詔安腔｜魔法的秘密 (一)

O.S

傳講，世間歸下个魔法攏係人心變个，正係，人心有好有䆀，自然產生了烏、白兩種無共个魔法，烏魔法恬得人䀴做係咒鬼別儕个步數，白魔法即得人感覺係一份燒暖个祝福。

小強尼

𠊎相信，這個世間定著會有安慰人心个白魔法，𠊎感覺變魔術係，這世間頭接近魔法个一件事情。

路人甲

哈哈哈，小強尼又擱在烏白講事啊，這個世界哪有魔法！

小強尼

有个啦！大漢了後，𠊎討變出這個世間頭接近魔法个精彩魔術！

小朋友A

哇！強尼先生，你一個人即供到六隻兔子、六隻粉鳥和一隻狗。你敢無感覺真吵擱真亂？

強尼先生

當然毋會啊！對𠊎來講，這係一首頭靚个樂章，奏出𠊎頭想討愛个三個人生夢想：第一、變出精采个魔術，第二、有寵物做伴，第三、聽著細子人个笑聲。

小朋友B

這三個夢想有輕可無？你毋係早即會變魔術，擱有供動物伴啊？

強尼先生

當然無輕可啊！𠊎逐晨早目珠擘金个第一件事，即愛先飼大家啉水、食早頓，屎肚食到飽飽正有氣力。猶擱，正係拚掃粉鳥屋、兔籠和狗屋，即罅𠊎舞到歸晨早。

強尼先生

哈、哈啾！滿天飛个鳥毛、兔毛和狗毛，恬得𠊎一個一個大哈啾打無歇。

老奶奶

強尼先生你擱過敏啊？𠊎蹛在隔壁攏聽著啊啦！

強尼先生

實在歹勢啦！毋過𠊎正經忍毋會核…哈、哈啾

小朋友A

強尼先生𠢕早！你逐日照顧恁多隻動物敢毋會悿？

強尼先生

毋會悿，毋會悿，𠊎拁狗屋鑢到俐淨俐，𠊎屋下个大戇正會用蹛到快活快活。

O.S

䀴強尼先生辛苦照顧動物个形，一半下會有路過个細子，用一雙金金个大目珠，天天个問著強尼先生。䀴著佢人个目珠，強尼先生若像䀴著細漢時个自家，遐時个佢，想講歸天下个問題，大人个心肝內攏有解答。

小朋友B

毋過即算毋使恁做嘛無要緊啊！

強尼先生

因為佢人係𠊎頭要緊个屋下人，當然愛好好拁佢人照顧，大家个康健即係𠊎个責任啊。

小朋友A

嗯！你講了真著！

小朋友B

寵物即係恩人个屋下人！

O.S

因為強尼先生拁佢个動物屋下人惜命命，所以鎮內逐個細子人，攏記得和強尼先生作垺个伴喊做麼个名，尤其助手狗么大戇擱較係得人惜。

強尼先生

哎呦，大戇你洗浴猶吂洗好、膴身猶有波，較緊轉來啦！

O.S

鬥底，強尼先生會和佢个動物朋友變出麼个魔術咧？想討知故事落來仰子發展，愛直頭準時收聽，得恩人作垺來期待佢人个精彩表演哦！