詔安腔｜蝓螺流浪記(中)

OS

（上集提要）菜園主人巡菜園，䀴著辛辛苦苦種个菜得雨涿到毋成樣，又得蟲食，䀴著露螺阿忠續手一撿又一擊，阿忠即飛到圳溝底得水沖走，堵好卡在樹椏上。接落來會仰子呢？請繼續擱聽落去。

OS

阿忠出食奶个力，尋好角度。大聲喝出：

阿忠

咿到咻！

OS

落尾嗄倒落來。這個時務一隻鳥飛來歇在樹椏面上。樹椏一沉落去，露螺阿忠又得水沖走，跈圳溝水去旅行。

OS

一個囝子在圳溝脣釣𧊅子，䀴著頭前跈水流過來一隻露螺。即續手用撈拁撈起來䀴望。

細倈仔

這隻露螺死去啊！

OS

提起來䀴一下即拁擊到遠遠去，擊在一大坵个菜園底。

阿忠

救命哦！救……

OS

阿忠喝兩句即昏去。一陣蟻子行偎來䀴。

蟻公阿義

得𠊎䀴望，猶無死啦，係破病昏去啦。

蟻公阿義

你人大家去捋一兜藥草來。

OS

歸陣蟻子走去咬藥草來得阿忠食，歸陣蟻子圍在阿忠脣頭，你一句𠊎一句講無歇。

OS

阿忠䀴著恁多蟻子，攔緊拁頭那勼入殼內底。

蟻公阿義

唉！這隻露螺敢係阿忠，火燒豬頭～熟面熟面。

阿忠

阿義……

OS

阿忠一喝出來，目汁直直汀，像䀴著親人共款。

OS

這個時務，蟻子做一下作垺拍手得露螺阿忠鼓勵。一站時間過去啊，阿忠嘛想討離開去尋自家个同類。

OS

一路趖，一路尋自家个同類，跋過石頭，來到久無整理个竹排橋。款款用膴身盡量伸出去，即差一兜仔，阿忠驚跌落去，攔緊拁膴身勼轉來。

阿忠

佳載，險險跌落去圳溝。

OS

阿忠敨一口氣，行較邊脣一兜，又一擺款款用膴身盡量伸出去。

阿忠

咿到咻。

OS

阿忠出力拁後背三股一股个膴身和屋下向頭前一伸，即恁過去啊，毋過膴身吊半天高。阿忠拁牙咬緪出力跋起去。

OS

行過竹排橋來到位一大片个草坪。

阿忠

一下子來恁多蛘蜺又飛來飛去，感覺真怪奇。

揚尾仔阿雲

討落雨啊，較緊去尋一個較高个所在藏起來，黏時會落雨。

OS

一下子蛘蜺阿雲嫂即毋知飛到哪位去啊。

OS

偎暗即開始落雨，一直落到天光，雖然雨無落真大，泥下嘛真溼。阿忠目珠擘金一䀴，著驚一下。

阿忠

阿依哦！泥下仰子會有恁多个蟲䘆。

阿忠

發生麼个事情啊？來䀴望个。

OS

阿忠䀴著逐尾蟲䘆真緊張嘛真擘心。即問蟲䘆阿傑。

阿忠

發生麼个事情咧？仰子會有恁多蟲䘆在這？

阿傑

（氣壞壞講）昨暗落歸夜个雨，𠊎人攔緊跋起來泥面。

阿忠

麼个原因愛跋起來。

阿傑

這你即毋知，落雨過後有一兜水會流走，有一兜水即會走入泥底，泥底水氣一飽足，空氣即少，𠊎人無法度擱在泥下底。

阿忠

所以你人即跋起來？

阿傑

（透一口氣）無毋著。離開生活所在跋起來係真危險个事情。

阿忠

這係仰子講？

阿傑

跋起來泥面上會堵著鳥、雞、鴨，會得佢人食莫。

阿忠

恁！你較緊鑽入去泥底。

阿傑

猶吂，泥底猶真溼，等日頭出來一下子𠊎即會煞煞鑽入去。

OS

無幾久日頭出來啊，阿傑跈這兜蟲䘆慢慢鑽入泥底，露螺阿忠嘛在這大片个草埔繼續行。