好事成雙-蔡森泰夥房3

hi！你好，歡迎收聽［好事成雙］个節目，亻厓係陳雙。

上禮拜六堆文化歷史工作者同大武山个守護人員森泰哥哥，

來到節目當中來聊[夥房]个議題，森泰哥哥有講到，六堆客家个男仔人，

最驕傲个事情就係起[夥房]，保護佢心愛个家人，講到這个[夥房]，

每一个［夥房］前面都有一个禾埕，這个禾埕仔个功能真多，可以曬穀啦、

阿媽曬醬菜啦、老人家打嘴鼓、細人仔搞聊、阿婆種花做盤花敬神、細妹仔相親…等等个地方。

到底，[夥房]係仰咧來个？[夥房]底背最重要个人係麼人咧？

還有，[夥房]有一个喊做［轉廊］个地方，這个［轉廊］有麼个

功能呢？公嘗係麼个？伯公係麼个？

歡迎森泰哥哥。

原來，[夥房]底背最重要个人就係阿婆，麼个事情都阿婆做，要做麼个事情都要尋阿婆，

有分你想起來麼？你看厚，打水／㧡水／煮飯／洗衫褲seˋ samˊ fu／田坵仔作細…等等，

項項都係阿婆做个，你有想到麼？細囝仔个時節要尋阿婆，在灶下仔一定尋仔到阿婆，

所以啊！按呢講起來，在這个[夥房]底背最重要个人就係阿婆，你講係嘜。

還有，公嘗就係來台祖，有公嘗以後就會捐錢來起伯公廟，聽耶

森泰哥哥說明，正知得，要形hinˇ 成一个庄頭最重要个事情

就係愛起這个伯公廟。    

 

好！今晡日个節目就要同你講８８囉！

下禮拜再來聽森泰哥哥來紹介放祖公牌个地方［正神間］，再來繼續同森泰哥哥來聊，仰咧來認識[夥房]文化？還有， 在[夥房]肚要仰咧來敬香／沖爺？

好！下禮拜［好事成雙］正來聊喔！８８