詔安腔｜勇敢个屋簷鳥(中)

OS

（上集提要）屋簷鳥阿水歸心想討去臺北，在爺哀毋盼之下開始飛向佢想討去个所在，路上會堵著麼个事情咧？請續落聽落去。

OS

阿水飛到西勢文筆亭就近，䀴著路脣電線面上企一排一排个屋簷鳥，算起來嘛有幾下百隻，即飛落去䀴一下。

阿水

大家好！𠊎係阿水！

OS

阿興伯䀴一下阿水即講：

阿興伯

細猴个！討去臺北个係你係無？

阿水

係啊！你仰子會知咧？

阿興伯

你吂到位，消息早即到位這啊。

阿水

𠊎討去臺北䀴望。

阿興伯

敢好？毋過台北真遠呢！嘛會危險。

阿水

𠊎知啊！毋過𠊎定著討去。

OS

歸下个屋簷鳥斡過來䀴阿水，擱拍手拁阿水加油。

△

眾人拍手聲

阿興伯

𠊎人係在這跡位試探你，䀴望你係毋係有心討去臺北城。

阿興伯

兄弟啊！準備哦！

OS

歸下个屋簷鳥飛去圍一個圓圈討得阿水通過，啊擱祝福佢去臺北完成心願。

阿興伯

阿水啊！這係得你个祝福，你對圓圈飛過去接受大家个祝福。

阿水

好！勞力大家。

阿興伯

記得哦！向北飛即䀴會著下淡水河，你攔緊去。

阿水

好！

OS

屋簷鳥阿水對歸下屋簷鳥圍个圓圈中央飛過去，來接受大家祝福向北行。

OS

阿水一路飛了真久，䀴著白鷺鷥阿祥即飛過去問佢。

阿水

阿祥哥！借問一下，臺北愛仰子行啊？

阿祥

細子！你討去臺北係無？

阿水

係啊！𠊎想討去臺北䀴望个。

阿祥

少年人有志氣，毋過臺北真遠呢！𠊎毋識去過，𠊎想臺北係在臺南擱起去。

阿水

係喔！阿祥哥！勞力你！感謝你！

阿祥

𠊎識向北行，飛到下淡水河遐裡，你愛飛過下淡水河擱向北行，正擱問䀴望。

OS

阿水離開白鷺鷥阿祥哥了後，直直飛䀴著下淡水河。

OS

阿水䀴著遠遠八五大樓做一個方向，即展開翼飛起來，河溪面上个風真大，飛起來即真食力。

OS

阿水出力飛，風即拁佢吹偏走、吹倒退，硬骨氣个阿水毋認輸，落尾飛過下淡水河，向八五大樓方向飛去。

OS

自阿水飛過下淡水河過後即變到全然有信心，來到位高雄堵著都市內个屋簷鳥阿順伯。

阿水

阿順伯！𠊎想討去臺北䀴望下。

阿順伯

𠊎真歡喜，人个少年屋簷鳥有志氣，你真成𠊎少年个時來到高雄絡食个樣。

阿水

阿順伯！你生到和𠊎原鄉个隔壁屋邊有淡薄無共樣。

阿順伯

仰子講？

阿水

都市个屋簷鳥較高較瘦，原鄉个即生做較矮較肥。

阿順伯

少年人目珠真利哦！後擺有前途。

阿水

阿順伯！臺北愛仰子行啊？

阿順伯

臺北𠊎毋識去過，這個時務燕子應當對上頭落來个，佢人歇在隔兩條路上，去問佢人，佢人會真熱心拁你鬥相共。

OS

屋簷鳥阿水離開阿順伯去尋燕子阿福伯，䀴著恁多燕子飛來飛去，真無閒。

阿水

阿福伯！阿福伯！

阿福伯

麼儕喊𠊎啊？

阿水

阿福伯！𠊎係屋簷鳥阿水，屋簷鳥阿順伯紹介𠊎來拜訪你。

OS

阿水拁討去臺北个事講得燕子阿福伯知。

OS

阿福伯拁飛行路線和愛注意个事情，拁阿水講，嘛順續教阿水飛行技術。