詔安腔｜魔法的秘密 (九)

O.S

強尼先生堵著馬戲團團長个阿女，兩儕嗄開始相爭，仰子有時務歡喜會係一件毋著个事情？鬥底馬戲團團長堵過麼个事情，正得佢變做這滿恁咧？得亻恩人擱拁聽落去！

O.S

馬戲團團長享受像海湧共款个熱情拍手聲。

馬戲團長

䀴啊！𠊎訓練動物个表演得著大家真大个歡迎，毋過𠊎猶係想毋會透，仰子大家會恁迷魔術師个催眠咧？敢講，佢人無認為遐係一場失敗个表演？唩敢毋係一件得人艱難个事？仰子大家嗄著面流目汁、著面微笑拍手？哎，𠊎毋管啊！今日暗夜觀眾个笑聲得𠊎真風神啊！佢啊，若係拁紅鼻戴起去，擱較大个問題攏毋係問題嗄係心色个遊戲！

O.S

這個時務个團長，目珠和心內正有一個目標，即係渡大家行入一個歸下無共个世界，享受馬戲團布篷內正會有个奇妙時務。

團長女兒

阿叔你䀴！𠊎阿怙接落來討表演空中行鋼索咧！

小朋友A

真驚人！佢仰子敢在鋼索面上搖搖晃晃行？

小朋友B

𠊎毋敢䀴啊啦！佢若係跌落來愛仰子？

強尼先生

哇，你阿怙仰子想會出來戴紅鼻行鋼索？足真心色个！

團長女兒

阿怙講，這個靈感，係對佢細漢時个回憶來个。遐時務，逐擺若係表演个票賣毋會淨，阿公總會無歡喜…。

團長父親

唉，𠊎愛仰子做正好咧？票攏賣毋會出去，無賣票即無飯食啊。

團長父親

好佳載，𠊎猶有一個神奇个寶物，拁戴起來，𠊎个心情即會加足好个！

小團長

哇！逐擺阿怙若係無歡喜，拁紅鼻戴起去 ，雄雄即會若像變做猶一個人，腳步輕輕，面面上猶帶著微笑。遐粒紅鼻面上一定有魔法！

O.S

小團長藏在門後背，透過門縫，䀴著阿怙个心情對壞變好，即像魔法共款。

小團長

𠊎嘛討來戴紅鼻䀴望！欸？仰子麼个事情攏無。魔法仰子無效啊，係因為𠊎毋罅乖係無？抑係毋罅巧神？阿媽、阿媽，這個世界敢正經有魔法？

阿婆

戇細子，這個世間，當然有魔法啊！毋過正有目內有光个人知魔法个秘密。

O.S

阿媽雙手打開，溫柔个拁小團長攙蹛。

小團長

光？𠊎又毋識䀴過，愛去哪位尋目珠內个光？

阿婆

你斟酌拁想望，你敢正經毋識䀴過？

小團長

呣…

O.S

小團長用頭腦想啊想，頭那底阿怙个目珠嗄𥍉一下，阿怙个目內有影有佢無个光。

馬戲團長

恁講來，遐個魔術師嘛係一個目珠會發光个人，唉，等到表演煞啊，正擱好好拁佢會失禮。大家勞力、大家勞力！勞力你人恁佮意暗夜个表演，恩人後次擺正擱來尞！

O.S

這個暗夜毋係正有團長想起細漢時个自家，強尼先生嘛係想起有一個阿妹問佢…

小女孩

強尼先生，歡喜，仰子會係毋著个？

O.S

聽著這個問題強尼先生戇去啊，共款想起細子時。遐係一段和粉鳥有關个回憶。

小強尼

哈哈哈，你這兜牛頭細子，等下出外訓練个時愛較細義兜，毋好尋毋會著轉去屋下个路哦！

O.S

逐個人攏識係一個細子，鬥底強尼先生細漢時，識發生仰子个故事，正會得這滿个佢，盡心盡力做一個寶惜動物个魔術師？記得準時收聽，得亻恩人作垺聽古，和強尼先生作垺大漢！