詔安腔｜魔法的秘密 (二)

O.S

前提概要：佮意動物个魔術師強尼先生一個人供足多隻動物，逐隻動物朋友攏係佢上臺表演个好伴，鬥底佮意動物和變魔術个佢，會仰子和動物做好朋友，作垺表演咧？亻恩人擱拁聽落去。

O.S

魔術師強尼先生係小鎮唯一个魔術師，佢个表演總係拁小朋友餳歸陣來䀴，見若強尼先生企在舞臺崠變魔術，細子人總係在臺下發出窸窸窣窣个聲。

小朋友A

欸欸，你臆䀴望今日係邦尼、兔比？哪隻兔子上臺表演啊？

小朋友B

𠊎臆係邦尼~兔比上擺敢毋係表演過啊？強尼先生講過毋會得兔子么佢人傷悿。

強尼先生

真無採，大家攏臆毋著啊，毋過細子遐款真興个心係好魔術个元素之一，少了真興个心，麼个魔術擱精采嘛毋係頭好个魔術，𠊎真歡喜你人對魔術恁興，表演即討開始啊！

小朋友A小朋友B

耶！足期待哦！

O.S

小鎮个魔術，一直攏係鎮上熱門个節目，在真久以前，識有生理人對真遠个大城市聽著好名聲來拜訪，特別上門邀請強尼先生，作垺進行世界魔術巡迴表演。

商人

強尼先生，敢講你無想討得世界各地个觀眾，䀴著你滿足神奇个魔術秀無？

強尼先生

先生真歹勢，𠊎毋會用答應你，因為𠊎屋下个兔子破病啊，愛定期得先生䀴，所以毋會用離屋下傷遠。

商人

麼个？哼！兔子破病有麼个不得了？較加即擱換一隻即好啊？𠊎䀴你係老狗變毋會出新把戲！毋敢接受這個天大个任務。

強尼先生

大戇，𠊎知你在拁𠊎抱不平，無要緊啦，你敢知？亻恩人今日个魔術真成功，臺下有足多細子笑啊。

O.S

對強尼先生來講，佢毋使歸世界踅透透去表演，毋使得歸世界个人知佢係哪儕，若係臺下个細子佮意佢个表演，佢即感覺嶄然滿足，這即係佢留在小鎮，一擺擱一擺个為鎮上細子變新魔術个原因。

O.S

逐晨早，強尼先生攏會渡大戇去公園行行个，這日，大戇个心情滿足快活，為著自家係強尼魔術个人感覺歡喜和風神。

大傻

主人講个無毋著，若係有一個人佮意魔術，恁，表演即算成功啊！若係有一個細子因為內心歡喜即在微笑，定著會用得歸世界光起來！這係麼个感受𠊎知知，即像係在主人轉屋下个時…。

強尼先生

大戇𠊎轉來啊，你今日在屋下敢有乖乖啊？

大傻

𠊎當然乖啊！因為𠊎實在足愛主人个！所以肯忍耐烏白舞个心乖乖顧屋。

O.S

對大戇來講，若係強尼先生一轉來，歸間屋下即會雄雄光起來，大戇猶浸在自家世界个時，遠遠个所在好定泥傳來拚緊緊个腳步聲。

小朋友A

強尼先生，壞啊、壞啊！鎮上來了一個馬戲團，大家攏講佢人个表演比你个擱較精采！

小朋友B

著啊、著啊，若無緊想辦法，你个生理即會得人搶搶去啊！

O.S

這愛仰子正好咧？強尼先生个魔術秀，敢正經會得馬戲團搶走咧？若係搶走了後，強尼先生又愛仰子照顧佢遐兜動物朋友咧？想討知故事精采个劇情，愛記得準時收聽，正會用知馬戲團和強尼先生精彩个故事哦！