2022-03-30：下午15點新聞

首先來關心拜六拜日天時个消息

今補日全台灣係出日頭个好天時，好天時會持續到拜五暗補夜，拜五暗補日東北季風个鋒面接近台灣，拜五台灣北部還有東部開始落水，到了拜六清明連假第一日，中部以北會落水，拜日全台灣變成落水个天時，毋過到了下禮拜一、下禮拜二，連假最尾兩日，全台灣轉成出日頭个好天時，鄉親做得把握下禮拜清明連假个最尾兩日个好天時出門尞。
溫度方面，因為拜五暗補夜鋒面接近，所以全台灣个溫度會開始降低，低溫會到13度上下，這个低溫會持續到拜日，提醒鄉親這幾日愛著卡燒暖斗，到了下禮拜一溫度會就會轉燒暖。

接下來關心疫情个消息

中央流行疫情指揮中心宣布，因為本土疫情變嚴重，所以指揮中心增加做得拿公費COVID-19檢驗試劑个診所，從目前272間，增加到540間診所還有衛生所，全部做得分鄉親去拿毋始錢个ＣＯＶＩＤ１９檢驗試劑。

另外，指揮中心也宣布，從4月初1日到4月30，愛強化帶嘴案兒个防疫措施，像係室內ktv唱歌，愛帶嘴案兒才作得唱。

接下來更新台灣疫情个消息，指揮中心公布，昨補日無確診病例過身，無過有新增加96例確診，其中有33沙係本土病例，63沙係從國外轉來个病例，另外，昨補日新增加國外轉來个６３沙病例，分別係有13沙係坐飛行機進境台灣檢查出來、50沙係防疫旅社隔離期間檢驗出來，目前臺灣確診人數做盡來到2萬2千992沙，過身个人數也來到853沙。

指揮中心指揮官陳時中表示，目前本土疫情還忙完全空置下來，請鄉親盡量不好去人多个所在，出外也一定愛戴好嘴暗兒。還忙去注射預防射个鄉親，也愛遽遽去注射。