詔安腔｜膨尾鼠个天弓(下)

OS

（上集提要）膨鼠和細老鼠對山阿鵲遐知虹个色地，膨鼠開始在這園區尋虹个色地，細老鼠尋虹色地以外个色。接落來會尋著無？請繼續聽落去。

OS

這時，天崠猶在落雭雭雨，膨鼠和細老鼠真暢即分開來尋色地。偎暗啊，膨鼠和細老鼠來到位約定遐真浪漫藤纏樹个樹下。

膨尾鼠

細老鼠，你有尋著無？

細老鼠

嘻嘻！得你臆䀴望啊？

膨尾鼠

定著有，著無？

細老鼠

嘻！膨鼠你䀴，這兜在樹下个樹葉，有豬肝色个、甜粄色个，猶有…

膨尾鼠

細老鼠，猶有麼个？你較緊講啦！

細老鼠

嘻嘻嘻！你䀴，猶有這老鼠色个葉。

膨尾鼠

細老鼠，你真厲害哦！

細老鼠

按你咧？膨鼠。

膨尾鼠

呵呵，你䀴這。

細老鼠

哇哦！膨鼠，你比𠊎猶較厲害。

膨尾鼠

細老鼠，你䀴，紅色个燈籠花、柑子色个木棉花、黃色个魚卵花、青色个含笑樹葉、茄菜个牽牛花。

細老鼠

真厲害哦！膨鼠。

膨尾鼠

毋過…毋過…

細老鼠

又仰子咧？

膨尾鼠

虹䀴起有七種色地，𠊎正尋著五種，猶欠兩種。

細老鼠

係哦！按愛仰子正好。

膨尾鼠

在這園區真難尋著藍色、青紫色个花樹。

OS

膨鼠和細老鼠在園區雨豆樹下，烏雲又慢慢飛過來，雨又落落來啊，雨越來越大，天崠開始𥍉爧鳴雷公，膨鼠和細老鼠走向猶个所在藏。無幾久，目珠前閃一下大光，係𥍉爧出現在佢人面頭前，轟轟咈个雷公打落來，一條全然緊个火光對一頭雨豆樹面上跈樹落來，有一兜樹皮彈開來，膨鼠和細老鼠兩儕恬恬，目珠金金又嘴擘擘，對心肝頭拍幾下下。

膨尾鼠

阿依哦！會驚死𠊎。

細老鼠

（細老鼠猶真樂暢講）係啊！驚到尿硬討疶出來，嘻嘻嘻！

OS

過無幾久，雨慢慢仔細落來。

膨尾鼠

細老鼠，你䀴！遐裡有一隻真多色个鳥在樹崠絡食。

細老鼠

哪位啊？在哪位啊？

膨尾鼠

噓…較細聲兜，莫嚇著佢。

細老鼠

哇！真多色，一、二、三、四、五，有五種色。

膨尾鼠

𠊎知啊，遐係五色鳥。

細老鼠

嘻嘻！膨鼠你䀴，五色鳥頭那崠大部份係藍色个。

膨尾鼠

哇！尋著啊，遐五色鳥頭那崠係藍色个。

膨尾鼠

按即伸青紫色猶吂尋著。

細老鼠

膨鼠，毋使擘心啦！𠊎會陪你一直尋著青紫色。

OS

為著討尋著歸下虹个七種色地，在落雭雭雨个情形下膨鼠和細老鼠一直行向陂塘，一下子即來到陂塘脣喊烏龜阿伯。

細老鼠

烏龜阿伯！烏龜阿伯！你在哪位啊？

OS

烏龜阿伯對水底探出頭來。

龜仔伯

呵呵呵！細老鼠仰子擱係你啊！你尋著虹个色地係無？

細老鼠

嘻嘻嘻！烏龜阿伯，𠊎人在園區尋著真多个色地哦！

膨尾鼠

細老鼠尋虹七色以外个色地，𠊎在尋虹个七色，伸青紫色尋無。

龜仔伯

這青紫色，藍毋藍紫毋紫，正經難尋。

膨尾鼠

難尋？表示係有哦！

龜仔伯

無毋著，呵呵呵……，等一下無雨个時務，𠊎喊孔雀魚跳出水面得你人䀴。

細老鼠

嘻嘻！𠊎真緊張哦！

膨尾鼠

𠊎嘛係。

OS

好定泥，陂塘水面，開始䀴著孔雀魚在遐跳離水面。

膨尾鼠

哇！有真多色呢。

細老鼠

有紅色、青色、茄色……

膨尾鼠

䀴著啊，有青紫色个。

OS

在膨鼠和細老鼠尋著虹个七色了後，真歡喜今日做和虹有關係个事情，離開陂塘隨人轉去自家个屋下。