詔安腔｜蝓螺流浪記(上)

OS

在芋卵園脣有真多隻出世無幾久个細露螺，其中一隻个名喊做阿忠，揹自家个屋，伸出兩支角，慢慢子行，若行若唱歌。

OS

有一日个下晝頭，露螺阿忠䀴著真多蟻子傱來傱去，毋知在無閒麼个。

阿忠

麼个哥啊？相借問一下。

阿義

𠊎喊做阿義，有麼个事情啊？

阿忠

𠊎䀴你人傱過來傱過去，發生麼个事情啊？

阿義

你毋知哦？過無幾久會落大雨啦，𠊎人愛攔緊徙屋，若無，做大水會得水沖走，時到會死無命哦！

阿忠

有恁食力哦！𠊎逐日徙屋毋使擘心啦。

阿義

毋好恁講，你猶細漢有真多事情你毋知个，做好準備即會用駛萬年船，愛細義兜啦。

阿忠

好啦！𠊎會細義。

OS

蟻子阿義一下子即加入蟻陣內底，逐隻蟻子生到共款共款，䀴毋會出哪隻係阿義。

OS

這個時務，阿忠䀴著天崠慢慢變做烏陰天，無幾久開始𥍉爧鳴雷公。愛走去哪位正好？開始擘心起來。

OS

阿忠想著遐時蟻陣係跋起樹崠，攔緊跈个跋起樹崠，無想著自家速度恁慢，又揹恁重个屋，實在辛苦又苦憐，走个速度比毋會著雨來个緊。

OS

雨落傷大啊，一下無法度歇落來个樣，露螺阿忠跈大水浮浮冇冇，得大水沖走啊。

OS

雨恬啊，水嘛退去啊，等到第二日日頭炙屎朏，阿忠正慢慢伸出頭那，探一下外頭个世界，䀴一下又勼入自家个屋下。

阿忠

𠊎無死！𠊎無死！

阿忠

阿彌陀佛哦！𠊎無死，𠊎猶在。

OS

人講大難無死定著有後福，露螺阿忠這下在人个細菜園內底。這有恁多物件會用食，䀴著嫩葉，大大嘴拁食落去。

OS

食飽了後，尋䀴望有熟事个人無。恬恬行，慢慢行，䀴著著一身青色衫褲个菜蟲阿清妹在遐食菜葉，即大聲喊。

阿忠

麼个姊啊？這係麼个所在，有䀴著猶个露螺無？

阿清妹

這係人个細菜園，這个主人三不二時會來巡菜園，愛細義哦！

阿忠

你攏毋會驚哦？

阿清妹

𠊎有著青青保護个衫褲，這係保護自家个，得人䀴毋會出來正毋會危險。

阿清妹

你在這無保護色真危險，好心拁你講愛較緊走正著。

阿忠

𠊎會細義，勞力你。

OS

到位偎暗个時。菜園主人來巡菜園，䀴著辛辛苦苦種个菜得雨涿到毋成樣，又得蟲食，心肝底氣到會死，想討捉菜蟲，嗄䀴著露螺阿忠，阿忠即得菜園主人續手一撿又一擊，阿忠即飛到圳溝底。

OS

人講無米兼閏月，這擺阿忠又得水又沖走。有一擺得水沖走个經驗，露螺阿忠這擺知愛仰子保護自家。心肝底想，這擺毋知又討得水沖到哪位去啊。

阿忠

阿依哦！大……海？

OS

阿忠心肝底一著驚，想講這擺若去大海定著會死無命。

OS

這個時務，堵好卡在樹椏面上，露螺阿忠一直想討利用這個機會跋起來。天公爺毋會斷人个路，機會來啊。