詔安腔｜蝓螺流浪記(下)

OS

（上集提要）落歸夜个雨，蟲䘆跋起來泥面上，為著安全又鑽落泥下。露螺阿忠嘛在這大片个草埔繼續行。接落來會仰子呢？請擱聽落去。

OS

露螺阿忠食暗飽在圳溝脣䀴外頭个世界，嘛慢慢子欣賞這夜時頭个世界，聽𧊅子在圳溝脣个田坵面上唱歌、圳溝个流水聲，月娘走去雲遐藏，五、六隻火焰蟲在遐裡一𥍉一𥍉飛過來，像擐著燈籠飛上飛落。

阿忠

火焰蟲！！

阿忠

這下愛仰子正好，𠊎个天敵之一火焰蟲來啊。

OS

露螺阿忠一想著火焰蟲，攔緊即拁頭那、膴身勼入自家个殼內底。

阿忠

「阿彌陀佛！阿彌陀佛！較緊藏起來。

OS

歸夜毋敢睡个阿忠，一直到天光，正慢慢子睡落眠。

粗皮伯

好起來啊哦！阿忠，日頭炙屎朏猶毋跋起來！早起三朝當一工，莫恁懶尸。

阿忠

粗皮伯𠊎無講你攏毋知，昨暗夜………

粗皮伯

火焰蟲係無？

阿忠

你仰子知咧？

粗皮伯

佢人係來巡邏个，𠊎特別交待暗夜有人客來，愛特別加強巡邏。

阿忠

仰子無較早講啦？害𠊎驚到硬討死，歸夜無睡，這滿真悿。

粗皮伯

哈哈哈……真否勢。𠊎䀴，你擱加睡一下，當晝渡你過圳溝遐裡。

OS

當晝大家來到位圳溝脣。

粗皮伯

跋起𠊎个背脊骿，𠊎揹你泅水過去。

阿忠

會跌落圳溝無？跌落水𠊎係真有經驗。

粗皮伯

無問題莫緊張，注意，討落水啊哦。

阿忠

水略略仔急呢，有問題無？

粗皮伯

有問題嘛係在水面上啊。

阿忠

膴身溼去啊。

粗皮伯

恁毋係過來啊？

阿忠

感謝你！勞力！

粗皮伯

在這裡直直行過去，過菜園遐裡有弓蕉園，應當有你个同類。

OS

露螺阿忠離開粗皮伯了後，慢慢子行到菜園。

OS

阿忠䀴這無生半點草，又無半隻菜蟲，腳開始癢起來。蝶仔阿桂妹飛過來，

阿桂妹

阿忠你仰子走來這咧？這跡位真危險哦！

阿桂妹

這坵菜園射真多藥，草死淨淨，這兜蟲死个死、走个走。

阿忠

所以無人來這？

阿桂妹

無毋著，愛行過遐裡較安全。

阿桂妹

你在這等𠊎，毋好烏白走，𠊎去請粗皮伯來鬥相共。

OS

阿桂妹去尋烏龜粗皮伯，佢嘛一步一步行去菜園遐裡。

粗皮伯

時代無共款啊！幾下十年前生態猶真好，這滿攏變啊。

阿忠

𠊎个腳仰子會恁癢咧？

粗皮伯

你這個細子，你个腳去搵著農藥啊，較緊跋起來𠊎背脊骿，𠊎揹你過去遐裡。

阿桂妹

粗皮伯！𠊎來渡路。

粗皮伯

你飛較高䀴著較遠，即得你來渡路。

OS

三儕即去遐片菜園。

阿桂妹

到位啊！這係有機菜園有真多个蟲。

粗皮伯

阿忠！你有問題無？

阿桂妹

阿忠若像發燒啊！

粗皮伯

阿桂妹！你去請糖蜂捋一兜藥草來。

OS

蝶仔阿桂妹飛過歸個菜園，尋無半隻糖蜂，開始擘心起來。

山牛牯阿昌

戇戇戇，豬肉熬米醬。仰子恁戇啊！今日佢人徙藪，攏去保護蜂王啊。

阿桂妹

愛仰子正好？粗皮伯講愛請佢人去捋藥草。

阿昌

𠊎先去問花蛄了後正去捋。

OS

經過大家鬥相共，露螺阿忠慢慢醒過來，頭那款款伸出來，勞力大家照顧，繼續向前行。

OS

阿忠䀴著面前个露螺膴身係白个，著驚一下。經過大家紹介之下，兩儕共組家庭。

OS

露螺在大家个祝福之下完成這段好姻緣，天氣嘛漸漸轉寒，到位寒天，阿忠兩公姐在厥外殼鬥一緣「冬眠膜」，等明年天氣轉燒暖。