詔安腔｜魔法的秘密 (四)

O.S

前提概要：因為想討䀴馬戲團表演，強尼先生和愛狗大戇，偷偷傱入馬戲團个後臺，嗄得佢人發現料想毋會著个情景，內底關足多隻著傷个動物朋友，鬥底發生麼个事情？得亻恩人擱拁聽落去！

O.S

偷偷傱入馬戲團後臺个強尼先生，親目珠䀴著關在鐵籠內，準備上臺表演个動物，一兜仔嘛無成印在傳單面上恁有活力个形，空氣內飄來毋知係鐵生鉎抑係血个氣味。

強尼先生

唉，鐵籠內底老虎个唩聲，猶有遐雙目屎膏淰淰个目框，得佢䀴起來即像貓么共款委屈，𠊎足想討放佢走个。

大傻

主人，亻恩人若擱毋走即毋會赴啊！

強尼先生

擱直頭恬在這，𠊎嘛無法度鬥相共麼个，大戇亻恩人先轉來去啦！

O.S

遐日暗夜，強尼先生在眠床崠貶來貶去，仰子睡嘛睡毋會去，較想嘛攏係一隻隻關在籠內底个動物，暗夜个月光過頭光，拁佢眨核核个目珠，和軟柔个心晟著傷。

強尼先生

有啊！大家！𠊎想著一個無通比，搶救動物朋友个好辦法啊！

強尼先生

打先，愛著𠊎魔術秀正式表演个燕尾服。

O.S

強尼先生行到屋崠个粉鳥屋頭前，起頭下，粉鳥䀴著強尼先生行上樓，猶想講今日討進行魔術表演，佢人逐個胸坎氣入到飽飽，耐心等強尼先生來擇自家咧！

強尼先生

細子，今日亻恩人無討上臺表演，毋過若無你人，這擺魔術秀共款變毋會成哦，𠊎愛你人拁𠊎送批，越緊越好，知無？

O.S

強尼先生在佢人个腳面上䌈批紙，巧神个粉鳥，逐個攏備辦好勢，翼大力擛 ，大膽接落送批个任務。

強尼先生

希望大家順行！若係批會用順利到位，恁即滿足好个，粉鳥攏出發啊，接落來換𠊎上場啊！大戇亻恩人行！

強尼先生

你好，請得𠊎替老虎、大象和細隻熊上臺表演！

O.S

等大戇想倒轉來，正發現佢人企在馬戲團布篷外頭，主人強尼先生企竳竳，假影真好膽个對馬戲團頭家講事，狗么大戇輕輕偎在佢略略仔在掣个腳脣，拁親愛个主人加油。

馬戲團長

哈哈哈哈，這實在係𠊎聽過天下頭好笑个笑事啊，你人敢有聽著佢講个事¬？唉唷，𠊎个目汁硬討流出來，你嗄想討替動物上臺表演？

O.S

聽著強尼先生个請求，馬戲團个團員逐個攏屎肚攬蹛笑無歇睏。

馬戲團長

禮拜日係馬戲團个大日子，𠊎人恁辛苦攔來這跡位，即係為著這日个表演。擱講，𠊎人對世界各地千辛萬苦尋來老虎、大象、棕熊這兜野生動物。

馬戲團長

猶愛開真多時間和心力訓練佢人學把戲，即係為著得觀眾買門票䀴到歡歡喜喜。你遐得人䀴毋上目个小魔術，哪有法度滿足大家个嘴斗咧？

馬戲團長

你早即拁𠊎拖著三分十一秒个時間，對𠊎人愛先排練个馬戲團來講，逐分、逐秒攏真寶貴，若聽知即較緊走啦！

O.S

強尼先生會因為恁即打退棚無？強尼先生想討替動物朋友上臺表演个心願，鬥底敢會實現，記得準時收聽，作垺見證故事个奇蹟！