2022-02-03：下午13點新聞

鄉親大自家好 歡迎收聽今哺日三分鐘新聞 厓係西湖个蘇佑昇

首先來關心過年期間个防疫措施

中央流行疫情指揮中心表示，過年期間，係流感流行个時節，目前台灣个本土疫情也變嚴重，發生多著社區感染个事情，所以特別拜託大家，過年期間一定愛戴好嘴案兒，盡量無好去人多个所在，拜年也做無得握手，去到公共場所一定愛登記實聯制，假使身體無爽快，就無好出門，避免互相感染。

指揮中心也表示，因為omicron疫情擴大，還盲去注射預防射个鄉親，像係老人家還有高風險个族群cug²kiun，一定愛遽遽去注射第一支還有第二支預防射，才做得避免感染之後，變成重病。

指揮中心也宣布，昨補日無確診病例過身，無過昨哺日新增53例確診病例，其中有16沙係本土病例，37沙係從國外轉來个病例，這37沙分別有25沙係坐飛行機進境台灣檢查出來、12沙係防疫旅社隔離期間檢驗出來，目前臺灣確診人數做盡來到1萬八千9百零3沙，過身个人數也來到851沙。

指揮中心指揮官陳時中表示，全世界Omicron个疫情動嚴重，台灣打日入境也有檢驗到omicron个病例，美國一日也有超過29萬沙確診，日本一日也增加超過7萬沙个病例，所以指揮中心拜託大家愛遽遽去注射第三支預防射，才做得增加自家个身體保護力。

最尾來關心今補日年初三天時个消息
中央氣象局表示，今補日係年初三，因為昨暗補冷空氣下南，今補日彰化以北還有東部全部會落水，提醒彰化、台中、苗栗、新竹、桃園、新北市、台北市、基隆還有宜蘭、花蓮、台東個鄉親，出外愛記得著水衣還有帶傘兒。

另外，氣象局提醒，年初四臨暗還有年初五召晨，台灣平地各所在，可能會到10度以下，請鄉親愛注意，著卡燒暖無好冷到。