詔安腔｜紅橋水聲(下)

OS

上集提要）大尾鼠和細老鼠歸路又驚又愛，行恁遠个路嘛悿啊，愛打扮个花姑阿麗嘛加入佢人共下行，眾人會尋著紅橋水聲這個所在無？請繼續聽落去。

OS

一路來逐儕得這水聲餳過來，開始一步一步向水聲个方向行，水聲越來越大聲，像鳴雷公共樣恁大聲。

大尾鼠

細老鼠

哇啊！

細老鼠

嘻嘻！這恁靚毋知係麼个所在？

OS

大尾鼠想討拁這個所在號名，即講：

大尾鼠

這跡位會出現虹，又有水，即喊做虹水聲，逐儕講好無？

粗皮伯

哈哈哈！號這個名真接近啊，擱臆䀴望！

細老鼠

𠊎知啊！這跡位係頭靚个，所以佢係紅橋，這聲音係紅橋水聲。

阿麗

儘採講講个！𠊎讀恁多書毋知頭好个係紅色。

大尾鼠

係啊！細老鼠烏白講。

細老鼠

有水有虹，紅色係虹个第一個色，所以佢係紅橋，著無？

粗皮伯

哈哈哈！無毋著！無毋著！

細老鼠

䀴𠊎有幾厲害。

粗皮伯

哈哈哈！無毋著！這個所在係『紅橋水聲』。

細老鼠

耶…！𠊎臆著啊。

大尾鼠

哇！細老鼠恁厲害。

粗皮伯

哈哈哈！毋過正臆著一半。

大尾鼠

細老鼠

阿麗

吓！正…臆著一…半。

粗皮伯

無毋著！正臆著一半。

大尾鼠

細老鼠恁精仰子會正臆著一半咧？

阿麗

係呀！粗皮伯講得𠊎人聽。

粗皮伯

好！好！好！

細老鼠

較緊講，較緊講。

粗皮伯

好！跈𠊎來。

OS

粗皮伯即渡逐儕去到佢自家逐年攏會來修練个所在。因為地形个關係，遐水聲聽起來即嶄然輕柔，聽起來即像長久毋會恬个一首曲。

細老鼠

粗皮伯！這跡位恁靚，𠊎攏無想討轉去啊。

大尾鼠

靚！靚！𠊎嘛無想討轉去。

阿麗

靚係靚啦！無適合𠊎。

粗皮伯

無毋著！各人有各人適合个環境。

OS

逐儕擇好自家想討坐个位了後，粗皮伯講紅橋水聲个由來。

粗皮伯

成過成過

細老鼠

嘻嘻！粗皮伯！成過係幾多年前？

粗皮伯

哈哈哈！成過成過，大約八百年前，記得遐時𠊎二百歲生日，自家一儕來到這，䀴著這跡位環境好，水頭前有一座紅橋，堵好遐日落大雨擱落無歇，大水拁這紅橋沖走，一直到今攏無翻起，毋過這『紅橋水聲』个名一直流傳到今。

細老鼠

即恁簡單？粗皮伯！你有講毋著無？

粗皮伯

即恁簡單啊，哈哈！你這隻細老鼠想講幾複雜，有時務做人毋好拁簡單个事複雜化，恁生活正會快樂知足。

阿麗

即係講啊！像𠊎做先生拁大家䀴病，逐日著靚靚，飛來飛去服務大家，生活簡單，快活到像神仙。

細老鼠

恁！𠊎頭下即臆毋著啊。

粗皮伯

你這隻細老鼠真精，號名嘛真有創意，真好啊。

大尾鼠

𠊎大尾鼠會用問一個問題無？

粗皮伯

有麼个問題，今日𠊎知个定著拁大家解說。

大尾鼠

打先粗皮伯講遐八百年前、二百歲生日，您鬥底幾多歲啊咧？

粗皮伯

無幾多，正一千歲定。

大尾鼠

細老鼠

阿麗

哇…！一千歲猶定。

粗皮伯

哈哈哈！𠊎人龜族个世界，係長壽个代表。

粗皮伯

今日逐儕有機會來到這紅橋水聲，即係緣份，即渡大家行行个。

OS

頭尾，烏龜粗皮伯渡逐儕來到佢靜坐个所在，吩咐逐儕坐落來，心恬靜落來，目珠瞇瞇，用心聽這紅橋水聲，享受這大自然。