詔安腔｜魔法的秘密 (七)

O.S

得強尼先生施展過催眠个人，逐個攏進入發夢啊擱在臺崠表演精彩个才藝，精彩个表演舞到大家哈哈大笑，毋過這時臺崠嗄出現睡到落眠又傷痕了了个動物，大家會仰子來䀴這場表演咧？亻恩人擱拁聽落去！

強尼先生

即像大家䀴著个，無遐款麼个完美个表演。這兜動物會用在臺崠表演，係對一擺擺失敗个練習來个，因為恁膴身正會滿哪位攏係傷。

路人甲

係啊，這個簡單个道理，亻恩人仰子會添放去咧？

路人乙

天下哪會有毋會疾个訓練，亻恩人仰子會想討買票入場，䀴恁粗殘个表演咧？

馬戲團長

你鬥底在做麼个？你拁𠊎落臺！

O.S

本底沉醉在觀眾掌聲內个團長，䀴著情形越來越毋著勢，氣壞壞傱到臺崠，硬拁強尼先生拖落臺，表演即恁雄雄擋恬，催眠到真落眠个人醒過來啊，動物嘛一隻隻對發夢內底醒過來。

胖大叔

小男孩

老奶奶

欸？頭下鬥底發生麼个事情，𠊎人仰子會在臺崠？

O.S

對催眠內醒過來个人，一兜仔嘛毋記得頭下个事情。

小男孩

毋過大家攏在拁𠊎人拍手呢！

老奶奶

雖然毋知發生麼个事情，猶係勞力大家、勞力、勞力！

O.S

所以佢人三儕作垺在臺崠手牽手，彎腰拁大家行一個大禮，臺下个拍手聲即擱較熱情。

馬戲團長

你險險即拁𠊎人暗夜个表演舞壞！馬戲團隨得人歡喜和笑聲，頭禁忌有人流目汁，係愛會用得人笑，仰子會用得大家唩咧？你若係擱敢烏白插手，𠊎即無細義啊。表演猶愛續落，今日𠊎即先放你煞，你猶毋較緊走，走到愈遠愈好！

O.S

準講歸屎肚氣，團長猶係斡身對著鏡，敬業个緊整理衫褲和面容，後一場表演黏時即討開始，佢愛上臺表演，無幾多時間會用討債。

強尼先生

歹勢，攏係𠊎个毋著，接落來𠊎毋會擱上臺啊，你較緊倒轉去舞臺上！

馬戲團長

嘖嘖！𠊎正經毋知愛講麼个啊！唉！！！

O.S

自家一儕留在後臺个強尼先生足失志个，佢毋驚團長會仰子來辦自家，驚个係大家遐款無感無覺个心，畢竟，佢用自家一世人个功夫來相輸，無想著猶係無法度喊醒大家對動物个同情，這滿，猶有麼个會用改變動物个情形咧？

強尼先生

唉，𠊎愛仰子正會用得大家關心這個議題咧？

強尼先生

大戇，莫㐁啊，𠊎知你想討安慰𠊎…欸？大戇無和𠊎作垺來啊？恁係麼儕在㐁𠊎？

O.S

強尼先生雄雄擎頭，掣一大下，目前个毋係大戇，嗄係得人關在籠內底一隻無成獅子嘛無成老虎，喊聲又像貓共款喵喵咈。

強尼先生

實在無法度想，天下，仰子會有恁怪奇个動物？這又毋係在變魔法？

O.S

強尼先生聽著自家講出這句事，較緊揞嘴，哪儕攏會用對魔法个有無起疑，正係做魔術師个佢毋會用，想討知強尼先生堵著个，鬥底係麼个動物無？記得準時收聽，得亻恩人作垺掀開神祕个面紗！