詔安腔｜紅橋水聲(上)

OS

大雨過後，黏時好天，大草坪上聽會著兩個人在走相捎个聲音，來到粄葉樹下歇落來，大氣接毋會著小氣，風一下大一下細吹過來。

大尾鼠

（認真講）你聽！有聲音！

細老鼠

嘻嘻嘻！大尾鼠！本來風吹這大頭个粄葉樹即會有聲音。

大尾鼠

毋係啦！你聽！有流水个聲！

細老鼠

嘻嘻嘻！𠊎細老鼠耳子較細！親像有聽著流水聲，𠊎正經真想討去䀴望个。

大尾鼠

𠊎跋起去粄葉樹面上，䀴好啊正拁你講。

細老鼠

嘻！好哦！大尾鼠！較緊跋起去啊，𠊎即在樹下等你个消息。

OS

大尾鼠兩下手即跋上樹崠，風吹樹搖，大尾鼠目珠𥍉啊𥍉，拁樹攬个膴身跈樹搖。

大尾鼠

哇！細老鼠樹崠風真透。

細老鼠

大尾鼠！有䀴著無？

大尾鼠

等一下哦！

細老鼠

有䀴著無？有䀴著無？較緊拁𠊎講。

OS

大尾鼠緊張又款款對樹崠落來。

細老鼠

嘻嘻！好哦！大尾鼠較緊拁𠊎講，䀴著麼个？

大尾鼠

否勢！細老鼠！𠊎麼个攏無䀴著。

細老鼠

恁哦！

大尾鼠

毋…過。

細老鼠

毋過麼个？

大尾鼠

日頭落山烏昏啊，𠊎等過幾下日，準備好正擱共下去䀴，你䀴會用無？

細老鼠

嘻嘻！真好哦！大尾鼠後次擺正擱來去䀴。

OS

幾下日過，大尾鼠和細老鼠共下出來尞，草坪上你捎𠊎、𠊎來捎你，笑聲傳到歸草坪。好定泥，兩儕恬落來，你䀴𠊎、𠊎䀴你，共時大笑起來，共下講：

大尾鼠

細老鼠

哈哈哈……水聲，來去䀴水聲个所在。哈哈哈……

OS

兩儕即行入樹林內底，來到上擺來个所在尋遐粄葉樹，一路行，一路行，真無簡單來到位粄葉樹下，嗄聽無水聲。

細老鼠

嘻嘻！大尾鼠！人會行毋著所在無？

大尾鼠

嗯…𠊎想一下。

細老鼠

嘻！𠊎嘛來想一下。

細老鼠

嘻嘻嘻！𠊎想著啊。

大尾鼠

恁緊即想著啊哦！細老鼠！較緊拁𠊎講。

細老鼠

你想一下！上擺人來个時務係落大雨，溪水自然較大聲，這滿又無落雨，這幾下日个雨又毋會大，所以水聲即細，水聲細即聽無。

大尾鼠

係哦！正經个，毋過恁即尋毋會著啊。」

細老鼠

無問題！人擱向前行即會尋著水聲个所在。

OS

兩儕歡歡喜喜又希望尋會著水聲个所在。

貓頭鳥

咕咕咕！咕咕！

OS

又驚又愛个大尾鼠和細老鼠兩儕款款向前

大尾鼠

細老鼠

啊！

OS

攬作垺个兩儕，目珠眨眨腳直直掣。

大尾鼠

細老鼠

人莫去啊好無？

OS

大樹下傳出笑聲。

大尾鼠

細老鼠

啊！

細老鼠

大尾鼠，毋好自家驚自家，遐係烏龜粗皮伯个笑聲。

OS

這個時務，烏龜粗皮伯來到面頭前。

粗皮伯

哈哈哈！細老鼠耳子真好。你人兩儕又驚又愛，想討去有水聲遐裡係無？

大尾鼠

你仰子會知？

粗皮伯

哈哈！頭下貓頭鳥放信號得𠊎知啊。

細老鼠

嘻嘻！放信號，害𠊎想講係……嘻嘻！