詔安腔｜搞頭王白鶴(上)

OS

天氣真好，天崠个白雲輕飛，青拚拚个禾湧跈風跳舞，白鷺鷥阿鴻在天崠踅圓圈，目珠瞇瞇跈風飛，享受恬靜。除了風輕輕飛過耳子脣。阿公臥起頭那目珠利利拁䀴，阿鴻一下子即像一粒消風个雞胲對天崠慢慢跌落來。

阿祥伯

(阿公)

這個細子頭王，這滿屎朏跌做兩裡，歸日無䀴著你，係走去哪位啊咧？

阿鴻

嘻嘻嘻，阿公這你即毋知，屋簷鳥阿水晨早在遐頭苦楝樹下，講佢進前對臺灣尾飛到臺灣頭个事情得𠊎聽。

阿祥伯

哈哈哈，一個人飛過竹笪真簡單，一陣人飛過千山萬水即無恁快。

阿鴻

阿公！𠊎聽無你个意思。

阿祥伯

逐種鳥个生活習慣無共款，在遷徙个過程即會無共樣，有一兜一兩隻在飛，有一兜歸大陣共下飛過百莊千坵田。

阿祥伯

阿公知福惜福，寶惜這跡位个環境，無像較早毋認輸，這滿對這个環境嘛熟事，認分在這過老儕人个生活。

阿鴻

意思係講阿公較早真會飛，係無？

阿祥伯

哈哈，你這個細子頭王聽識𠊎个意思，毋過……

阿鴻

毋過仰子？較緊，阿公較緊講啦！

阿祥伯

哈哈哈，好漢毋擱講當年勇。

阿鴻

阿公較緊講啦！

OS

遠遠聽著牛嫲「哞…」一聲，細白鷺鷥阿鴻翼一搖，黏時飛到牛嫲背脊骿去賞。

阿祥伯

這個細子一下子愛𠊎講古，一下子又飛去賞，實在哦！幾時正會大漢……

OS

日子一日一日過，白鷺鷥阿鴻嘛一日一日大。有一日，阿鴻對外頭轉來，拁外頭个事情講得阿公聽。

阿鴻

阿公！隔壁屋邊這擺講討大遷徙。

阿祥伯

阿公𠊎啊！寶惜這滿，無像較早一直毋認輸，恁多年來對這個環境熟事啊，想討安安定定在這過老儕人个生活。

阿鴻

阿公！阿公！進前𠊎依不時拁𠊎講『毋行毋會出名』，愛𠊎人勇敢行出去開創自家个前途。

阿祥伯

恁講係無毋著，毋過……。

阿鴻

毋過仰子咧？

阿祥伯

逐擺大遷徙愛擇出一個頭人，任務係渡族群到新个環境蹛落來，這個責任係關係著歸個族群个安全和未來。

阿鴻

得人擇出來个頭人，定著真威風，這好哦！

阿祥伯

你敢係想討去做頭人吓？

OS

猶吂等阿祥伯講了，細白鷺鷥阿鴻一想著討來做頭人，一下即飛起天崠，飛來飛去，想像自家係頭人渡千軍萬馬，飛啊飛。

阿祥伯

屎朏頭猶青青，毋知頭毋知尾想討學人擎頭旗？

OS

擇頭人个日到位啊，魚塘脣、泥下、樹崠攏係企淰淰个白鷺鷥，人一多事即多，這一句、遐一句，吵到天地會倒貶。這個時務一個老儕企出來，幾時係阿祥伯，目珠利利拁逐儕䀴，這個時務在場个逐個人攏向頭人喝咻：

眾人

阿祥伯！阿祥伯！阿祥伯！……

OS

白鷺鷥阿祥伯䀴著這場景，已經有足多年無䀴著啊，目珠擱䀴一下在場个人，款款擎起兩支翼胛，這時，喝咻聲即慢慢子恬靜落來。