詔安腔｜魔法的秘密 (八)

O.S

因為舞到觀眾唩出來，得馬戲團團長攔落臺个強尼先生，意外發現一種神奇个動物當在㐁佢，這隻動物無成獅子，嘛無成老虎，鬥底係仰子个動物，亻恩人擱拁聽落去！

強尼先生

阿依哦，這鬥底係麼个動物啊？無成獅子，嘛成老虎，𠊎自一溜嘛毋識䀴過恁个動物。

團長女兒

噓，細聲一兜，佢喊做跳跳，跳跳真無膽，你恁大聲會驚著佢个。

強尼先生

佢、佢毋係老虎齁？

團長女兒

毋係

強尼先生

佢嘛毋係獅子？

團長女兒

跳跳毋係老虎嘛毋係獅子，佢係跳跳，歸世界正有一個佢。

O.S

聰明个跳跳聽著自家个名，隔著欄杆，頭那偎凴在妹子膴身張樣，佢頭佮意妹子喊佢个名。

強尼先生

正係，猶个動物攏愛上臺表演，佢仰子猶留在這，敢講佢毋使上臺表演？

團長女兒

阿怙講過，跳跳會用毋使上臺表演，大家若係䀴著世間唯一个跳跳，即會擊錢起來得佢，根本毋使表演，即會用拁𠊎人鬥趁錢。

路人甲

哇！這隻動物麼个都無成，生著真怪奇！

路人乙

著啊，即像怪物共款，亻恩人擊錢得佢，無定著下个願會實現咧！

路人甲

路人乙

欸欸！怪物，䀴𠊎人這裡。

強尼先生

細阿妹，𠊎想起來啊，這隻動物喊做獅虎，恁違反自然規則个動物係人類挑持做出來个，對降出來个遐時務起，即愛忍受真多个艱難，䀴佢彎彎个背脊骨、跛跛个後背腳即知，𠊎實在想無，仰子人類會恁粗殘得跳跳降出來？

團長女兒

阿叔，無想著你猶識真多！無毋著，跳跳即係獅虎！

強尼先生

唉，著啊，細阿妹𠊎猶有一個問題，你，毋使讀書哦？

團長女兒

這跡位即係𠊎个學校啊！𠊎人恬恬愛去無共个城市表演，所以𠊎總係讀無幾久即愛轉學。毋過無要緊，阿怙講，馬戲團即係𠊎个大學校，𠊎會用在這學著比學校擱較多心色个事情！

團長女兒

𠊎後下嘛討像阿怙共款上臺表演，𠊎愛學會仰子在天崠飛，做一個真𠢕个空中飛人！

團長女兒

毋過在這進前，𠊎愛先好好拁大家換水、換食物正會用。著啊！阿叔，𠊎人後禮拜猶愛迎接細阿佅咧。

強尼先生

哇！細阿妹恭喜你，細阿佅係阿弟抑係阿妹？恭喜你，你真緊即討做細阿姊啊。

團長女兒

唉唷，阿叔毋係啦，你足好笑个，𠊎講个係紅毛猩猩个細阿佅啦。

強尼先生

細阿妹，這係毋著个事情。

O.S

強尼先生知，雖然佢無清楚這間馬戲團个內情，毋過擱恁落去，毋知有幾多動物會因為這間馬戲團來食苦。

團長女兒

阿怙講過觀眾會笑，表示大家歡喜，歡喜係好事啊，仰子會係毋著个事情咧？阿叔你正經真怪奇！

O.S

強尼先生猶毋會赴回答細漢妹子个疑問，這時務，布篷內掌聲拍拍咈，歸下係嗶仔聲和歡喜个喝咻聲，有團長來渡，今日暗夜个表演，成功激起第二波高潮。仰子強尼先生講馬戲團做个事，係毋著个咧？得觀眾歡喜大笑有麼个毋著？想討知問題个解答，記得準時收聽，作垺在故事內底尋愛个答案！