詔安腔｜魔法的秘密 (六)

O.S

前提概要：麼个？！幾時馬戲團團長細漢時嘛識相信世間會有魔法，做一個魔術師，強尼先生竟然有一世人會用施展一擺个神奇魔術，鬥底係麼个神奇个魔術咧？得亻恩人擱拁聽落去！

O.S

即恁，強尼先生今日暗夜準備討上臺啊！

路人甲

欸？仰子會係強尼先生

路人乙

喂！𠊎人毋係買票來䀴你變魔術个呢、退票、退票！

小孩A

嘿！強尼先生，今日仰子無渡兔比，敢毋係輪著佢上場表演啊？

小孩B

毋係啦，今日係輪著邦尼！

強尼先生

噓～～～～～～～～

O.S

為著得大家恬靜落來，強尼先生拁高禮帽脫落，行禮擱行禮，一肢手指頭高高擎起，了後囥在嘴脣噓一聲，集光燈照落來，佢白色个手落䀴起來光爁爁。

強尼先生

今日，𠊎討邀請大家和𠊎進行一場特別个魔術表演，若無大家鬥相共，正靠𠊎係無法度表演會好个。

小朋友A

特別？𠊎討參加、𠊎討參加！

小朋友B

你莫吵啦，大家攏想討䀴著特別个奇蹟。

強尼先生

毋使急、毋使急，一個一個慢慢來，𠊎討尋幾下個肯上臺接受催眠个觀眾。

路人甲

路人乙

𠊎、𠊎、𠊎、擇𠊎、擇𠊎！

強尼先生

來、來，歡迎得𠊎擇著个朋友上臺倒落來，𠊎討用心施展一世人正會用做一擺个強力催眠術！

O.S

有強尼先生个強力催眠，毋管本底內心幾無膽个人，攏會用面帶笑容，頭臥臥自信滿滿行上臺，表演佢人這世人感覺頭風神个事，抑係愛講…佢人感覺自家頭慶个事。

小朋友A

鬥底仰子啊？

小朋友B

你䀴！遐敢毋係唱歌嘛會走音个大箍阿叔？佢嗄在臺崠唱歌呢。

路人甲

哇，𠊎攏毋知，蹛𠊎屋下隔壁个細漢囝子，嗄恁會跳芭蕾舞！

路人乙

敢毋係咧？𠊎嘛毋知有年歲个老阿婆，嗄會恁好膽騎單輪个鐵馬！

O.S

得人催眠个人，遐款盡心盡力毋過又有一兜仔戇侗戇侗个形，舞到臺下大家笑到歪膏洎杈，熱情个掌聲自一開始即毋識擋恬。

小朋友A

會毋會…後一個即係𠊎啊？

路人乙

鬥底後一個得強尼先生催眠个人會係哪儕咧？足期待个！

強尼先生

相信大家攏真期待後一個上臺表演个人係哪儕，答案即係！

路人甲

夭壽哦！遐兜敢毋係傳單面上个動物？佢人仰子攏睡睡去啊？

強尼先生

咳、咳，大家毋使緊張，籠內底个動物早即接受催眠，在自家頭靚个發夢內底睡到真落眠啊。

O.S

強尼先生溫柔个拁一隻隻動物挲挲个，挲挲老虎燒著傷个背脊、挲挲大象遐企毋會直个腳目猶有細隻熊熝著傷个腳蹄。

小朋友A

佢人足苦憐个…

小朋友B

著啊，膴身攏係傷…

O.S

歸身傷个動物，正係企在舞臺崠，即餳著大家歸下个目光，在遐時務，大家嗄攏添放去，自家係買票入場，等討䀴精彩个馬戲團表演。䀴著睡到落眠个動物，仰子大家會感覺傷心、艱難？假使係你，猶會想討䀴動物來表演个馬戲團無？強尼先生个催眠魔術，鬥底敢有成功拁大家對動物个愛喊醒，記得準時收聽，作垺來享受故事！