:::

講客三分鐘新聞講客電臺節目組

2022-11-24 15:00:00

播出時間: 2022-11-24 15:00

2022-11-24 : 下午15點新聞

傳出越南最大鋼鐵工廠減少產量 中鋼講:去庫存仍是鋼市回溫關鍵

越南最大鋼鐵製造商和發集團傳出續等會大規模減少產量,針對這件事情中國鋼鐵公司認為,越南鋼鐵工廠外銷國家主要在歐洲摎美洲,減少產量過後對歐洲摎美洲个銷售數量自然會減少,但係因為接近年下、高庫存造成需求市場冷淡,黏時效果有限,提升鋼鐵市場个關鍵,還係愛看庫存去化情況,逐步降低庫存量。

日本媒體引述消息講,和發集團(Hoa Phat Group)續等會大規模減少產量,11月按算暫時關閉7座高爐當中个4座,12月可能再過關閉另外一座高爐。

針對和發集團傳出續等會減少產量,中鋼公司分析,估算係反映當地需求較低,落價接單仔乜無法度帶動買氣,單淨做得透過關閉高爐減少產量,但係淨做得「療傷止痛」,黏時效果有限,主要係為了降低持續生產所帶來个庫存壓力,加上越南錢个貨幣價值無像其他亞洲國家个貨幣貶值幅度恁大,不利越南鋼鐵出口。

中鋼公司講,越南鋼鐵工廠主要銷售對象係歐洲摎美洲,假使和發个鋼鐵工廠正經減少產量,對中鋼來講,多少有兜幫助,但係歐洲摎美洲這兜國家這一站仔个鋼鐵價數毋好,年下需求乜係較冷淡,續下來舊曆年愛到咧,加上第1季通常係淡季,所以買盤增加補庫存个機會毋大。

中鋼認為,鋼鐵市場敢做得回溫,愛觀察明年第一季客戶庫存去化情況,為下游在明年第2季旺季營造補庫存个機會。

屏榮高中服裝儀容管教分教育部開罰一百萬銀 潘文忠講:過毋改續等會減少招生名額

屏東縣私立屏榮高中不當管教學生仔服裝儀容,分教育部審核過後,決定減少屏榮高中在112年度獎勵款新台幣100萬銀。教育部長潘文忠今晡日講,學校假使毋調整規定,可能會分佢兜減少招生名額。
屏榮高中分人指出長年以不當言語摎管教方式,包括用尺量頭那毛長度,規定冷天禦寒衫褲做毋得超出制服之外這兜無合理个規定。教育部派人去查證確實有影,日前召開私立學校諮詢會,經過學者專家討論過後決議,核定減少112年度獎勵款100萬銀,寫下教育部主管學校當中頭一例。

潘文忠表示,學校違反服儀規範,會先輔導,私立學校勸話幾下擺都毋聽,會扣減獎補助款;公立學校會依照教育人員獎懲規定處罰。屏榮高中係當多擺行文要求之後,但係學校還係毋插教育部,所以正會重罰。還過學校係講持續毋調整,教育部做得依照法律減少招生名額。

屏榮高中回應表示,這一學年度已經放寬學生仔服裝儀容个相關規定,以「無染毛、無電毛」為原則,對學生仔並無處罰,顛倒係採取鼓勵个方式。針對分教育部決議核定減少100萬銀,學校表示試著遺憾,但係也淨做得尊重。