詔安腔｜搞頭王白鶴(中)

OS

(上集提要）白鷺鷥討大遷徙，白鷺鷥阿祥伯在已經有真多年無䀴著个擇頭人个場景主持會議，會發生麼个事情無？請繼續聽落去。

阿鴻

哇！遐係𠊎公呢！阿公！阿公！𠊎在這。

OS

脣頭个白鷺鷥用翼向嘴比，發出「噓───」个聲。

阿祥伯

現場个父老兄弟姊妹，今日即討來擇出新个頭人，渡大家向前行，請逐儕斟酌推薦出人選。

OS

聽頭人白鷺鷥阿祥伯講了一兜事了後，現場个人恬恬無講事，有一兜人頭犁犁，有一兜人䀴來䀴去，攏無人來提出新頭人个人選。

阿祥伯

照傳統得男子人做頭人渡飛，夫娘人照顧細子進行大遷徙，𠊎老啊體力無法度應付，應當愛有人出來渡頭，渡大家向前行。

OS

細白鷺鷥阿鴻恬靜一下又開始像屎缸蟲共樣停動來停動去，後背个人䀴這個細人恁無乖，對佢个屎朏踢落去，阿鴻企無在倒落去，兩支腳一竳飛出去。逐儕無計好想，目珠一金，䀴著有人勇敢企出來，大嫲聲拍手擱喝：

眾人

頭人！頭人！頭人！……

OS

阿祥伯真歡喜，總算有人肯企出來渡頭，心肝底真暢，毋過這個人个形，火燒豬頭熟面熟面，擱認真拁䀴，本來坐到好勢好勢，嗄跳起來講：

阿祥伯

阿彌陀佛哦！遐敢毋係…遐敢毋係𠊎个孫阿鴻，烏白來，真額烏白來啊！討賞嘛毋係恁賞个。

眾人

頭人！頭人！頭人！……

眾人

英雄出少年！英雄出少年！……

OS

在歸陣喝咻之下，頭人个人選真像有確定个答案，阿祥伯䀴著這個情形，心肝底毋知討歡喜抑係愛來擘心，向前行出幾下步，兩支翼擎起來，現場黏時恬靜落來，阿祥伯即來宣布：

阿祥伯

恁多年來人攏無舉行大遷徙，新推選出來个頭人責任全然重，關係著這个族群个未來生存，這滿即來宣布新个頭人即得……阿鴻擔任。

眾人

頭人！頭人！頭人！……

OS

又擱在歸陣喝咻聲之下，新个頭人行到阿祥伯脣頭，白鷺鷥阿祥伯䀴著這個情形，心肝底想「筍愛嫩時拗，孫愛幼時教」，擘心嘛無路用，不得不面對這個現實。

阿祥伯

逐儕轉去先做準備，一禮拜後出發。

OS

阿祥伯䀴著孫係新頭人，拁過去自家做頭人个經驗和要領攏傳得阿鴻，相信自家个孫有能力去完成這困難个事頭。

阿鴻

阿公！安心啦！你教得𠊎个所有个要領和經驗，𠊎攏記起來，定著會完成任務个。

阿祥伯

阿公老啊，無想討跈你去新个環境，定著愛完成任務，得歸下个人有好个生活環境。

阿鴻

𠊎知！𠊎討出去尞啊哦！

OS

白鷺鷥阿鴻一講煞，即飛走啊。

阿祥伯

這個細子，一日賞到暗，係討仰子做頭人。

OS

一禮拜个時間到位啊，打早歸下集合好勢，細子頭王阿鴻用新頭人身分來到位現場，對天崠飛一輪檢查大家準備个情形了後，企在樹崠真有自信拁現場个人宣佈：

阿鴻

各位鄉親！相信逐個人今日攏隨著真大个信心，作垺向新个環境行，所有个老嫩大細一路攏愛細義，即來起鼓出發。

眾人

好！

OS

細子頭王白鷺鷥阿鴻連續喝「出發」，起身一飛，後背跈个起飛。