詔安腔｜勇敢个屋簷鳥(上)

OS

銃炮聲鳴起來，車城山崠个阿兵哥在遐演習，山下伙房屋个屋簷下有一個屋簷鳥个鳥藪，鳥卵搖啊搖，嗄出一隻細隻屋簷鳥，𠊎人即拁佢喊做阿水。

OS

鳥簷鳥阿水一出世，爺母即辛苦尋細蟲含蹛轉來飼食，佢若像長久食毋會飽共款，一日到暗吱吱喳喳，爺哀對子女个照顧係天性，做爺哀个一向毋識埋怨。阿水一日一日大，直直到有一日，爺哀教阿水學飛，仰子學即學毋會。

阿爸

阿水啊！你係𠊎人个心頭肉！毋過，𠊎人係這個地區頭會飛个，逐擺飛行技術个比賽，𠊎人係著頭等，逐年會有真多各種个鳥飛來䀴𠊎人比賽和表演。

阿水

正經个哦！𠊎討和阿怙阿依共款做第一等。

阿姆

阿水啊！你猶細漢！愛好好來學飛，後擺正會有成就，愛認真打拚來學，知無？

阿水

𠊎知啊！𠊎毋會得阿怙和阿依失望。

OS

過無幾多日，阿水个飛行技術越來越好。

OS

有一日个偎暗，阿水在外頭真暢飛轉來，即大聲喝：

阿水

阿怙！阿依！

阿爸

麼个事情咧！大嫲聲直直喝！毋識聽過銃砲聲係無。

阿水

毋係啦！今日下晝𠊎聽講北片裡有一個所在喊做臺北，𠊎想討去䀴望。

阿姆

吓！你講麼个啊？

阿水

𠊎想討去臺北。

阿姆

唉呦！阿水啊！你這個大戇牯啊！臺北係真遠真遠个所在呢，你有命好去無命好轉來，毋會用，毋會用。

OS

阿依有淡薄仔受氣。

阿爸

阿水啊！你愛想清楚哦！臺北係真遠个所在。

阿爸

毋過？

阿水

毋過麼个啦？

阿爸

你若定著討去，𠊎毋會反對，去䀴望外頭个世界嘛好啦，毋過，自家愛細義。

阿姆

阿水啊！毋係毋得你去！去外頭世界䀴望下，係一件好事情，你愛知做爺哀个會擘心，知無？

阿水

𠊎知啦！𠊎毋會得阿怙和阿依失望个。

阿爸

好啦！你量早兜去睡較有精神，天光晨早打早即出發，路上自家愛保重。

阿姆

阿水啊！阿依心肝底會擘心，嘛睡毋會落眠。

阿水

阿依！毋使擘心啦！𠊎會細義平安轉來。

OS

第二日打早。

阿水

阿怙！阿依！𠊎討來去臺北囉！

阿姆

阿水啊！你正經討去？

阿水

阿依！男子人志在四方。

阿姆

𠊎會毋盼，毋知愛幾久正會䀴著你。

阿水

阿依！安心啦！𠊎會較緊轉來。

阿姆

阿水啊！你愛細義哦！

阿爸

愛細義哦！𠊎和你阿依會等你轉來。

OS

即恁做爺哀个雖然毋盼，嘛係愛祝福阿水一路順風。

OS

兩公姐目珠金金䀴著阿水越飛越遠。

OS

飛！飛！飛！

OS

阿水離開爺哀歡喜討去臺北，即唱歌起來：

△

𠊎係勇敢屋簷鳥，細細膴身瘦瘦腳，行起路來跳跳跳，嘰嘰喳喳係唱歌，屋下大細有禮貌，飛行技術樣樣會，你𠊎共蹛一間屋，大家即係屋下人。

OS

阿水真暢，著面飛著面講：

阿水

𠊎討去臺北啊！𠊎討去臺北啊！