詔安腔｜紅橋水聲(中)

OS

（上集提要）大尾鼠和細老鼠兩儕又驚又愛，歸心想討去尋有水聲个所在，路上堵著烏龜粗皮伯，三儕一路上會堵著麼个事情呢？請繼續聽落去。

OS

細老鼠心肝底正經又驚又愛。

細老鼠

嘻嘻！粗皮伯恁即拜託你渡路，好無？

粗皮伯

哈哈哈！會用！會用！毋過……

大尾鼠

細老鼠

又仰子啊？

粗皮伯

哈哈！無仰子！無仰子！係𠊎腳步行較慢，你人兩儕愛有耐心。

細老鼠

害𠊎擱驚一下，嘻！

OS

三儕即款款一步一步向水聲个方向行。

OS

細老鼠和大尾鼠，即一下子走頭前，一下子走倒轉來陪粗皮伯行，來來去去毋知走幾多擺。

細老鼠

啊！

大尾鼠

細老鼠！細老鼠！仰子啊？

細老鼠

遐…遐…粗…

OS

細老鼠事猶吂講煞即昏去。

大尾鼠

啊哦！細老鼠昏去啊，粗皮伯較緊拁救……

OS

呵呵！一張白紙攏無字，毋使擘心，請花蛄阿麗來一下即好啊。

大尾鼠

花蛄阿麗！你在哪位啊？較緊來救細老鼠。

OS

花蛄阿麗，一聽著有人喊，開始來打扮，著一身紅衫定著愛有烏點个，表示佢全然靚。

大尾鼠

花蛄阿麗！你做醫藥先生係討救人个，仰子打扮恁久又款款行？

阿麗

你仰子恁戇？這細老鼠傷悿啊！得佢睡一下即好啊！

大尾鼠

𠊎人出來尞好好仰子會悿咧？又講𠊎戇。

阿麗

細老鼠个腳恁細，你跳一步，佢愛走幾多步？講你戇，擱毋承認。𠊎花蛄腳步細，毋過𠊎係會飛

大尾鼠

係哦！𠊎仰子無注意著咧？

OS

細老鼠睡一斂，共樣無改變佢个樂觀人生

細老鼠

麼个事情？麼个事情？嘻嘻！

OS

烏龜粗皮伯一䀴即哈哈大笑，開始唱佢老儕人个歌，一步一步向水聲个方向行。

OS

水聲對細聲跈腳步越來越近，水聲即越來越大聲，大家即希望較緊到位水聲遐。

細老鼠

嘻嘻！真緊張哦！定著係一個真靚真靚个所在。

大尾鼠

𠊎嘛係！目珠毋敢擘金來䀴！驚講傷靚無法度享受。

大尾鼠

粗皮伯！普通時𠊎䀴你行路即款款子行，無想著你走个速度比𠊎較緊。

細老鼠

大尾鼠……等𠊎啦！

大尾鼠

細老鼠！走較緊啦，跈毋會著粗皮伯。

細老鼠

你人……先去……𠊎歇一下順續敨一下氣！

OS

大尾鼠斡頭一䀴嘛擋恬落來，陪細老鼠，自家敨个氣嘛真急。聽著遠遠个水聲，脣頭細老鼠个敨氣聲，猶有咻咻咈个聲音。這個時務，空氣像結冰共樣，世界像時鐘無撙彈簧，歸下攏毋會停動啊。

大尾鼠

啊！

細老鼠

嘻嘻！麼个事情咧？

大尾鼠

細…老鼠…，有…一尾……

細老鼠

有一尾蟲䘆啦，無事情。

大尾鼠

毋係啦！細老鼠，有…一尾……蛇…蛇來啊。

細老鼠

阿依哦！你仰子毋較早講咧。

OS

兩個人八支腳走若飛，一下子即無䀴著人。

OS

在另外一方面，粗皮伯來到水沖就近，遠遠一䀴，䀴著花蛄阿麗六支腳擎向天，腳出力想討翻身過來，即行偎去擱䀴清楚，即大笑講：

粗皮伯

哈哈哈！害𠊎三步做兩步走，想講發生麼个大事情，幾時花蛄阿麗在這六腳向天炙日頭。

阿麗

莫笑𠊎啊！較緊扶𠊎跋起來，會炙到變乾啊。

OS

逐儕共下拁花蛄阿麗扶跋起來。

大尾鼠

細老鼠

咿得咻！