詔安腔｜膨尾鼠个天弓(上)

OS

落歸暗夜个雭雭雨，晨早略略仔烏陰烏陰，弱弱个日頭光對雲內底探頭，雭雭雨嘛悿啊，伸落無幾多點雨，西片裡出現一個大大个虹掛在天崠，在園區个膨鼠伸一腰擱擂一下目珠。

膨尾鼠

哈！哇嗚！恁靚个虹，真厲害啊！

膨尾鼠

細老鼠！你在哪位啊！較緊出來作垺䀴虹！

OS

細老鼠歸身屙糟、面烏烏對排水蓋个空鑽出來。

膨尾鼠

嘻嘻嘻！細老鼠！你仰子啊咧？仰子歸身烏疏疏？

細老鼠

（敨吔一口氣）昨暗落雨落歸夜，𠊎个藪攏蔭水啊。

膨尾鼠

恁哦！真壞呢！按愛仰子正好？

細老鼠

毋使擘心啦！等落雨過後擱來做一個新个藪。

OS

自一溜即真樂暢个細老鼠，一時个擘心黏時即放莫啊。

細老鼠

著啊！膨鼠，你打早尋𠊎討做麼个？

膨尾鼠

係哦！𠊎差一兜仔即添放去啊。

OS

膨鼠拁頭下䀴著虹个事拁細老鼠講。

細老鼠

哇嗚！恁虹定著真靚哦，較緊渡𠊎去䀴。

OS

膨鼠和細老鼠兩個人一路走，走到頭下䀴著虹个遐頭雨豆樹下。

膨尾鼠

𠊎即係對這頭雨豆樹面上䀴著虹个，人跋起䀴望。

細老鼠

恁高呢！𠊎跋毋會起去。

膨尾鼠

愛仰子正好咧……，著啊，遐裡有一頭藤對另外一頭个雨豆樹递起去，你會用跋藤起去，恁即會用䀴著虹啊。

OS

膨鼠和細老鼠兩儕又擱一路走，走到另一頭个雨豆樹下，這個時務，細老鼠即擋恬落來。

細老鼠

哇嗚！

膨尾鼠

細老鼠，你又仰子啊咧？跋毋會起去係無？

細老鼠

你䀴，這藤和樹纏共下。

膨尾鼠

這若有麼个好䀴个咧？這園區內底有幾下頭啊！

膨尾鼠

這一頭…遐一頭…，遐裡猶有一頭。

細老鼠

哇嗚！真浪漫哦！

細老鼠

這藤纏樹得𠊎想著一條山歌歌詞。

膨尾鼠

嘻嘻嘻，細老鼠你會唱山歌？

細老鼠

𠊎這站攏在遐學唱山歌啊。

OS

細老鼠排出一副真風神个樣即唸起山歌歌詞：

細老鼠

入山䀴著藤纏樹，落山䀴著樹纏藤。藤生樹死纏到死，樹生藤死死也纏。

膨尾鼠

這係一條真好个山歌詞，𠊎不時在樹崠跋上跋落，攏無去體會這個意境。

OS

膨鼠渡逐儕去䀴虹，跋上雨豆樹崠䀴對西片裡去。

細老鼠

哇喔！足靚哦！

細老鼠

啊哦！壞啊啦，虹毋見去啊。

細老鼠

膨尾鼠

（道嘆並來失望講）哇！吓！

膨尾鼠

正䀴著一下子。

細老鼠

佢仰子毋掛在天崠較久較久咧？

OS

接落來，膨鼠和細老鼠分開來尋答案。

OS

膨鼠一路到樟樹下問大水蟻，又跋上樟樹崠問白頭确，攏毋知虹係仰子產生和消失。膨鼠真失望來離開，繼續去尋答案。

OS

另外一裡，細老鼠來到圳溝脣䀴著蚯婆即過去問，蚯婆䀴著細老鼠來，黏時一下即跳落水，「丼」一聲，消失在水底。

OS

䀴著蛘蜺即來問，毋過蛘蜺一下飛向東，細老鼠个頭那即向東，蛘蜺一下飛向西，細老鼠頭那即斡向西。

細老鼠

蛘蜺，你即得𠊎借問一下啦，飛來飛去𠊎嗄毋知愛仰子問。

OS

蛘蜺聽著細老鼠討問事情，即歇在長長个草葉面上，身體跈草葉上上下下停動。