想討在遐供鴨么。

馬丁

耶！擱會用供魚。

瑪莎

嘛會用供烏龜。

O.S

夏阿婆毋知幾時嘛來啊，啊擱大大聲出意見。

夏阿婆

咳，魚塘底種蓮花嘛毋會䆀哦。

馬丁

老即較會？

夏阿婆

無適合供鴨仔，𠊎細漢時得鴨仔啄過，真疾。

瑪莎

唉，老即較會？

爸爸

你講到真有理。供鴨仔有真多雜事愛做，哪儕討去拚掃清理，哪儕討去飼？

媽媽

𠊎嘛贊成，因為𠊎和照顧一隻鴨仔个時間嘛無。

夏婆婆

係啊！其實，頭好麼个攏莫供。空空無半件，正有一窟清水，幾好咧。

爸爸

媽媽

勞力夏阿婆个意見！

O.S

鬥底魚塘內會用供麼个咧？阿怙、阿依正經會聽夏阿婆个事，麼个攏毋供？得恩人作垺來䀴望後一集，馬丁、瑪莎屋下个魚塘鬥底會變做仰子！