詔安腔｜魔法的秘密 (三)

O.S

前提概要：壞啊、壞啊！馬戲團个表演即討來小鎮啊，恁會搶走強尼先生魔術秀个光采無？仰子大家攏想討䀴馬戲團表演？亻恩人擱拁聽落去！

O.S

自強尼先生對細子遐，知馬戲團即討來鎮上表演个消息，行在路，聽著滿哪位攏係人个講事聲。

路人甲

欸，你人有聽講吂？聽講馬戲團遐領大布篷內底，有比強尼先生變个魔術猶較神奇个把戲，正經若像魔法共款！

O.S

這時務，好定泥一臨怪風吹來，絞起泥下个傳單和落葉，大戇向遐張粉紅色个單那吠那躐過去。

強尼先生

大戇！擋恬、擋恬！遐正係一張傳單定。

路人乙

䀴起來連強尼先生个狗嘛拚緊緊想討去䀴馬戲團表演啊！

小朋友A

強尼先生，你仰子敨大氣咧？

強尼先生

唉，若會用望一下嘛好！𠊎嘛足想討䀴望大家講个「像魔法共款个把戲」鬥底生做仰子，畢竟𠊎恁打拚，想討變做世間頭接近魔法个魔術師，有通接近魔法个機會佢攏毋放莫。

小朋友B

欸？這有麼个困難？若係有買票，儕儕敢毋係即會用入場咧？

強尼先生

𠊎个頭家毋會恁儘採得𠊎請假个。

小朋友A

強尼先生，你莫擘心！遐日無人會來䀴魔術秀个！

O.S

等啊等，強尼先生直頭望馬戲團開演个日子到位啊，像細子人講个共款，遐日暗夜，鎮上無半個人來䀴魔術秀。因為大家做一下走去䀴馬戲團啊！

大傻

主人真怪奇哦，愛上臺表演个日子，仰子渡𠊎出來行，仰子猶行來恁怪奇个布篷咧？

強尼先生

噓！大戇細聲兜，若係得人䀴著𠊎拁魔術秀放莫，走來䀴馬戲團，恁即見笑啊啦！

O.S

幾時強尼先生驚得人發現，所以佢走入後臺，想討偷偷欣賞表演，無想講，強尼先生嗄䀴著佢料想毋會著个情景，著驚到嘴擘擘，毋敢相信目珠前个場景係正經。

強尼先生

阿依哦…有一隻老虎腳跛跛，即恁跳毋會高、行毋會遠；有一隻大象一直流目汁，因為佢个膝頭鑪溜皮、血流流；猶有一隻小棕熊躪腳尾，因為腳底得火熝到膨泡，佢不得不像人類共款企竳行路。

強尼先生

夭壽哦…世間仰子會有恁粗殘个所在…。

大傻

主人亻恩人較緊走！若無即會得人發現啊啦！

強尼先生

壞啊，有人來啊！

O.S

準講想討鬥相共著傷个動物，強尼先生一下子，嗄毋知愛仰子做正好。鬥底強尼先生會仰子救著傷个動物朋友咧？想討知強尼先生个步數，愛記得準時收聽，作垺聽故事，用愛解救動物朋友！