2023-02-28 : 18點新聞 - 洗身槽个細菌超過標準幾下千倍　日本旅館个社長打白講指示員工毋使換水

洗身槽个細菌超過標準幾下千倍　日本旅館个社長打白講指示員工毋使換水

日本福岡縣有一間開業超過一百年个老字號溫泉旅館，旅館肚个大洗身堂日前分政府檢驗出溫泉水裡背肚有一種名仔安到「退伍軍人」个細菌，細菌个含量超過標準3700倍。經營這間旅館个社長山田真今晡日公開會失禮，打白講承認佢指示員工毋使換水。

這間聽講連昭和天皇都識歇夜戴過个老字號旅館，係位在福岡縣筑紫野市个「二日市溫泉　大丸別莊」，福岡縣政府日前發現旅館肚个大洗身槽，一年竟然單淨旱兩到水，還有一擺分政府檢驗出「退伍軍人細菌」个含量超過標準3700倍。

福岡縣根據「公眾浴場法」所制定个條例規定，做為連續使用个循環洗身槽，逐隻禮拜必須至少換一擺淨俐个水，還過水竇肚殘留氯个濃度愛維持一公升0.4毫克以上。福岡縣政府當在該檢討係毋係愛開罰違反條例个業者。

根據日本共同社報導，山田在上晝个記者會當中講，因為旅客減少，係佢下令指示員工毋使換洗身槽个水，「因為自家思考毋罅造成消費者个困擾，正經非常敗勢」。

講著一年單淨換兩到水，山田講，從2019年12月之後，對溫泉个管理開始變得毋罅完善，「因為COVID-19疫情造成來个人客數量大幅減少，使得管理頂項放較冗」。

根據全日本新聞網（ANN）報導，山田講，佢先入為主个觀念認為退伍軍人細菌毋係麼个了不起个細菌；另外講著無加著氯做消毒，「係因為𠊎毋好氯个味道」。

根據台灣个衛生福利部疾病管制署官方網站資料，退伍軍人細菌會引發退伍軍人病還過龐迪亞克熱（Pontiac fever）。退伍軍人病會引發肺炎，甚至敨氣衰竭，死亡率高達15%，假使有免疫功能障礙个人會還較高；龐迪亞克熱毋會引起肺炎抑係死亡。