詔安腔｜魔法的秘密 (五)

O.S

前提概要：強尼先生為著救遐陣動物朋友，嗄拁馬戲團團長講，希望得自家會用上臺表演，好替換老虎、大象和細隻熊上臺表演，佢有麼个好本等？得亻恩人擱拁䀴望！

強尼先生

無講你毋知，逐個魔術師攏有一世人正會用施展一擺个神奇魔術，即像魔法共款，相信，這毋會得觀眾大家失望，無定著猶會變做馬戲團个經典表演咧。

馬戲團長

哦？無定著，這個魔術師正經有麼个本等嘛無定著。毋過𠊎有一個條件！若係臺下有一個觀眾對今日个表演無滿意，在遐噓噓咈…

馬戲團長

你即愛用你一世人粒積个財產，來賠𠊎人馬戲團歸下个損失，包含你个粉鳥屋、兔籠猶有狗屋，逐件𠊎攏愛。

強尼先生

無問題！毋過，仰子團長你肯答應𠊎無理个要求咧？

馬戲團長

無講你毋信，𠊎細漢時，嘛識係一個相信魔法个囝子，比麼儕攏猶較相信世間有魔法，所以𠊎大漢了後，正會拁歸個馬戲團買起來，隨得大家想毋會到个表演，希望會用變做這個世界，頭接近魔法个馴獸師！𠊎拁你講一個故事…。

O.S

遐係團長猶毋係團長个時，遐時務个佢猶細漢，小團長个目珠內總有星光在𥍉，相信世間正經有魔法。

老奶奶

𠊎个細漢囝子，𠊎相信你，你安心个、大膽个編一個魔法个夢啦！你愛知，世間，若係有一個人肯相信自家，即會用在內心挶大嫲個个勇氣。

O.S

因為阿媽恁相信自家，見若小團長對自家和世界內心起嫌疑，即會打開雙手攬自家，嘴底著面講─

小團長

「毋使驚、毋使驚，𠊎相信世間个某個所在，一定會有魔法」

O.S

毋過，大漢了後个團長，早即真久、真久無恁做啊。這敢係因為心會跈人大漢啊即變到較勇較毋會驚啊？毋係哦，係團長添放去啊，面對猶毋知个世界，會用大大方方承認自家會驚。

馬戲團長

所以𠊎真想討知，鬥底麼个係一世人正會用使用一擺个魔術？仰子你堅持用歸世人个心力換一擺上臺表演？𠊎仰子想嘛想毋會透，所以決定放手得你試䀴望，擱較仰子，準講大家無滿意今日暗夜个表演，猶會係馬戲團有一無二个回憶。

強尼先生

勞力你！𠊎毋會得你失望！

O.S

麼个？強尼先生討在馬戲團个布篷內上場？小鎮个居民敢會用接受鎮上个魔術師表演魔術嗄毋得動物表演？敢會有人會要求退票，毋肯䀴表演咧？想討知續落个精采故事，愛記得準時收聽，為強尼先生加油、鼓勵哦！